Singapore pan Thailand zuanin aleng vanleng sungah Bomb om ci’n ki lauthawngsak

Singapore pan Thailand zuanin aleng vanleng sungah Bomb om ci’n ki lauthawngsak

Singapore panin Thailand zuanin alengkhia vanleng sungkhatah Bomb omhi ci’n ki lauthawngsakna om ahih manin, Singapore gamsung ah ki lehkiksak cih AFP pan kiza hi.

Tua vanleng pen Budget Airline Scoot te neihsa hi a, tuni Thursday ni in Singapore gampanin alengkhia ahihi. Vanleng sungah Passenger khatin Bomb omhi cih lauthawng sakna “Bomb Threat” bawl ahih manin aki lehkik hi ci’n Police leh Scoot Airline te’n genkhia uhhi.

Tua Scoot Airline pen Singapore, Changi Airport panin Thailand, Hat Yai City zuanin Thursday nitaklam 3:23pm hunpawl in alengkhia hi ci’n Airline Statement ki khahkhia hi.

Singapore gampanin alengkhiatzawh nainih khitkhawng ciangin Bomb Threat om ahih manin galvanleng “Singapore air force fighter jets” te’n vandawn ah delhpah in Escort bawl uhhi.

Scoot Airline pen Singapore Airlines ii sumtawm abeizaw Budget Airline hiangkhat hi a, tuabangin Bomb Threat ki lauthawngsakna aom ciangin galvanleng in ageinai ah sulzuih in aki lenpih ngeina hi ci’n Straits Times te’n genkhia hi.

More: “Bursa Malaysia Building” ah Bomb om ci’n ki patau man mahmah

Tua Scoot Airline pen Flight TR634 hi a, Passenger te bangmah buaina omlo in Singapore, Changi Airport ah kumkikthei uhhi.

Singapore Police te’n vanleng sungah Bomb Threat abawlpa pen manin thusitna neiding uh cih kiza hi. Sawltak #zomidaily