Khuado Pawi Thu ~ Dr. Zam Khan Thang

Khuado Pawi Thu (Zomi Festival of Khuado) ~ Rev. Dr. Zam Khan Thang

Thupatna: Zomite’ i tenna, leh i omna kibang loin muntuam gamtuam tek himah tase lehang, i ki batna zong tampi takmah na om sam aa, tuate’ lakah KHUADO cih thu, khat aa-a kihel ahi hi. Hi thu lai tawh gelhkhiat theih nading aa hunpha ahong pia Topa Pasian tungah ka lung adam aa, tua banzomin lai aa gelhkhia ding leh athu aa zong a gen dingin vai ahong ap makai vaihawmte tung leh hi lai a sim mipih sapih akua maciat tungah zong ka lung adam mahmah hi.

I. Khuado Bawlna

Thumong Bang hang aa Zomite’ in Khuado bawl sese i hi hiam? i cih ciangin, na khat peuhpeuh ahi aa, thu khat peuhpeuh ah ahi zongin, athu leh ahang, ahang leh athu cih ana om gige hi aa, alu leh apum a kizom meileng tawh a kibang ahi hi. Tua banzom in “Pianna nei” a kici khempeuh in zong mong khat ciat ana neih uh ahih mah bangin, Tanglai i pu i pate’ in zong thumong kizom thu gentehna ana genna uh ah, “Phulum phul nang leikha in petlet” cih ahi zongin,” Ei pat hilo, akpi pat” cih bangin thu sutna leh thu genna te na-na nei uh hi. Tua hi aa, KHUADO i cih zong tu khanghun ciangaa ki phuantawm aa kibawl hilo in, Tanglai ei Zomite’ pu leh pa te’n maabang ana patsa uh a ban a zom te’ i hi hi. Pu leh Pate’ hunlai in khua ana do ding uh ciangin KHUABAWL cih na nei masa phot uh aa, tua meizom in kha (6) kihal in KHUADO cih ana bawl uhhi. Hi pen KHUADO bawlna tawh kisai ii thumong ahi hi.

A. Khuabawlna thu

Khuadona thu i gen theihna dingin Khuabawlna thu i sutphot kul aa, hi thute’ tawh kisai-in, tanglai i pu leh i pa te’ tenna ahi Kawl gam huam Khamtung gam pen, lokhawh, singpuak nasep bulphuh in nuntak nading sem in, zong in a ki khuasa, minamte’ ki hi phadiak a hih na tawh kizui-in, lothak zongin, lotul hahin, lopawi in khaici kituh aa, tua meizom in, khuahun hoih nading, guahtui hoih nading, kumpha in anpo tuak aa, an hau aa, lungdamna tawh anlak lawm bawl theih nading cih ngimna leh lunggulhna tawh khuazangbup kigawm in lungsim takpi tawh “Tual” biakpiakna na bawl uh aa, hi thu te’ hangin “Khuabawl” cih leh “Tualbawl” cih thute ahong piang ahi hi. Thu dang khat in gen ni cileng, a lauhuai sapite leh dawi gilo kau gilo, gulsia tangsia, ngia leh vompi sahang, pulnatna cihte’ in a nawkkhak loh na dingin, tanglai pu leh pa te in khuasiam khaina ana bawlna uh hi cileng zong kikhiallo dinghi. (1)

B. Tual biakna mun leh a dan

Khuazangbup, lopawi siangkhin, khaici tuh a ki mankhit phet in “Khuabawl” kipan pah lian aa, Khuabawl a masa ni pen “Tual Bawl Ni” na ci uh hi. “Tual” bawlna ah Khua Siampupipa makai in, khua hausapa leh khuasung aa beh om zahzah sungpan beh lutang teng (ahih kei leh ) beh Tulpi ( tultawi ) teng tawh “Tual” biakpiakna ding mun zuanin “Tual” bawlna na-na nei uh hi. “Tual” biakpiak nading mun tawh kisai-in, khua laizang, amun hoih, amun nuam, a zang tamna mun khat kitel hi. Biakpiakna tau aa zat dingin, kiu-li nei a kisui suangpekpi khat hi aa, a ngak nadingin a kikim, a kitang, suangzawl mal-li sui-in, kiptakin a kiphuh khit teh tua suang khe li nei tungah “Tual” biakpiakna aa kizang ding suangpekpi a zangtam kim in nga in kiphah hi. Tua zawh ciangin, guahtui leh khuahun akem, khuasiam- losiam dawimang tawh kilemna a om theihna dingin mai-et in, thoih bawlna na-na nei uh hi.

