Satpiang Mutpuak ~ Zam Thuam

Satpiang Mutpuak ~ Zam Thuam

Naupangte ommaih nadingin a kibawl satpiang tui thawl le ciangkual kithuah ommaihna van pen mikim in kimu ngeitek ding hi. A thawlsin hongin a ciangkualno satpiang tui sung a diah khit ciang a ciangkual hong mut leh ahoih mahmah mutpuak note hong leng khia zaizai hi. Khuavak le nitang in tuate hong kap ciangin sakhi-tuihup mel bangin mel namkim tawh tua mutpuaknote etlawm mahmah hi. Naupangte gen kei ni, uliante nangawn in kilehetkik kha mawk hi. Ahangin hoih ii sak hang ahi hi.

Leo Tolstoy ii Khuang-hawm

Leo Tolstoy ii gelh Empty Drum pen hanciam in ka sim kha ngei hi. Manglai ahih manin a vek in ka telcian zo kei hi. Ahih hang ka ciapteh khak thu khat in mipite in a kitum ciang a ging khuang hawm nung zui in pai uh hi cih thu ahi hi. A taktak in nuntakna a neilo tua khuang sungah bangmah omlo hinapi a kitum ciang ging mawk ahih manin tua khuang ging nung a zui uh ahihna kilangsak hi.

Sangak le khuang

Zolai simbu tan thum sungah a kihel ngei tangthu khat ah a gilkial sangak khat in aklui khuan za hi. Aklui omna lamah hong pai in aklui hong manin hong nek sawm hi. Tualaitak khuang kitum ahih manin khuang ging hong za leuleu hi. Aklui khuan sangin khuang gin ging zaw ahih manin gol zaw in teh ci-in aklui hawlkhia in khuang omna lam hong zuan hi. Khuang bawh in a peh khiat leh a sungah bangmah omlo in a hawm na hi hi. A gilkial sangak a ding a ginngaih khuang sungah an na omlo mawk hi.

Benetton satpiang mutpuak

Benetton pen Italy fashion Company khat ahi hi. Tuma kum 30 kim lai in a kibawl company kyawngia (Advertisement) te lakah Benetton te kyawngia in mipite lungsim a lawng pen, a la pen hi kici hi. Benetton Kyawngia te en lehang kialpi a tuak mivom naupang no khat ii lim pen pi 20 a sang signboard pi tawh suang, AIDS natna tawh a si dektak cina khat ii man tawh kyawngia, Bosnian a a si galkap khat ii sisan tawh kidim a galkap puante tawh a kizaih man zang in kyawngia cih bangin a company uh mi lunglut dingin kyawngia uh hi. Tua ban ah America gam thonginn sunga a om a sihni ding a ngak sihdan kipia thongkiate ii lungleng khuangai a a dang dikdek mante tawh “United Killer of Benetton” ci-in laimai 96 a pha amau company kyawngia na laibu hawmkhia hi.

Alauhuai, a ciziak huai tua limte tawh mipite lungsim a matzawh ding uh hanciam uh hi. Ataktak in Benetton kyawngia te in mipite a lau dingin a lingphawn bek ahi hi. Tua a lauhuai, a dipkuathuai thulelate a ven nading, a lem nading le a bei nadingin a company sum pek khat zong zang kilkel lo hi. Tua thute a kikupna dingin a sum bul sungpan a sumte uh eu khia in patkhiatpih peuhmah lo hi.

Hih a cikziat huai, a lipkhap huai mante mipi tung a lahna a thubulpi in a company vante a khot nading bek ahi hi. Midangte hamsat dongtuakna zangin amau ngah theih ding hamphatna khempeuh bangmah sumlo, piakhialo in a la uh hi lel hi. Benetton company in mipi tungah cikmah in a taksuahloh ding lametnate pia in tuate pen satpiang mutpuaknote bangin a beiziau, a mangziau ding kikhemnate ahi hi.

Tua hi-in Benetton piak lametna tawh kisai in Benetton satpiang mupuakno (Benetton Bubble) cih kammal hong piang khia hi. Apua lampan en pak leng hoih in te kieukiau a, a hoih mahmah a it huai mahmah laitak mah in tamkham in a mangziau satpiang mutpuak note ahi hi.

A zaknop le a takpi

Socrates in tuma kum 2000 val laipek in a buaipih thu in a zaknop le a uphuai ding a thugenna ahi hi. Thuhoih thuman hilo in amau deihna a tung dingin kampau siam suanga thugen mite tawh a kitawng ahi hi. Kampau siamte ii a gen a zaknop thute le thutak ahi thuman kikal ah kigamlakna golpi om hi. Buaina (problem) hi ci-a hong ki-umsak thu tampite pen a a thubul dong va en leng buaina khat ahihna sangin buaina khat ahi ding a a kibawl thu khat peuh na hi thei hi. Ataktak in ii up dinga hong kigen thu tampitakte le tuate hangin ii ngah lametnate pen satpiang mutpuaknote bangin ahoih mahmah laitak in hong mang thei ding tampi om hi. Zam Thuam Ref: Silent Takeover by Global Capitalism