Singapore pan Malaysia azuan Bus khatleh Lorry kiphukha, mi 14 liam

Singapore pan Malaysia azuan Bus khatleh Lorry kiphukha, mi 14 liam

Singapore pan Malaysia zuanin apaiphei Express Bus golpikhat leh Lorry mawtawpi nih kiphukha ahih manin, akigawm in mi 14 liam cih Berita Harian News pan kiza hi. North – South Expressway (NSE) kicihna Highway lamzikpi tungah akiphukha hi a, Gopeng khuageinai ah tuni Wednesday (Dec 6) zingsanglam in thupiang ahihi.

Mituanna Passenger Bus pen Singapore panin Malaysia, Ipoh khuapi zuanin atai laitak hi a, zingsang 5:30am hunpawl in Lorry mawtawpi khattawh kiphukha masa cihi.

Passenger Bus pen Five Stars Company te neihsa, dawlnih apha “Double-decker bus” khat hi a, Singapore leh Malaysia kikal ataite ahihi. Aliam te lakah mi 12 pen Express Bus tungah atuang Passenger te hi uh a, adang aliam mi 2 tepen mawtawhawl Drivers te kici hi. Akigawm in mi 14 takin liamlawh uhhi.

Fire and Rescue Department spokesperson khatin agenna ah hih tuahsiatna apian ciangin zingsang 5:41am hunpawl in huhngetna Distress Call hongki zasak cihi. Tuaciang in Firefighters honkhat in aphual ah ki delhpah cihi.

Firefighters te atun uhciangin Lorry Driver papen mawtaw maibuk sungah na awkciplai in, Firefighters te’n honkhia uhhi. Liamna pawlkhatzong ngah ahih manin Medic Team te kiangah kipuak cihi.

Passenger aliam mi 12 tezong Bus sungmah ah na omciplai uh a, limliamthei mahmah uh cihi. Aliam Passenger tepen pasal 3 leh numei 9 ahi uhhi.

Express Bus Driver papen amahleh amah pusuak khiathei hi ci’n Spokesman te’n genkhia hi. Aliam Passenger tepen avekin Ipoh khuasung aom Raja Permaisuri Bainun Hospital ah zatui bawlding in kipuak uhhi.

More: China ah Bus tuahsia in mi 36 in sihlawh, adangzong mi 13 liamgawp

Tua Lorry mawtawpi pen asungah laidal “Paper” apua phitphet ahihi.

Adang Lorry khatinzong nawkkha a, ahi zongin tuate aliam kuamah omlo cih kiza hi. Singapore pan Ipoh City azuanin apai ci ahih manin, Zomi te akihelkha loding in lamen hang. Singapore leh Kuala Lumpur kikal hilehbel Zomi tezong khualzin kihelthei zeuhzeuh uhhi. Sawltak #zomidaily