Tua banzom in, lopawina aa-a kituh khaicite’ ganhing gilo te’n akhel loh nading, an gui leh an gapte’ a havang gawp loh nading, leh innsa gamsa te in ankungte’ tungah a tatsiat loh nading, an po tuakin tuk an, khal an ki hau aa, khuado anlak lawm, lungdam tak aa-a kibawl zawh nading cih thu teng bulphuh in, khuazangbup ki thutuak in lungsim takpi tawh thupha ngen aa, thupha dawhna tanglai i pu i pa te’ in hi ci bangin ana bawlna uh tungtawn in “Khuabawl” “Tual” biakpiakna cih thute ana om ahi hi. Hih “Tual” biakpiakna thu pen khuazangbup tawh a kisai ahih manin, a kisam van zat dingte leh a bei a heu ding zu leh sa te khuazangbup mah kikum kihuai in, kibawl hi. “Tual” bawlna ahih kei leh “Tual” biakpiakna a kibawl ciangin, khuasiam, losiam thunei hi ci aa tanglai i pu i pa te’ in a na up uh, dawimang ana thoih uh ciangin, anuai aa van leh na te’”Tual” biakpiakna ding suangpekpi tungah koihin lui uh aa, thupha ngenin phuisamna na nei uh hi.

Tungman tawh a kibawl –

• a. Nupa kopkhat lim
• b. Taiteh guansa zubel lim no khat
• c. Sial lim 30,60,100 ciang
• d. Saiha lim tawh a kibang khat
• e. Lokhawhna aa kizang tutang tang (2) lim
• f. Khuangneu lim khat
• g. Dakkop bu khat lim
• h. Zam tawh kibang lim khat
• i. A kisai thei ding dan aa kibawl suangzawl hilhial (2) lim
• j. Sialki lim khat
• k. Gamsaikeu nang tawh kigak lom (5) (buan tawh kibawl hilo)
• l. Khipi tang khat (buan tawh kibawl hilo)

Atung aa teng “Tual” biakpiakna suangpekpi tungah alomlom in kikoih lingleng in, khua Siampupipa in hai bil nei sungaa om tui siangtho a kam ah muam in biakpiakna aa gan go ding te’ tungah phih phot in, tua zawh ciangin phuisamna kipan hi.

C. Phuisamna dan Khua

Siampupipa in gamsung teng aa om mun min, mual min, gam min, lui min, ken min, gun min teng pulak in a banban in a min alawh khit ciangin dawite’ piak ding aa kikoih van nam (12) teng a min in sut leuleu in, tua zawh ciangin deih ngetna tawh kisai-in, Khuasung tuisung ah gal leh sa, gilkial dangtak leh thusia lasia a omloh nading, gamsa tampi man in, innsa tampi khawi theih, gulh theih nading, pumpi cidam thahat ciat in mimza, tangza ai in, gal (2) leh sa ai zo aa, sialkop go in ton leh aih gualnop lungdamna tawh a kidim theih nading cih thu te asut agen khit ciangin, “Tual” biakpiakna pan in ciah uh aa, a gan gawh ding uh vok kai in, khua hausa pa’ inn, ahih kei leh a beh zui-in beh lutang (beh tultawi) te inn tungkhawm uh aa, thupha lakna phuisamna a kizang tui tawh a gan gawh ding uh buak in go uh hi.

Vok man dingin khuazangbup lawhta khat tek an kidong uh aa, ”Tual” biakpiakna aa zat ding zu zong lawhta khat tek mah kidong uh hi. Tua zawh ciangin asa uh tuihuan in taksih nganhuan tawh meh uh hi. Amau te sung pan khat pa makai in, “ Man ei, man ei, man khai lawm ei ” ci-in awng aa, alangkhat lam pan aa makai khat mahin, “Bual ei, bual ei, sabual ei, bual ei ”ci-in kidawng thuk uh a, gualnuam takin an, zu leh sa nekhawm dawnkhawm in, “Tual” biakpiakna vaikhitna hici bangin ana kibawl ahi hi.

