Judson’ Sawlbawk Kawlgam ah kuangkuang lai ~ Dr. Pau Khan En

Judson’ Sawlbawk Kawlgam ah kuangkuang lai (Judson Bush Is Still Burning in Myanmar) ~ Rev. Dr. Pau Khan En

Kawlgam sunga Tuiphum Pawlpite-a kipan leitung mun tuamtuam a va tung Kawlmi Tuiphum Pawlpite in kum sim July kha Nipini nihna pen Judson Nipi (a) MBC Nipi ci-in ciamtehin biakpiakna limci tak nei uh hi. A hang pen Judson topate nupa Kawlgam hong tun uh 1813 kum July 13 ni phawk kawmin thupuak nasepna lamah lungsim a hat mahmahna uh kepsuak nading cih ngimna hi. Judson topate nupa neih, mei bang a kuang, thupuak nasep nopna lungsim mitsak lo-in Tuiphum pawlpite leh pawlmi khempeuh’ sungah a kuansuak nading thalakna hi.

Izipt gam ah bawlsiatna thuak Pasian’ teeltuam mite a honkhia dingin Pasian in sawlbawk kuang khat tungtawnin Moses sawl hi. Tua mah bangin mawhna sunga bual Kawlgam sunga mite a honkhia dingin Pasian in mawhna sunga utna lungsim a nei Judsonte nupa hong sawl leuleu hi.

Thupuak nasep nadingin Judson’ sawlbawk ahi mei banga kuang thupuak nopna lungsim pen 1813 kumin kipan a, tuni dong mit lo-in kuangsuak lai ahih manin zong Kawlgam ah Tuiphum thupuak nasep damdamin mailam a nawt thei ahi hi. Tua hi a, bang hangin tua banga thupuak nopna lungsim Judsonte nupa kiangpan kipanin thupuak naseem dangte leh Tuiphum pawlpite sungah mei bangin kuangsuakin thu-um mite’ lungsim phonglo thei hiam, cih (motivations of Christion mission) thu i kikum ding hi

Khristian thupuak nasepna tangthu i et ciangin Khristiante in sumtha, mihing tha tampi zangin thupuak nasep sem uh, cih kimu thei hi. Tua bangin a zatna uh a hang pen gamvai kipuakna, nuntak khuasakna, leh mihing kizop kithuahna cih thute hang hilo-in Lai Siangtho in seploh phamawh dingin a sawlna ( biblical imperatives) leh a hansuahna (motivations) hang hi. Tua banga sawlna leh hansuahna thu nam li om hi.

A. Tunglam Panin Thupiakna (Command from Above)

Khrih in leitung ah kum thum sung na a sep khit ciangin van a kah ma-in a nasep maban zom dingin nungzuite sawl hi (Mt.28:18-20; Mk.16:15-18). Leitung bei mateng pawlpite’ sep suaksuak dingin tunglam panin hong kipia ahi a nunungpen Khrih’ thupiakna pen tuni-a Khristian pawlpite sep masakpen ding vaipuak lianpi hipah hi.( The last command of Jesus Christ now becomes the first concern of the churches today).

Tunglam panin Khrih’ hong piak thupiakna ahih manin Khristian pawlpite’ nialtheih hilo hi. “ Tunglam panin kipia thupiak peuhmah sep le seploh ding vai nautaangte’ kikup theih nading thu om lo a, man ding leh sep ding bek om hi” ( An order is not to be discussed but to obey) ci-in galkap mangpi Montgomery in gen ngei hi. Maan mahmah hi. Tuni-a Khristian pawlpite zong tunglam pana Khrih hong piak thupiakna mangin leitungah thupuak nasep sepna sepkhiat ding bek om hi.

Khrih’ thupiakna mangin thupuak nasep sepna pen tuni-a pawlpite nungta uh ahihna lim hi pah hi. Thupuak nasep a sem lo siam mipil Emil Brunner in “Mei pan a kuan ciang bekin a nungta ahihpat mah bangin pawlpi pen thupuak nasep a sep ciang bekin a nungta hipan hi” (As the fire lives by burning, the church lives by mission) na ci hi.

Thupuak nasep le seploh ding vai kikupna pen thupuak nasep a seem nuamlo pawlpite’ paulap zonna hi a, a kizen zolo pawlpite gam ah thupuak nasep a sem Hudson Taylor in, nikhat, tuikia mi khat tuakkha hi. Tuikiapa hotkhiat nadingin a kiim a paam mite kiangah huhna ngen hi. Tua mite in amau thaman ding tuazah tuazah ci-in a nget ciangun Hudson Taylor in a ngetzah uh neilo ahih manin a khiap nadingun deek hi.

