South Africa ah kamsang akici pa’n thoza tawh natna damsak theihing kici

South Africa ah kamsang akici pa’n thoza tawh natna damsak theihing kici

Nov. 25, 2015: South Africa gamah amah leh amah kamsang (prophet) a kici tawm leh Limpopo province sunga Mount Zion General Assembly kici pawlpi a makaih Lethebo Rabalago kici in tho thahna dinginin a kizang thoza (pesticide) nam khat “Doom” kici mi mit-ah kapsak in HIV, cancer leh natna damsak hi’ng kici hi. Hih Pasian mi a kici pa’n sih theihna thoza Doom pen a lamdang zatui hi a, nuntak hun sung a sausak thei zatui (elixir) hi a, natna tuamtuam lamdang takin damsak thei hi ci-in Doom zatui tawh mi mit kapsak in, a kapte maan, mi thupha a piakna leh a thugennate Facebook ah khahkhia ziahziah zaw lai hi.

Hih thoza Doom bawl Tiger Brands ten hih thoza pen a lamdang naseptheihna kihel lo a, natna damsakna ding zatiui hilo in, ganhing neu nonote thahna dinga kibawl hi ci uh hi. Doom pen mihing tunga zat ding leh mit-a kap dingin lauhuai mahmah a, tua banga zat ding a lauhuai zia dong a zatui bawm-ah hilhkholna warning kituangsak hi ci uh hi. Tiger Brands ten Rabalago tawh thukizakna neih theihna ding kisawm a, hih bangin Doom a zat nawn lohna dingin kigen ding hi ci hi.

South Africa government commission in zong Rabalago in hih bangin zatui a zatna hangin dam lohna leh mit siatna tuak ten kumpi tungah hekna hong bawl un ci-in mipite thuzaksakna bawl hi. BBC ten interview a neihna uh-ah Rabalago in Doom pen pilvang takin ka zang a, numei khat mit ka kapsak leh hih zatui ah Pasian vangliatna om ahih manin a mit natna panin damna ngah hi ci hi. eNCA websiten ten a interview na-ah Rabalago in Doom in manlang takin damsak theihna vangliatna nei hi ci-in gen hi.

Mount Zion General Assembly pawlpite Facebook account ah Doom pen a min bek (Doom pen mailam a hong tung ding haksatna, thu khenna cihna ahi hi) hi a, a man takin ci leng hih zatui ah damsak theihna om hi cih kituangsak uh a, mi pawl khatin zong damna ngah mah hi’ng ci-in teci pang uh hi.

#Behlapna: Hih banga gamta Pasian mipa leh kamsang a kici tawm ten hih bangin zatui a zat pen na upna hangin damna na ngah kha thei mah ding hi. Ahih hangin a bawlte nangawn in lauhuai a, hih banga zat dingin kibawl hilo in, tho thahna ding ci uh ahih manin kihtakhuai mahmah hi. Amah leh amah kamsang, sia a kici tawmte pen lauhuai kha thei mahmah ding hi.

Hai pen phamawh lo a, mawl pen poi mahmah a, kilawhsawn loh ding thupi dingin uphuai hi. Kamsang leh sia kici tawmte up pah huai lo hi. Sia leh kamsang zaa a kipia tawm a, sia leh kamsang zaa a kipiatawm kitam ta hi. Source: India Today/ Thang Khan Lian