“Tual” biakpiak ni a zingciang pen lo ki kuanlo, anteh theipuam ki siklo, kilo lo, leitang tungah tuma heima ngalo, nopna dahna tawh kisai-in gamlumna bawllo, khuang leh zam te tumlo, misi a om leh tua ni in ki vui saklo cih bangin zehtanna nei uh hi. Zehphi a om leh guahtui hoihlo pah, lo lai ankung te ah ganhing gilo te’ bawlsiatna tung, zawng khawng ngal khawng laang mahmah in, khuasung ki damlo in pulnatna leh natna tuamtuamte in nawk in, khuasung thusia lasia piangin buaina tawh kidim thei hi. Tua ahih man in zehphi a om leh “Tual” biakna aa-a bei khempeuh lohsak in “Tual” biakna bawlpha kik uh hi.

I pu i pa te in “Tual” bawlin “Tual” biakpiakna a neih uh ciangin na-na limbawl pha mahmah in zong na zahtak bawl uh hi. Kidawm takin na gamta uh hi. Kamsia, kamhoihlo, leh ciammuih cihte na-na zanglo uh hi. Biakpiakna dan pen ahi ding bangin biakpiakna man lim ding pua in biakna paaina na bawl uh hi. I pu i pate’ in dawite pen kensia, ngawksia, luikawm, guamkawm, mualsang dawn, tuili thukna sung, ciklak leh taamlak khawngah om hi ci-in ngaihsun uh ahih man in, amun amual min teng banlawhin phuisamna na bawl uh a, gamsate zong dawi khawi in na ngaihsun uh ahih man in, thang a siah uh ciangin, ganhing gilo, a thumang lo, a phengphi, a mittaw, a khelbai a cidamlo cih te a piakloh nadingun thuumbawl in phuisamna na nei uh hi. I pu i pa te in biakpiaknate na zangkhai ngaihsut hetlo uh aa, thupi ngaihsutna tawh biakpiakna na bawl in, neihgil, lamgil tengmah a namnam in sit neilo in tungmanlim tawh bawl in biakpiak na tau aa luina piakkhiatna tawh dawimang mai et in thoih bawlna tawh thupha na dawh uh hi.

D. Sialsawm thu

Tanglai i pu i pa te in hi ci bangin “Tual” biakpiakna tawh “Tual” bawlna a mankhit uh ciangin, “Tualbawl” kha huamsung mahin khuasung sabeng siamte makai-in sawngbeng ding ahih kei leh sabeng dingin gamsungah kuankhia uh hi. Sabengaa-a kuan uh ciangin sa kap ding leh sa tanghawl ding zong mi sehsa in nei uh hi. Sialsawm cih bulphuhna thu tawh kizui-in, sabet (or) sawngbet na ah, zangsial kikawng (a ki taatngil khinsa) mat zawh nading cih bulphuh pah uh hi. Tua banzom in, sai ha paak, ngal ha paak mat zawh nading na hanciam thuah uh hi. Gamsa dangte zong sa aih cianga, minlawhna aa helding sutding in beng thuah lai uh hi. Huih lak aa leng ganhingte sung panin, va phual, va luk cihte zong na thupi ngaihsut uh hi.

I pu i pa te’n nopna dahna te ah, a kikawng ka kap, a ha paak kakap, a tailai ka kap, tung aa leng ka kap cih bangin minsialna leh han lasaknate in na-na zangpah uh hi. Sabeng aa-a gamkuan hunsung uh pen nipi khat sung bang sawt thei hamtang hi. Sabengte a tun kikuh ciangin a samat peuhpeuh uh tawh khuamual panin sa mualsuah ci-in a tawmpen thau lawng thum lawnin sa na mual – suah uh hi. Sa mualsuahna ah tangzu dawnkai tawh a kikhaih umtong sungah thun in, sa (3) mual- suah dawnna in na-na zang uh hi. Sa mante leh sabeng aa kuan teng bantulh in khuamual ah tawmvei sung tawlnga uh hi.

Sa man khat bek ahih leh sa man pa beh leh phung teng leh a gimnam a huaiham teng tawh khuathawng thu aa-abu theilo, atai theilo ding teng in Sawngbengte’ vaitutna Sawngzu kiluup in Sawnghun sungah,“Sawngpi ka kap ni-in ka guallai ah a thang masa kei hing ee ”ci-in Sawngla kisa in Sawngsik in ki lam ziahziah hi. Vaitutna aa pai khempeuh ading a samat uh sempahin sa tan khat tek kipia hi. Sialsawm bawl hun huamsung aa samante khanglui lai pu leh pate in min na phuah uh aa, Sawngman na ci uh hi. Sialsawm bawl na te ah i pu i pate, beh leh phung, u leh nau, khua leh tui tawh na ki-uap diamdiam uh hi.

