Pasian hileng… Zogam Dream ~ Pau Khat Suan

Pasian hileng, –
1) Zogam ah leitung a zato hoih penpen omsak ning, vanzat kicing leh siavuan siampente omsak ning in mundang gamdangpan mi cina tampi tak in a delh zatopi hoih mahmah hisak ning.

2) Zomi khangthakte leitung a mipil pen ahihna ding leh mundang gamdang pan pilna sin a a kidelhna mun ahi ding in, leitung pilna, Lai Siangtho pilna sinna ding sang hoih penpen, professor minthang penpente omsak ning in Zomi khangno pilna sinnuam peuhmah amawkna in a ut tantan uh sang kahsak ning.

3) Zogam ah communication – lampi, lei, telephone, internet cihte leitung a a hoihpen hisak ning in, mikhempeuh amau’ mawtaw ciat tawh vak hialhial sak ning.

4) Zogam ah sun leh zan in mei leh tui deih zahzah kingah sak ning in, gas tawh kicingtak a anhuan theihna ding omsak ning.

5) Zogam mualdawnte khat le khat leh khua khempeuh, singkung dawn sang a asang zawdeuh, khautung a aluai cable car tawh zom dimdiam in a utte tua tawh khualzin, vanpua thei ding in zom kawikawi ning.

6) Mite’ nasep hun pen nipi kal khat nai 35 sung bek hisak ning. Mite in innkuan a nopsak hun tampi a zattheihna ding mun suaksak ning.

7) Zomi khempeuh in kumkhat in atawmpen kha nih peuhmah annual leave nei a Leitung mun tuamtuam a zin nopna peuhpeuh a zin theihna ding a hun a ngah zihziah thei ding in hun awng tam theithei vaihawm sak ning.

8) Zomi khempeuh Five Star hotel level a kibawl Bungalow vive ah tengsak ning.

9) Zogam ah nek le dawn kicing tak a a omna ding in Zogam a pianglo anteh theipuam a kicing tak in gamdang pan kipuaksak ziahziah ning.

10) Zogam pen Zomite bek hilo, namdang gamdangte nangawn in “nuam taktak ei” acih ngaungau na mun ahi ding in bitna leh daihna a omna mun hisak ning.

11) Mite bek hilo in, gamsate leh huihlak vasate nangawn in nuam asakna mun, bit sa a a tennopna mun ahi ding in gamlak khempeuh nim dildial sak in huih siangtho pen a kidiikna mun hisak ning.

12) Mual le guam khempeuh singkung namkim, a hun zui a a etlawm pak namkim tawh a kizem ding in kipuah sak sitset ning.

Hmmm….

Hihteng a pianna ding in Pasian suah tektek a kisam hia le?

A kisam taktak bel Pasian suah tektek hikei leh kilawm sa ing. I gam ah thu neihna khempeuh nei in, ei’ thuthu in i ut bangbang vaihawm ziauziau thei le’ng hihteng piangthei lel ding hi a….

I kisap taktak.. Zomite’ thuneihna, ei le ei ki ukna leh vaihawmna hi ee mataw..

My Zogam Dream…

Pau Khat Suan