Na Pan Mun Bang?

Na Pan Mun Bang?

Na it takpi leh lak in, na vei takpi leh sem in, tha na piak nop takpi leh huh in cihpen dik khinlo hi. Tam asemzo ten minam it deuh uh cihna hilo a, tawm a sem ten minam it lo deuh cihna hilo hi. Ei sep theina ciat panin minam itna veina ki neih ciat aa, ei sepzawh bang ei piak zawh bang a piazolo aom ciangin minam it lo in mu pahpah ken.

A semzo a ne zo, a pil deuh a ki zangh theideuh mi na hihleh mi hampha na hihi. Na sep theina pen ki selhpih kha ken, a tuam giat in nang hong bawl PA in a deihna khat om in hong piangsak hizaw hi.

Minam ading pan mun tuamtuam te in:
Lai pilna tawh minam adingin a ki zangh thei pawl om ding…
Sum leh paai tawh a huh a panpih pawl khat om ding…
Khuak ciimna tawh minam ading pan a la pawl om ding…
Kamtawh minam ading nasepte tha a pia pawl om ding…
Phunlo paulo in makaite thu amang pawl om ding….
Thungetna tawh minam ading pan a la pawl om ding…
A phunphun a hanghang tawh minam ading pan a la pawl om ding…
Thatang pumpi bek tawh a sem ciatciat pawl om ding…
A semten ahoih tak in semmaw semlo ci-in a en cik pawl om ding…
A innkuan, a khua sung ciang bek tawh minam ading a ki zangh thei pawl om ding…
Lawhcing ta keileh citak tak in minam ading a sem pawl om ding…
Mai a te cih bangbang ci-in a zui pawl om ding…
Veina veilohna lah neihse lo a om hithit pawl om ding….
Ko sem ung, pia ung a cici pawl om ding…
Mi piak peuh a ki sak thei pih pawl om ding…
Pia ih sak tampi ten piazo nai kei ung a cici pawl om ding…
Sem mahmah na pi, lawh cing mahmah na pi… sem a kisa lo, lawh cing a ki sa lo pawl om ding…

Minam khat a om nak leh a piangsak PA in minamte sungah a cing tak in hong koihsak dimdiam hi. Ei sep theina ciat panin lung khia hetlo aa ih sep tinten ding thupi hi. A bukim dingin Zomi te a bawl PA in ahong bawl ahihi.

Kuamah kuamah ki sak thei pih ding leh ki neu muh ding khat zong om lo hi. Ih sep theihna panmun panin semsem lel ni. A hi ci dingin Pasian in hong bawl ahihi.

Thawn Tuang