Singapore nupa kopkhatin inn nasemnu an ngawlhcip in agihna 20kg kiamliang
Singapore ah nupa kopkhat in a innnasem nu uh anpialo, gilkial in koihcip uh ahih manin thukhenzum ah tuni in liausumding leh thongkiatzah hunding ki genkhiata cih Straits Times pan kiza hi. A pasal minpen Lim Choon Hong kici a, kum 47 aphakhin khat ahihi. Azi minpen Chong Sui Foon kici a, azizong kum 47 mah ahihi.
Hihte nupa in tuni Monday (Mar 27) ni in thukhenzum ah kamawhmah uhhi ci’n genkhiata uhhi. Apasal pen amawhna daanloh nadingin $10,000 kiliausak a, thong kal 3 kiading in thu kikhen hi.
Azi pen thong kha 3 kiading in thukhenmang te’n thupia uhhi. Anupa un kumkhattuak thong akiathei dinmun hi a, thumna Appeal abawlkik uh ahihi.
Singapore “Employment of Foreign Manpower (Work Passes) Regulations 2012” thukhun ah Employers ahi inntek te’n inntengding in nasem Maid alak uhleh annek akicingin vakding, aci anatleh zatui bawlding cih ahihi.
Ahi zongin hihte nupa in nungkum March khasungin amau innah nasemding aom Maid khatpen an pialo in gilkial in koihcipmawk uhhi.
Hihte nupa in innnasem dingin Philippines gammi “Thelma Oyasan Gawidan” kici numeikhat sam uh a, Cuscaden Walk aom Boulevard Residence ah nasem in koih uhhi. Ahi zongin tua Filipino Domestic Worker pen nikhat an nihveibek pia in, akhamin pialomawk ahih manun kha 15 sungin agihna 49kg panin 29kg ah kiamsuk cimawk hi.
Nikhat an nihvei apiak uh acihzongpen apiakmasak uh zingsang 1am leh 2am pawlin pia uh a, tuapen bangmah akihello pongmoh “Plain white bread” dalkhat, dalnih khawngbek leh khauhsuai “Instant Noodles” bek ahihi. Khatvei sunsun Instant Noodles lakah anteh themneng leh sa tawmtawm helsakbek uhhi.
Anihna an apiak uhpen sunkimlam hi a, bangmah akihello pongmoh “Plain white bread” mah hizel in, dal 5 khawng pia uhhi.
Innteek te innkuan in tazong nei uh a, amau innkuan nekbangbang piahetlo in, amau anlimlim, tha omtheih nading anlimci tebek ne uhhi. Ahi zongin innnasem Maid in aomnu nekte pen tha omnading peuhmah kihello, Nutritional Value omlolua in atha kiamgawp hi.
Filipino Maid nupen kum 40 khawng hita a, an gina akipiakloh banah tui nangawn adawnding ciangin innteknu tungah ngetphotkul hizen hi. Tuazong tuisiang leh tuilimci hipeuhmahlo, Tap Water bek cisawnsawn hi.
Tuabang tengtawh Filipino Maid nupen 2013 February kha ciangin anin kangcip in, tuazawh asawtlo in asamzong pulhgawp hi.
An leh tui hoihtak apiaklohban ah taw lampan apaikhiading aom sunsunzong innsung aom ekbuk zangsaknuamlo cilaizen hi. Aomna uhpen Condominium hi a, innsung aom ekbuk zangsaklo in, mipi zatkhopding in Condominium sungah akibawl Common Toilet bek zangkha cisawnsawn hi.
Kisilding zong tuiman pamaihsa himawk hiam, kalkhat in khatvei ahih keileh nihveibek kisilsak a, tuazong akisil laitak in agei ah innteknu in ngakcip in encik gige cilailai hi.
More: Singapore ah Zomi khat hongki thahsak: Piang Ngaih Don
Ih sanggamnu Piang Ngaih Don vaizong bangciciang hong tunpihmawk uhdiam? Hih atung ate nupa zong abawlsiatna uh sinkhelvai mahmah napi’n, athongkhiat uhleh liausum tepen cihtak luakhollo mawk hi. Singapore gampen leitung ah gamkhangto mahmahkhat ahih hangin alungsim agina hethetlo omlaimawk uhhi. ZD Sawltak #zomidaily
Comment piaknop aomleh...