Bangkok meileng Station ah Selfie akizaihsawm mi 2 meileng in nawkkha, numeikhat akhe kitan

Bangkok meileng Station ah Selfie akizaihsawm mi 2 meileng in nawkkha, numeikhat akhe kitan

Thailand, Bangkok khuasung ah tuni Thursday zingsanglam in numei khatleh pasalkhat Selfie Photo akizaih laitak in meileng in nawkkha in nakliam mahmah cih The Nation pan kiza hi. Bangkok khuasung aom Samsen Railway Station ah tuni thupiang ahihi.

Tua atuahsia te ii alawm khatin agenna ah amaupen mi 3 apha uh hi a, Railway Station geiah zuzong ka dawnkhawm uhhi ci’n Police te tungah genkhia hi.

Samsen Railway Station ah aom laitak un meileng khat paikhialian hi. Tua apaikhia Outbound meileng tawh alawmte nih Photo kizaihsawm uhhi. Meileng Station panin apaikhiat laitak Background in deih uh a, amau 2 pen Selfie Photo aki zaihsawm uh ahihi.

Tualaitak in adang meilengkhat tua Samsen Railway Station ah hongtunbeh hi. Tua atunbeh Inbound meilengpen mukhalo in, Selfie Photo akizaihsawm laitak in atungcil meileng in anawkkha cihi.

Samsen Railway Station ah meileng in anawkkhak pen zingsang 4am hunpawl ahihi. Anawkkhak mi 2 tepen kum 28 aphakhin numei Walailak Sukama leh kum 25 aphakhin pasal Amnaj Nawantib ahihi.

Hih buaina thupiang aom ciangin Samsen Police Station ah ki zasak in, Deputy Inspector asem laitak ahi Pol Captain Wisanusak Sueb-in in hihvai bangci bangin Accident pianghiam cihpen hoihtak akansan laitak kici hi.

Deputy Inspector pa genkhiatna ah meileng in Walailak Sukama kici numeinu ii ataklam khe nawkkha in kitankhia cimawk hi. Alawmpa Amnaj Nawantib penzong khua phawklo cihi.

More: California Bridge tungpan Selfie akizaihsawm numei khat kiasuk

Hih atuahsia mi 2 tepen Vajira Hospital ah kipuak sakpah uhhi. Police te’n Train Station ah akithuah CCTV Footage te hoihtak encian nailo uh a, hih aliam mi 2 tepen bangci bangin thu kibawlding cihpen ki theician nailo cih kiza hi. Sawltak #zomidaily