Tua bangin thaman ding kideekin a ciak ngeingai uh sungin tuikiapa na si ta hi. Khristian pawlpite zong thupuak nasep seem ding maw, seem lo ding; sep le zong bang ci sep ding; sum tha, mihing tha bangzah tawh kipan ding; bang ci bangin seem lehang a bei phatuam thei ding, cih thute a kikup laitakun mawhnei mi tampi tak na si khinta uh hi.

Tua hi a, tuni-a Kawlgam sunga om Khristian pawlpi khempeuh in thupuak nasepna kipat photphot ding kisam hi. Hun mawk beisaksak ding hilo hi. Thu-um mi khempeuh’ sep ding, pawlpi khempeuh’ sep dingin Khrih ngiat in tunglam panin thu hong piak hi a, tua pen Pasian piak vaipuak hi pah hi. Thangah-huai thu khat ah tunglam pan a hong kipia thupiak ahi tua Sawlpina (The Great Commission) pen “Hun bei dongin note hong ompih tawntung ding ka hihna thu phawk ta un” cih Ciampina (The Great Promise) tawh kithuahkhawm pah hi. Thupuak nasep a seem pawlpite Khrih in nusia cih bang om ngeilo hi.

B. Nuailam Panin Kahna Awging (Cries from Below)

Khristian thupuak nasepna a hansuah thu nihna pen nuailam panin mihingte’ kahna awging hi. Thupuak nasep (mission) cih kammal pen Latin kammal missio pan hong pai hi a, sawlkhia (sent) cih khiatna nei hi. Pasian in nuailama om, a piansak mihingte’ kahna awging hangin khat bek a neih a Tapa Jesuh Khrih leitungah hong sawl hi (Jn.3:16). Bawlsiatna a thuak Ama teeltuam Israel mite’ kahna awging hangin amaute honkhia dingin a sila Moses sawl hi (Pai.3:7-11). Khrih thupuak nasep cih pen bawlsiatna thuak minamte kiangah va pai-in tua a thum a taute’ suahtak nadingin na va sem cihna hi.

Mihingte pen Bawlsiat netniamna tuamtuam hangin gimna natna thuakin om uh hi. Tua pen mawhna thaman zong hikha ding a, thumaanlo hun paizia, thumaanlo gamvai kipuakzia cihte hang zong hi thei hi. Mihing kizop kithuahna thu-a om angsung theihna, kideidanna, kipaampaihna cihte hang zong hi thei lua hi. Tua bang dan hun paizia hoihlote hangin mi tampi tak mihingin a pian thaman uh omlo-in leitunga a nuntak uh a mawkna suak lel hi. Nuntakna ah lungkimna ngah zolo-in thumin tau-in om uh hi. Tua bangin nuntak ding nangawn haksa sa-in lungsim na-a a om mite kiangah lam-etna tawh kipawl lungdamna thu hopsawnna pen thupuak nasepna hi.

Hun khat lai-in thupuak nasepna cih ciangin pawlpite in hih leitung pan suahtak nading thu, vantung gam tun nading thu cih ciang bekin ngaihsun ngei uhhi. Nuntakna pen leitung hun leh vantung hun ci-in khen nih suah uh a, thupuak nasep cih pen vantung hun ading bekin kiseem danin ngaihsun uh hi. Ahi zongin thupuak nasep ngimna bulpi pen leitung nuntakna pan vantung gam nuntakna ah tun nading, cih ciang bek hilo-in hih leitung mahmah ah Pasian’ deihna bangin nungta-in Pasian ‘ deihna tawh kituak, Pasian’ Kumpigam phut ding, cih hizaw ahihlam thupuak nasemte in hong mukhia uh hi.

Tua hangin hih leitung mah ah Pasian’ Kumpigam phutin tua panin a cingtaakzaw ahi vantung nuntakna lam ah kalsuan ding, cih pen thupuak nasepna ah a thupi masapen khatin koihin tua bangin seemkhia uh hi. (The cries of the people below determines the scope of mission and the gospel).

Khrih’ hong puak lungdamna thu in mihingte’ nuntakna bup huamkim ahih mah bangin thupuak nasepna in zong mihingte’ nuntakna bup huamkim hi. Taksa lam, lungsim lam, kha lam a nusiat cih bang om lo a, vekpi-a huamkim thupuak nasepna hi. Mihingte’ kahna aw leh thumna aw a ginna mun khempeuh pen Khristian thupuak nasep sep nading phualte hi pah hi. Pasian in mihingte Ama lim le mel sun dinga a bawl ahih manin it mahmah a, mihingte a honkhia dingin khat bek a neih a Tapa hong sawlkhia hi. Tua hi a, mihingte’ kahna awging pen thupuak naseemte kiangah “ Hong pai ve un” ci-a sapna “ Makedonia Sapna Awgingte” ahi hi.

