Singapore gamsung aom Post Office khatah damiah lut, $3000 puakhia

Singapore gamsung aom Post Office khatah damiah lut, $3000 puakhia

Singapore gamsung ah damiah taih cihbang kiza mengmenglo himahleh zanni Thursday (Feb 8) ni in SingPost (Singapore Post) Branch khatah damiah lut cih CNA pan kiza hi. Tua SingPost Branch pen Potong Pasir Community Club aom hi a, zanni sunlam in damiah akitaih ahihi ci’n Police te’nzong Media Release bawlkhia uhhi.

Damiah ataihpa pen amai Surgical Mask tawh tuamcip in, sunlam 1:30pm hunpawl in damiah ataih ahihi. Counter ah nasemin aom numei khatkiang ah sumkhempeuh hongpia in ci’n ngen cihi.

Tua numei nasemnu zong damiah cih atheih ciangin lauthawng in inndei sungah lutsan vingveng hi. Tuaciang in damiah pa inzong Counter kantanto in, Drawer sungah akikoih sum akigawm in S$3000 kimding puakhia hi ci’n Singaopre Police te’n genkhia hi.

Tua damiah ataihpa pen thau leh hiam bangmah tawi neilo kici a, asi aliam kuamah omlo hi.

Hih damiah alutna SingPost Branch pen Potong Pasir Community Club ii inndawl nihna ah aom ahihi.

Ageinai panin amukha Eyewitness khat ahi Richard Low in agenna ah amahpen tua damiah alut laitak in Community Club ii Lobby ah katut laitak cihi. Alawm te khat ngakin atut laitak in pasal puanvomsilh, amai Mask tawh atuamkhat hong nawkphei kamu cihi.

Ka phone ka etet laitak in pasal khatin manlangtak in hong nawkphei hi. Nawhpaiphei mahmah ahih manin, amaitang pen kamukha keihi. Amai ahzong Mask thuah ahih manin, damlo ahih manin maituam athuah hiding in ka ummawhlel hi ci’n genkhia hi.

Ahi zongin apualam ah Police Car te kamuh ciangin damiah lut cih katheipan a, den a hong nawkpheipa pen damiah ataihpen hiding cih ka nungtheihpan cihi.

Video: Police investigators leaving the Singapore Post branch at Potong Pasir Community Club which was robbed of S$3,000

Tua vengsung aom Saint Andrew’s Secondary School sangnaupang khatinzong agenna ah Basketball kaki mawlmawl laitak un Police Car 2 honglut kamu uh cihi.

Sum tampi aomnading ahilo, hih SingPost “Post Office” ah damiah lut cihpen lamdang kasa hi ci’n sangnaupang pa’n genkhia hi.

Singapore Police te’n tua Post Office pen khakcipsak in, hoihtak velcianna nei uh a, nitaklam 6:30pm hunpawl ciangin ciahkhiapan uh cih kiza hi.

More: Singapore ah Bank khat damiah lut, S$30,000 puakhia

Damiah papen lukhu avomkhat khu in, Black Sweater, Blue Jeans teengin amaipen Surgical Mask tawh tuam hi. Thungkuah Black Sling Bag khatzong kuah hi ci’n Police te’n genkhia hi. Hihpa pen anunung akimuhna ahihleh Potong Pasir Avenue 1 lampi dungteng ah Upper Serangoon Road lamzuan in apai laitak kimu cihi. Singapore Police te’n azonsan laitak uh ahihi. Sawltak #zomidaily