E. Lawm’ annek thu

Khuabawl “Tual” biakpiakna zomin Sawng kibengaa tua hunsung mah in Lawm’ an nekkhopna ki nei hi. Hi ci bangin tanglai i pu i pa te’ in a banban in a kizom diudeu in zuih leh bawl na-na nei uh hi. Lawm’ annek pen khuazang buppi munkhat ah ki gawnkhawm aa an nekkhopna bawlna dan hilo hi. Lopawi khit tawl om hunsung aa kibawl annek “Lawm’” pen a diakdiak in beh leh phung, u leh nau, tu leh ta, sung leh mak tawh abawngbawnga, ki gawmkhawm aa, itna ankuang umkhopna hun hi pha pen hi.

Lawm’ annek hun ciangin khualzin gamvakte zong innlam ciah theih nading hanciam tek uha, u leh nau sung a tek a khang thupha kibawl in thupha piakna zong kinei hi. Lawm’ annek ciang aa annek tuidawn ding tawh kisai-in, lawm’vok ci-in kumkhat huamsung vok kigulh ngiat hi. U leh nau a tamna leh a tawmna tawh ki zui-in vok kikhawi aa, lamet hetloh aa lemlohna khat a om zenzen leh a khawi agul ding aa ki seh te vaihawm dingin vaipuak kipia hi. Dawn ding zu zong sakholhsa in ki koih phitphet hi.

Lawm’ annek pen pansik ni, a pi ni leh khekleh ni cih bangin thu thum in khen in ankuang umkhopna ki nei hi. Lawm’ an nekhawm dingte sungah sa man a om leh a samat sa Lawm’ annek pansik ni Lawm’sa dingin kizang hi. Sa man a om kei aleh lawm’vok kigo in sa sungthau kisol in ki gepbawl aa, nahtangum leh paakngiam tawh hel in sa ngoi ki thun hi. A sadang teng ki tuihuan in zaupan ahih kei leh tangman be tawh kihel a ki nganhuan taksih tawh kimeh hi. Taksih a kinek ciangin khut tawh ki lom liuleu in ki tawnnek hikhiak hi. A pini in zong lawm’vok mah kigo leuleu aa, a ni masa ni aa bang mahin taksih nganhuan mah tawh kimeh hi.

A khekleh ni ciangin, sa lupang teng leh sa sungkua pawl khat leh a ni masa ni te aa – inntek sakhai aa-a kibawl teng tawh gawm in khekleh ni Lawm’ annek in kizang hi. It leh ngaih teng kisam in lengla annek pihna in zong kizang hi. Khualzin gamvak a nawkkha a om leh kisam in lawm’ an lawm’ sa ki nesak hi. Hi hunsung in daihawh ci- in hanmual lam ah ki pai in a sisa te zu leh sa va kipuak in a luguhte uh sathau tawh zut in an leh sate va lui uh hi. Tanglai pu te pate’ lai in hanbuk ci in siluang sial na nei uh aa, a guh teng a ki teeikhiat khit ciangin hanbuk sungah misi luguh te kemin senbawl uh hi. Tua hi aa, han lam tawh kisai vaikhat peuhpeuh a nei nuamte adingin bangmah haksatna omlo in sem thei bawl thei ziauziau uh hi.

II. Khuado Bawlna Thu

Khanglui pu leh pa te’ in thu ana sut, ana gen uh ciangin, annek tuidawn, nikten puansilh, zu hai sabaak ci-in thu guuicing kammallom a zatna uh tawh kizui-in, KHUADO pen KHUABAWL thu tawk kizom aa, KHUABAWL pen KHUADO thu tawh ki pehlawh in ki me- mat hi. KHUABAWL pen lopawi in, khaici a ki tuhkhit zawh teh khuahun hoih in anpo tuak aa, an hau in lungdamna tawh anlak lawm’ bawl zawh nading aa, khuasiam losiam dawimangte mai et in thoih aa pawlbawlna hi aa, KHUADO cih leuleu ciangin khawhsa an ki lakhin in (4) ansang zong ki kaikhawm khinzo ta aa, nek ding bek aa-a baihsa aa-a om ante dawi gilo leh kau gilote ina nek pihlohna ding leh an laak lawm’ bawl hunsung cinat lunat genvai a om loh nading lunggulhna in dawi gilo, kau gilote’ notkhia hawlkhia in, khuazangbup khua siansuahna bawlin anlaak lungdamkoh neklawm’ bawlna ahi hi.