C. Sunglam Panin Khrih’ Thatang Sawlna (Compulsion of Christ from Within)

Thupuak naseem makaipi sawltak Paul in “Lungdamna thu genlo in ka om thei kei hi; Gen kei leng kei adingin haamsiatna hi” ci hi. (1 Cor. 9:16). Tua mahbangin Paul in zumna launa bangmah neilo in mite kiangah lungdamna thu genkhia hi. A hang pen lungdamna thu theilo pi in mite si a siatna a tun ding uh Paul in paammaihsa mahmah in amaute honkhia nuam ahih man hi. Lam khat in ci lehang hotkhiatna ngahlo mite siatna a tun ding uh pen Paul in hehpihhuaisa in lunghimawh ahih manin amaute kiangah suahtakna leh hotkhiatna thu genkhhia dingin thupuak nasep a seem ahi hi.

Paul in hihzah in thupuak nasep sep nopna lungsim a neihna a hang a kankan ciangin thu dangdang hang hilo in “Khrih’ itna in thatang kaih” ahihna thu mukhia hi. “for the love of Christ compels me” (2 Cor. 9:14). Thupuak nasepna a hang bulpi pen lungsim sunglam pan mawhnei mite hehpihin siatna ah a tun loh nadingun huhnopna lungsim, itna lungsim neihna hi. Mawhnei mite tungah hehpihna leh itna neih theihna pen mihing ci le sa hang hilo in Khrih’ itna hang hi. Judson topa a kipan thupuak nasem dinga tuipi galkhat lam pek pan hong pai thupuak nasemte khempeuh in a lungtang sung-uah Khrih itna ii thatang sawlna ngah hamtang ding uh a, tua sawlna a man manun Kawlgam hong tung thei uh hi.

1908 kuma Zomite kiang hong tung Cope topa in hong kuankhiat ma, amah a sawlkhia pawlpite kiangah a nunungpen thugenna a neih lai in hih bangin khauh tak in na pulak hi. “ Hih mun, hih pawlpi ah a nungta lai in kong tun leh ka min hong laihsak un” (If I come back alive to this place and this church, please change my name).

Khrih Topa kiang pan in a ngah tua itna hangin Cope topa in America ciahkik nawnloh ding leh Zomite ading a nuntakna beidong sepsak dingin khensat hi. Tua mah bangin Zomite ading a nuntakna pia takpi a, 1938 kumin Hakha khua ah a leitung nuntakna nusia hi. Lungdamna thu a za ngei nailo Zomite kiangah luang khamin lungdamna thu hong puak a, lai neilo in tangthu leh thu le la kici peuhmah kam bek tawh a ciamteh Zomite adingin itna tak tawh lai hong phuat sak hi.

Lungtang sung pan Khrih itna ii thatang kaihna, sawlkhiatna, satsuahna cihte om lopi a kisem thupuak nasep pen zuaupi hi a, a huutpi hi. Khrih piak ahi lo, thudang khat peuh hang a lawpna le utna tawh kisem thupuak nasep pen thupuak nasep maan hilo hi. Tua hi a, thupuak nasepna ah pualam lawpna (external motivations) kici peuhmah bulphuh khalo in Khrih itna leh hehpihna ii thatang kaihna (compulsion) leh satsuahna, tawsawnna cihte bek mah bulphuh ding kisam hi. Tua hileh bek Khristian thupuak nasep pen thupuak nasep maan taktak hipan ding a, i thupuak nasepna zong Khrih sep bangin kisem thupuak nasep hong hipan ding hi.

D. Kiim le paam Thu Omziate Khuadakna (Conciousness of conditions Around)

Pasian piansak leitung pen a nopci mahmah khat hi a, tua hangin zong Pasian in bangmah a om nailo sung pan a kammal tawh nate khempeuh a dawldawl in a piansak khit sim in “Hoih hi” ci-in lungkimna tawh na pulak hi. (Pian. 1:10, 12, 18, 21, 25, 31). Tua a piansaksa, a hoih mahmah nate khempeuh kisia lo in a kip tawntung nadingin mihingte tungah a cing a keem ding leh a puah a zuun dingin vaipuak lianpi khat na ap hi. (Pian. 1:18; 2:15)

