Spain leh Portugal ah gamsung meikatna hangin mi 45 in sihlawhkhin

Spain leh Portugal ah gamsung meikatna hangin mi 45 in sihlawhkhin

Spain leh Portugal gamnih pen agam akizomlian, aki gamgi ahihi. Hih Spain leh Portugal te gamsung gamlak tengah abeisa Weekend sung akipan gammeikang Wildfire nasia mahmah in, mi 45 bangin sihlawhkhin cih AFP pan kiza hi.

Portugal gamsung ah asi tamzaw a, akigam in mi 41 sikhin hi. Spain gamsung ahzong mi 4 mah sikhin ahih manin, akigawm in mi 45 takin sihlawhkhin uh a, innlelo tampitak zong meikuang in kangtumkhin hi.

Tuesday (October 17) zanlam in guahzu ahih manin meikuangpen phatuam zawdeuh a, meiphelh Firefighters te nasepzong tampi noptuam hi.

Portugal’s Civil Protection Agency te genkhiatna ah amau gamsung bekbek ahzong meikuangpi mun 15 bangah omkhin a, ahi zongin akiphelhzolam hizawta cihi. Ahi zongin asi pen kibehlap toto ahih manin, ki lunghimawh mahmah hi.

Misi pen akigawm in 37 panin 41 ah hong khangto tamawk hi ci’n Portugal’s Civil Protection Agency panin Spokeswoman Patricia Gaspar in genkhia hi. Hih Portugal gamsung misi te lakah khakha aphapan naupangno khatzong kihel ahih manin, ki khasiat phadiak hi.

Asi hizah banah aliamzong akigawm in mi 71 bang phakhin hi. Tualak ah mi 16 tepen gimngawh phadiak mahmah uhhi. Tualo adang mi 1 zong mangcip in kimuzo nailo hi.

Portugal kumpi thunei te’n hih asi te dahpihna in ni 3 sung dahna kahna hun ci’n pulak uhhi.

Asi atamzaw pen amauzat mawtaw sungah akanglum kici a, ahi zongin pawlkhat innsung ah aomlaitak in akangtum zong omhi ci’n Jose Carlos Alexandrino in genkhia hi. Khuasung khempeuh meikuang, meikhu tahw kidimcip cihi.

Spain gam ii Westernmost Province pen Portugal gamtawh akizompah hi a, tualai ahzong abeisa Sunday ni akipan gamsung meikatna hangin mi 4 takin asihlawh ahihi. Gamsung meikat laitak in Hurricane Ophelia kici huihpi in nawksawnsawn ahih manin, meikuangpen thakhauhsak semsem hi.

Video: ‘Over 30 dead’ as wildfires rage in Portugal and Spain

Spain gamsung ah asi anunung akiza pen kum 70 aphakhin puteekkhat kici a, Monday ni in tuipinawl khuakhat ahi Vigo khua panin asi ahihi. Tuesday ni ciangin guahzukna tawh gamsung meikang pen phatuam zawdeuh hi ci’n kumpi thunei te’n genkhia uhhi.

Spain gamsung ah abeisa June khasung inzong gamsung meikang nasia mahmahkhat piangngei a, tuahunlai in mi 64 takin sihlawh uhhi. Tuapen Spain gam ii meikang lakah asi atampen khatinzong aki ciamteh ahihi.

Related: USA, California gamsung meikang hangin asi mi 40 phatota

Tusungteng gamsung meikang kilimzak mahmah hi. USA, California State sungahzong abeisa kalsung akipan gamsung meikang Wildfire nasia mahmah in, mi 40 val bangin sihlawhkhin cih kiza hi. Lenggahzu akibawlna Winemaking Area ahi Napa, Sonoma sungteng ah natkat mahmah a, California State ii ahuaisiapen Deadliest inzong akiciamteh ahihi. Sawltak #zomidaily