III. Khuado Bawl Dan

Khuado bawl dan tawh kisai in, khangluite’ in “Sawmkhat leh gualkhat” ci-in thu gentehna ana neihna uh tawh kizui-in, tangval khangual kikhankim teng leh sawmupa aa a kisehte’ makaihna tawh, khuakhat sungah giahkhop khawlhkhopna “Sawm” cih mun nih mun thum bangah kinei thei hi.Khuado lawm hunsung leh khuathawng thute’ah amaute’ mah nasem silbawl vaiding zat tangzangin kinei hi. Hi thute’ pen ngeina lui hunsungte’ tawh a kisai hipha diak hi. KHUADO bawl dan tawh kisai-in, khanglui lai i pu leh i pate’ in anuai aa thu pawlkhatte’ tawh kizawitawn in KHUADO anlaak lawm na-na bawl uh hi:

A. Kigin ni:

Khuado anlak lawm’ bawl ding ciangin meilah kisat aa tua ni pen Kigin ni kici hi. A banzom in tuinak ki hah in tui lam kisial ki hah hi. Khua khat leh khua khat kikawmna lampi lopate kiakte kivat in ki hah hi. Khuasung kongzingte zong ki hah hi. Huanlak dailak kivat in ki hah hi. Khuado hunsung aa sa em nang leh khuai hal na ding aa zat ding sing selkeu leh gamsai selkeu khawmin, naangtawh hen in a lomlom in a baihsa in koih uh hi. Innsung, innnuai, innlim, pialkhang, gulhtawng, sumtawng, inntual dongin ki hahsiangin siansuahna ki bawl hi. Khuamual nei te’n khuamual hahna zong bawl uh hi. Han zong kipuah aa, “ A si kha aw – a hing kha aw hong ciah un, zu leh sa ne ding hihang” ci-in kha sapna zong nei uh hi.

B. Khuai laak ni:

Khuado anlaak lawm’ bawlna dingin khuailaakna zong kinei aa, khuai nam tampi a om te sung pan ngaltun leh khuaithum cihte khuai laakna in kizang hi. Khuai dangdangte pen khuai-aihna aa zat ding leh khuai lasak ciang aa minlawhna aa hel leh khuaizu nek dingin kila in kikhawi hi. Khuado hun a tunma kha nih sap kim pawl in khuai zong dingte kuankhia uh aa, a muh nini un a singkung aphung meet, ahih kei leh, lopadawn pawlkhat kaikhawmin tumzial vilvel in, ciangkang khat tawh a khuai omna kawksak in tua bangin ciaptehna bawl uh aa, khuai laak hun a tunni mateng kuama’n bangmah kicihsak se loin ki tuaci koihsak hi.

Khuai laakna a ki bawlna a deihna pen : thu khatna ah : Aituam ahi aa, Sawmlawm’ tawh ahi zongin, khuai ai’ nuam te in, khuai laakna bawl loin khuai ki-ai thei lo ahih manin khuai laakna bawl, thu nihna ah: Khanglui lai-in, khuai laakna a kibawl ciangin, hun khat peuhpeuh in laziau mawk loin, upna leh zuihna a kibang lahna in khuado anlaak lawm’ bawl hun tek mahin khuai laakna bawl, thu thumna ah : Khuaibu sung khuaino tawh kidim in, a taksuak hun pen, anlaak lawm’ bawl KHUADO hunsung ahih manin, tua hunsung tek mahin khuai laakna kibawl, thu lina ah: KHUADO annek lawm bawlna ah khuainote vokthau tawh sol bawlin taksih nganhuan tawh mehkhop ding ngaihsutna in, KHUADO hunsung in khuailaakna kibawl aa, thu ngana ah : Khuai la in khuai-aih bawlna pen, khuai-aite’ a sih uh ciangin, siluang bawm ding thovaite’ khuaite’ in betkhiatsak in siluang hu ding cih ngimna leh ngaihsutna ahi hi. Khuai-aite’ a sih uh ciangin, “Kha ka pham ciang vaitho hung ding vahkhuai nangma thu hi aw” ci-in khuaila nangawnin kisa hi.

