Bethlehem Thu ~ Pu Thangboi

Bethlehem Thu ~ Pu Thangboi

Topa Zeisu’ suahna Bethlehem khua thu theihhuai asa ta ding in tawm suut dih ni e maw.

Bethlehem khua pen Palestine kiim a khua te lak ah khua upa mahmah tangkhua khat hi. Jacob te’ khanlai pek in omkhin hi. Bethlehem akhiatna pen “Ansaal” (house of bread) cihna hi. Ama’ min masa pen bel Efrath (Pian 35:16) hi in akhiatna bel gahpha (fruitful) cihna hi.

Jerusalem pan khang lam (southern) tai 6 leh furlong 2 na ah om hi. Ruth i khua lah hi a (Ruth 1:9) David i khua zong ahi hi (1 Sam 17:12). Israel te’ kumpi lina ahi Rehoboam in hoihtak in lampha kik hi (2 Khang 11:5-10).

Leitung tangthu a mi minthang mahmah khat ahi kumpi kungpu (emperor) Constantine i nu Helena in AD 327 kum in Zeisu’ suahna mun tektek ah biakinn khat lamsak hi. Tua biakinn min pen Church of the Nativity kici a tulaitak leitung a muhtheih biakinn lak ah a upapen ahi hi.

Tua biakinn pen Samaritan te’n AD 529 kum in kumpi tawh akidona vuah nakpi tak in susia uh hi. Kumpi kungpu Justinian I in lampha kik leuleu hi. Muslim te’n AD 637 kum in la uh hi. AD 1099 kum crusade kidonapi ah Christian te’n a lakkik dong uh Muslim te’ khut sung ah kum 462 sung vilvel om hi. AD 1350 kiim pawl a kipan in Ottoman empire te’ khutsung tung a 1920 kum pan in British te’ khut sung tung hi.

UNO i ukna nuai ah koih ding in 1947 kum in UN in khentat hi. 1948 kum Israel gam hong piankhit phet a Arab – Israel kidona khit teh Jordan te’ khut sung tung hi. 1967 kum Ni 6 Gal kidona ah Pasian in alamdang tak in Israel te gualzawhna pia ahih man in Israel te’ khut sung tungkik hi. Ahi zong in 1995 kum a Isael kumpi leh PLO (Palestine Liberation Organization)te’ kithukimna ahi Oslo Accords tungtawn in 1995 kum a kipan hih mun pen Palestine te’ thuneihna nuai ah ki koih hi.

Tulaitak Bethehem

Tulaitak in Bethlehem khua ah atengte pen atamzaw muslim te hi. Ahi zong in Palestine te zong tampitak mah Christian om uh hi. Mi 30,000 kiim teng hi. Leikiuli pan a pai khualzinmite pen hih Bethlehem khuamite’ nuntakna sihuipi khat ahi hi. Zeisu’ suahna khua ahih ban ah Jacob in a ngaih mahmah azi Rachael i han zong hih khua nawl ah om ahih man in tua munuam a pai bekbek zong khuai vaitung bang den hi.

Tuipi pan asanna pi 2,543 bang pha ahih man in Zogam khuahun sun phialmawk hi. December leh March kha kikal sung teng guah zu in khua zong dam ci hi. Zogam dan mah in January kha mah dam pen ci uh hi.

Biakna tuamtuam te’ LST te in pasian khat suak ding ahih lam gentek uh hi. Ahizong in koimun ah suak ding hiam cih akician a gen omlo hi. Ahi zong in Pasian’ Kammal LST sung Micah 5:2 sung ah amun amual ding kician tak in nagen hi.

Lai nong simsak lungdam mahmah ing. Ka Lungdam Bawl letsong in na ngaihsut sak in.

Zeisu’ suahna tawh Pasian’ hong piak Thupha namkim nang leh na innkuanpihte’ tung ah hong tung ngiat hen. Amen.

Nong-it

(Mung Laan Thang)
Tawmvei
Magway