Stephen Hawking tangthu tom ~ Pau Tun Thang

Stephen Hawking tangthu tom ~ Pau Tun Thang

Theoretical Physicist leh Cosmologist minthang mah mah khat ahi Stephen Hawking January 8, 1942 in Oxford khua ah piang hi.A pa Dr. Frank Hawking hi-in a nu Isobel Hawking ahi hi.Amau unau sungah a upa pen ahi hi. Pianpih unau numei nih nei hi. Tua banah a nu leh paten ta pasal khat la(adopt) uh hi. Stephen Hawking a pian khitciangin a khualui uh ahi London ah a innkuan un peemkik uh hi.

Tua lai pan Stephen hong khanglian hi.Stephen Hawkinh kum 1962 in University College, Oxford pan Physics major tawh B.Sc passed hi.Tua pan Oxford nusia in ama’ lunglutna a sin theih nang mun Cambridge University zuan hi.Cambridge University ah Astronomy leh Cosmology sin a, kum 1965 in Ph.D zo hi.

Stephen Hawking in a naupan lai akipan in ‘Amyotrophic Lateral Sclerosis’ kici motor Neurone disease vei hi.Hih pen mihing’ cell leh tha subuai a taksa peng tuam tuam ten a sem thei losak natna ahi hi. Kum 21 a phak in siavuan ten kum 2/3 khawng val nungta zo nawn lo dingin gen uh hi. Tua khitciang pau leh gamtat ding haksa sa sem sem hi.A pei nei tutna ah tuni dong tu thapaai hi.

Kamsiat huai takin kum 1985 in pneumonia natna vei beh zaw lai hi.Tua hangin si dektak phial a, pau thei nawn lo mawk hi.David Mason in Stephen Hawking ading set khuaknei ‘DEC talk DTC01 voice synthesise’ bawlsak hi.Tua set khuak nei pan a thu gen nawpte a mit leh a khut tawh teelin tua set ah a thu gennopte suak zel hi.Kum 2009 kiimkhat pawlin a set khuaknei zat hoih nawn lo ahihmanin set khuaknei a pau thei ‘NeoSpeech’s VoiceText speech synthesiser’ kizangsak kik hi.

Stephen Hawking kum 1965 in Jane Wilde tawh kiteengin tapa 2 leh tanu 1 nei uh hi.A zi Jane tawh kum 1991 in kikhen uh hi.Kum 1995 ciang amah a kem nurse Elaine Mason tawh kiteeng uh hi.Elaine Mason pen set khuak nei a bawlsak David Mason i’ zi lui ahi hi.Kum 2006 ciang Elaine Mason tawh kikhen kik leu leu uh hi.

Stephen Hawking University of Cambridge ah kum 30 vilvel(1979 – 2009) Lucasian Professor of Mathematics ahi hi.Tu in University of Cambridge ah Director of Research at the Institute for Theoretical Cosmology ahi hi.Physics leh Mathematics lam tawh kisai sinna mun tuam tuam ah adviser ahi hi.Leitung misaim ten thudot taak sa uh hi. Albert Einstein sih khit ciangin theoretical Physicist leh Cosmologist thupi pen a kingaihsun Stephen Hawking ahi hi.

Mi pawlkhat bangin Newton leh Einstein te sangin thupi zaw hi, ci liang uh hi.Mi pill eh siamte bek i’ ngah theih pahtawina thupi 15 bang ngah khin hi.Tuate’ lakah ; CH(Order of the companions of Honour),CBE (Commander of the order of the British Empire), FRS (The Royal Society of London for Improving Natural Knowledge), FRSA(List of Fellows of the Royal Society of Arts) te kihel hi.

Stephen Hawking in laibu thupi mah mah 6 gelh khin hi.Tua a laibu gelhte; A brief History of Time (1988), Black Holes and Baby Universes and Other Essays(1993),The Universe in a Nutshell (2001), On the Shoulders of Giants.The Great Works of Physics and Astronomy (2002), A brief History of Time(2005) leh The Grand design (2010) te ahi hi.A laibu masa pen ‘A brief History of Time’ bang leitunga laibu kizuak khia tam pawlin kiciamteh hi.Manglaia kigelh copy 10 millions val kikhawng hi.Pau nam tuam tuam tawh kiletkhia lai hi.

Stephen Hawking pen Aksi si (Black Hole) tungtang sinna ah minthang peuhmah hi.Van tungah aksi a taang thei nawn lo tampi om hih tuak hi.Tua aksi te a sih ciang a neu thei bang pen in tawncip uh ci.Hupna tha nei ahih manin a kiim leh kianga nate khempeuh ama’ lamah hup hi.Khuavaak nangawn hih aksi si(black Hole) pan in taangkhia thei lo hi.Tua ahihmanin mial bik bek a set nangawn tawh muh hak hi.

Mi pil/misaim ten a kiima om aksite tungtawn in thei thei bek uh hi.Aksi site khat leh khat kigawm zel dan in kingaihsun hi.Aksi site sakhal lua ahihmanin samzang cia nangawn gih cihtakin gik hi.Hawking in aksi si kiang naia khuavak zung pai mukhia hi.Tua pen ‘Hawking Radiation’ kici hi.Tuabanah, Einstein i’ General Theory of Relativity leh Super String Theory zang a ‘Big Bang’ pana hong piang ‘Black Hole’ , Quantum Gravity leh theorem dang tampi a sincian leh a hilhcian ahi hi.

Stephen Hawking in a laibu masa pen ‘A brief History of Time’ ah , “Theory hoih (M-Theory/ Theory of Everything) phuankhia thei lehang, Pasian lungsim ngaihsutna kilangthei zah dongin na khatpeuh kikan thei ding hi” cih gelh hi.Tua a laigelh tungtawn in Pasian omtakpi hi cih a um leh kilawm hi.

Ahizongin a laibu nunung pen kum 2010 a kihawmkhia ‘ The Grand Design’ a, a gelh dan leh The Gurdian thukizakna ten a holimpihna ah bel, “Lei leh van pen Science dan in uk hi…Amau thu in hong piang tawm thei hi…Lei leh van pianna ah Pasian va kigawlh khollo ding hi…Science siamna tawh na khempeuh ki telcian thei hi….” cih khawng gen hi.Van gam leh sih khitcianga nuntakna a omding um lo hi.

Khuamial kihta mihingte kinepna bek lel in ngaihsun mawk hi.Hih a thugen pen leitung mun tuam tuam a biakna makai ten dawng uh hi.Khristian biakna bek ahi lo biakna dangte in zong diksa hetlo uh hi.Ahizongin Stephen Hawking a upna ah ding kip in, a ngaihsut ngei mah in thu ngaihsun hi.Tuni dongmah a tutna pai thei ah tu hithiat hi. Pau Tun Thang