Khuai laak hun pen khuamui-sanggam melmak hun khawng pawlin kipan uh aa, Khuaibu la dingte va pai in, puan tawh khuaibu atuam khit uh teh a singhiang khiaktan in khuai laak bawl kipat na ding mun khuamual va tun uh hi. Khuamual pan in khuai puapa masa in, tua zom in daktal tum, sialki tum, zam tum, khuang tumte madawk in pai uh aa, khuangtumpa zomin phit tumte, tua meizom in mipi a om zahzah in zom in phit tum kawmin a lamsa in khua mual pan in khuado lawm’ bawlna ding inn lam zuan uh hi. Phit tum te in atak lam khut uh tawh phit mut in, avei lam khut uh tawh meilah de uh hi.

Mipi in khuai khau a kici khuai laak ciang aaa kizang khauhual sau khat avei lam khut uh tawh len dimdiam uh aa, atak lam khut un meilah de uh hi. A kihal dan uh zong kikim sak dimdiam uh aa, etlawm in nopci mahmah hi. Khuai laak dawn, inn aa-a om te in, zubeel gual in tuileihsa in koih phingpheng uh aa, khuai laa te a tun uh ciangin, sialkong suak masasa zukhaihtaak tawh na dawn in zu ban tulh uh hi. Tawlkhat sung a phit lam khit uh ciangin, zu beeltung leihsa teng a milip un gualdawn in tua zawh ciangin lamvui zomin Khuado la leh khuai late sa in zanhak uh aa, zan khuasawt in leidimte khuang ci-in zan hunsung bang tomlua sa in bei baihlua sa uh hi.

C. Pansik ni:

Khanglui lai i pu i pa te in Pansik ni pen dawi leh kau hawlkhiatna in na zang uh hi. Thobaih in zingsang tung in kau hawlkhiatna bawl uh hi. Kau a hawlkhiat uh ciangin, ”Dawihang ciah oo, Kauhang ciah oo, na zun na eek namsia ei, na ni cing ei, na kha cing ei, na khualam zuan oo” ci-in meilah de kawm in, tu ga hei ga tawh bangsak bangkhang teng sat in dawi leh kau nawhkhiatna leh hawlkhiatna bawl uh hi. Sangkil a tun uh ciangin, a tunga a heiga te uh a pheilam’ koih in, Sangkil denna uh aa, thau nei ten thau lawn in kap bawl uh hi. Hi thute i ngaihsut tak ciangin, Tanglai i pu leh i pa te pen dawi a na mai et, a na thoih bawl, a na pawlbawl te’ bek na hi uh aa, a na bia, a na paaite’ hi hetlo uh hi cih kimu thei hi.

Lungdamna leh nuamna vai aa dingin thupha lakna leh thupha dawh na in dawi na mai et, na thoih in, a na pawlbawlna hi bek uh aa, thupha sansa annek tuidawn, cidam ludamna leh neihsa nate tungah nektum sak kik in a beisak a heusak ding, lunggim sintawlna a piansak lohna dingin dawi leh kau na notkhia, na hawlkhia uh hi. Tua hi aa, Tanglai i pu i pa te’ ii a na biak a na paai taktak uh pen, mel aa ki mulo, a min aa lawh theih loh dawi sang aa-a vanglianzaw ( KHAT ) na hi zaw gige hi. Dawi leh kau te a na pawlbawl hun khat a na neih sam uh hangin, dawi gilo, kau gilo ci-in, na not khia, na hawlkhia in, kha galdona na-na nei uh hi.