Vaipuak piakna a ngah mihingte in a vaipuak uh zolo ahihna thu mihing masate tangthu tungtawn in kithei thei hi. Keem lo, zuun lo bek thamlo in Pasian piansaksa nate susia lai uh hi. Singkung lopate mawkzat gawp uh a, mualpi mualneute kolhsak gawp uh hi. Ganhing nam tuamtuamte ci mang ding zah dongin beng gawp uh hi. Tua hangin Eden Huan ii pianpih hoihna zong mawhnei mihingte hangin mel kisia in etlawmna bei hi. Tua kisiatna huhau in khua hun zong a tuungin a hoih mahmah, a maan mahmah kimlai hong kitukalh gawp ta hi. Khuahun kitukalh manin ankung tawmna, nek le dawn haksatna leh kial tunna ciang nangawn hong piang hi. Tua panin zawnna, guktatna buluhna cihte a kizom in hong piang pah hi.

Pawlpite thupuak nasepna I etkik ciangin mihing hotkhiatna (anthropological sotereology – human salvation) bek masak uh ahihna kimu thei hi. Pasian piansaksa van le lei leh nate awlmawh kha vetlo uh hi. Kum zalom 20 bei hun ciang dong mah pawlpite thupuak nasepna ah mihing bek kimasak in kiim le paam van le nate kinusia cip hi. Ahi zongin kum zalom 21 sunga thupuak nasepna ah pawlpite in a huamkim thupuak nasepna kinbawl in tha neih tawpin a sep ding uh kisam hi. A hang pen a cingkim Pasian hotkhiatna sungah mihingte bek hilo in piansak nate khempeuh zong a thak in kipuahpha kik ding ahih man hi. (Rom. 8:18 -25).

Kiim le paam na khempeuh kisiatna leh piansak nate pheeng zatna pen Lai Siangtho tawh kituak lo thu hi a, tua a kisia sak thei thu le late hepkhiat ding leh kiim le paam awlmawh nadingin kihansuah ding cih pen tuni a thupuak nasepna sungah helloh phamawh thu hita hi. Mihing hotkhiatna (human salvation) bek bulphuh lo in kiim le paam bup hotkhiatna (ecological salvation) zong i thupi lak ding hun hong tungta hi.

Tua bangin thupuak nasepna behlaploh phamawh dingin zong kiim le paam thu om ziate in hong toto ta hi. Pasian in pawlpi pualam ah Ama thupuak nasep (missio Dei – the mission of God) sem in mihingte’ tangthu leh mihingte bualna kiim le paam puahpuah ta hi. Tua bangin Pasian’ deihna a tangtun theih nadingin Pasian’ thupuak nasepna ah kihel in mapangin leitung ading nungta ding cih pen tuhun a, Khristiante’ seploh a phamawh thupuak nasep hita hi.

Gamlapi pek panin Kawlgam hong pai thupuak nasemte 1966 kumin a vekun a gam ciat-uah kiciahsak khin hi. 1966 kum panin tuni ciangdong Kawlgam thupuak nasepna pen Kawlgam sunga om thu-um Khristiante’ hanciamna tawh nungta suaksuak hi. Gamdang thupuak nasemte a om nawnloh uh ciangin tualsung pawlpite leh thu-um mite in sepzia sepdan a tuamtuam tawh maban zom in thupuak nasepna kizom paisuak sak uh hi. Nidangin thupuak nasepna (mission) pen gamdang pana hong pai mite’ vaipuak nasep dan bekin kimu a, tua mite bek pen thupuak nasemte (missionaries) dan in kingaihsun hi.

Tu in ahih leh thupuak nasep cih pen pawlpi panin leitung ah sawlkhiatna hi ci-in kisaang ta hi. Pawlpi sunga om thu-um mi khatciat zong pawlpi pualam leitungah thupuak nasem dingin sawlna a ngahte hi ci-in muhna maan kineita hi. Thupuak nasem dingin hong hansuah Judson’ sawlbawk pen Kawlgam ah kuang suaksuak lai hi. Tua bangin Judson’ sawlbawk tuni dong kuang lai ahih manin pawlpi kim leh thu-um mikim zong leitungah kuankhia in thupuak nasep nakpi in sep lai ding kisam hi. Mei banga kuang Judson’ sawlbawk kum 200 cin phawkna pawi i bawl ding hun 2013 kum ciangin Kawlgam ah Pasian deihna tuibang tungin Kawlgam, Pasian’ Itna Gam a suah theih nadingin tha thak khat vei la kik ciat dih ni. Revd Dr. S. Pau Khan En (Kum Zalom 21 Aading Khristian Theology)