D. A pi ni:

Pansik ni a zingciang, zingsang lam ni vaihamsan ciangin, lawm’papite’in Lawm’vok go in, sa ngoi thun kawmkawm in sa ngoi bawl zu dawn uh aa, tua zawh ciangin, ki-um lingleng in Lawm’sa sem uh hi. Nupite’ in, a innciat uh ah taksih nganhuan uh hi. Khuado hunsung aa-a kizang dak, zam leh khuangte’ sasi nuh in nisa ah phokeu uh hi. Sawm’lawm’ pawlkhat te’ amau tawh a kisai khuamual ah vapai in mualsuang, singmilim te va puah va zun in mual hahna va nei uh hi. Nikai lam ciangin nupite’ zu leh sa tawh daihawh in pai uh aa, a sisa a innkuanpihte’ uh lu guhte’ sathau nilh in, an, zu leh sa te’ va lui uh hi. Nitak lam sialhawl hun pawl ciangin, Sawm’ lawm’ sung aa, papi a khangham pen in zu kamkhat teep in phih aa, phuisamna aneih khit ciangin, abanban in gual teepsak aa, tua zawh ciangin, Lawm’ an leh Lawm’ sa lui-in, sakuang nam nih in khen uh hi.

Lawm’ papi sasem te in vok khawite’ leh a khawilote’ aa ding a khen ma in, amau teng kham ding khenkhia uh aa, tua pen “sakuang balnek” kici in, vok khawite leh adangte’ ading aa a langhawm sa pen “sakuang hawm” kici aa, amau aituam ading aa kipia ahih manin amau deih bangbang in zek thei uh hi. Hi hunsungin sa ngoi leh sa ngawng kibakin nuam kisa mahmah uh hi. Anlaak lawm’ bawl ankuang kikhit zawh ciangin, zu hawm uh aa, nupi, papi, nungak tangval ahi zo zahzah lamvui nei dingin kithawi khengkhang uh hi. Do na lingling cih khuado la,Thang Ho la,Heisa La,Khuai late sa in,zu kitulh in a kitawng a kisel cih bang om se loin, an nekhawm, zu dawnkhawm in kigualnop suahin om uh hi.

E. Khekleh ni:

KHUADO khekleh ni pen A Pi Ni aa bang mahin, vok go in, zu leh sa tawh, taksih nganhuan mah tawh kimeh hi. Zingsang lam teng ihmut tawlngakna in zangin, sun an leh nitak an nekkhit sanggam melmak hun pawl a kipan in dak tum dak lam in, tua meizom in lamvui kinei aa, khuado la, khuai la, cih te a kipan la gualnuam tampi kisa in ki zanhak in kilam ngelhngelh hi.

F. Khuai- aih ni:

KHUADO hunsung mah in Khuai-aihna zong kinei aa, vok, keel, aak cih te’ zangin khuai ki-ai hi. Khuai laakte’ halin, khuaibu ki sukham in kivel aa, kumsia ding maw , kumpha ding cih Khuainote’ pianzia en in thuphuan nei uh hi. Khuainote cidam thahat aa-a om leh an kihau in ki cidam ding, khuaino si peuh a om leh asi ana om ding cihbangin i pu i pa te-in thucin na-na nei uh hi. Khuainote vokthau’ tawh sol in, zu leh taksih nganhuan tawh meh uh hi.

Hi ci bangin, an, zu leh sa, nekhawm dawnkhawm kawmkawm mahin, lasa in lamkhawm ziahziah uhhi. Kumkhat in khatvei bek kibawl ahih manin KHUADO kal ding ngaklahin ki om ciat hi. KHUADO bawl vai tawh kisai-in, tu khangthak hun ciangin,khuasung “Sawm” cih zong kinei zo nawn mel loin, a thu leh amun amual zui-in, zu, khuaino vokthau tawh kan, taksih nganhuan cihte tangin, niangtui, avot singtui,bawngsa, voksa, aksa leh ngasa kaikuang meh bawlin, buhsih mah kitam zat pen aa, minam puante’ silhin, ngeina lam pawl khat lahna tawh ki tukhawm ki khawlkhawm aa, itna ankuang lui-in, Topa Pasian tungah lungdam kohna tawh nekhawm dawnkhawm in KHUADO lawm thu nuamtakin kibawl hi.

Thukhupna

Tanglai i pu leh i pate’ hun pan tu khang dongin ei Zomite’ sungah kumsimin kum kibengletin mihon kilomkhat aa gualnop annek “Lawm’ ”nihvei kinei aa, Khuabawl Sialsawm annek lawm leh anlaak khuado annek lawm’te ahi hi. A masa zaw “Lawm’ ” pen lopawi khaici tuhkhit tawl om hunsung ( Dopi ) kha aa kibawl hi aa, a kik “Lawm’ ” pen anlaak khit tawl om hunsung ( Phal ) kha aa kibawl ahi hi. I pu leh i pate’ ii zia leh tongte’ i etkik tak ciangin, biakna leh ngeina kiciantak aa- ana nei, thukhun leh thuciin kician tak tawh ana kalsuante’na hi uh aa, ahih na khempeuh uh ah thu kitukalh cih bang omlo hi.

Amaute in a biak a siam uh na mangngilh ngeiloin na zahtak bawl uh hi. Tua thute tawh kizomin, ei Zomite in lopawi khaici tuhkhit ahi aa, anlaak khit ahi zongin “Lawm’ ” thu tawh kisai pen tuni ciang dong, a kikhel bangmah om nai hetlo hi. Zomite’ adingin hih “Lawm” thu pen a thupi mahmah leh a manpha mahmah khat hi aa, thu khengval aa mihon khawlkhopna (Unlawful Assembly) nam hilo hi. Kuama kimin zat ding aa a na neihkhakloh uh, tanglai i pu leh i pate pan aa ei Zomite bek in i neih leh i zat ahih manin, Zomite leh “Lawm’ ” cih pen a kikhen thei hetlo ding thu ahi hi.

A thu aa nialbawl himhim cih pen thakhat thu in pasan sialnek bang aa- a tungpah pawl nam ahih samloh hang, hun saupi ahuam ding, mihingte’ khangsimna tawh a kipehlawh ahih lam phawkin thu saupi khualna tawh a gamta, a kampau, a kikhuasa minamte i hih ding pen thupi mahmah ding hi. Zomite’ sung aa gamtatna leh ki-itna tawh a kihualkhawm leh a kilomkhawm ahi (Social Ethics leh Social Love Feast) tangpi tawh sa bang aa tatkhopna, leh itna ankuang umkhop theihna siamna citciat zong sumgum bang aa i minam in anei gige i hih lam zong phawk ciat ni. Thu limci, thu namtui tawh kikhuasa in vai masuante toibawl, neusek loin, tangzai sak ni. Biakna leh ngeina tui bang aa-a luang khawm helhel thute i zangkhai ngaihsut khakloh ding zong pen thupi mahmah dingin ka um hi. Mi namdangte’ biakna leh ngeinate i zuihpih i neihpih ding zong omkha mah ding aa, tua mah bangin, eima biakna leh ngeinate zong minam dangte in a hong theihpih tham ding dinmun i neih ding zong ki sam pha mahmah kha ding hi.

Mi namdang te aa bek zuihpih ding i sawm kei ding aa, ei aa zong bang hiam cih a thupitna leh a manphatna a lakkhia thei lam ding in zong ma i pang ding hi. “Pasian hangin eite’ piangin, hingin, i gamtang hi”( Sawl.17:28 ) ci-in Pasian kammal sungah a kigenna a om mah bangin, i hinna leh i tatna, i hekna thu vannuai huamkhawmin eite a hong piangsak Pasian tawh a kisailo, a kipehlawhlo ding leh a pengthei ding khat zong omlo ding aa, tua mah bangin mihing leh mihing kizopna lam pan in zong “Sing abul pan lok leng adawn ki ling ding”cih gentehna thu ana omna tawh kizui-in, sabang aa i tatkhopna hih leitungah eite i nuntakna leh i ki khuasak nate limtakin lungngai leng, “Mimal khat leh tuikulh khat” cih bang dan aa kim leh paam tawh ki mematna neilo liang aa kikhuasa veuvau mawk cih bang dan zong lah ahi khin samlo deuh ding leh “Suangpi suangneu in thek” cih bang dan aa, mimal, minam, gam khat leh gam khat kizom kipeh diudeu in hih leitung thu leh vaite’ a kihei, a kipeipei hi zaw ahih lamtak i phawk kimciat na dingin zong tha kipia in, i ki hanthawn nuam hi. Ei Zomite’ in adung leh avai kigawm (Vertical leh Horizontal) ahi Pasian tawh kizopna leh mihing leh mihing kizopna nuntakna tawh kisai a manpha mahmah Pasian kammal pan aa-a hong pai thu, bul lakin lungnemna tawh thukhual picinna kung lam zuan in, masuan limci, maban limci a neikimciat minamte ahi dingin, i tunna ciangciang panin manawt ciat ni. Rev. Dr. Zam Khan Thang (LL.B, M.Th, Th.D)