Singapore gam mite’ tungpan’ Zomite’ sintheih ding

Singapore gam mite’ tungpan’ Zomite’ sintheih ding

Singapore pen minamkim tenkhopna khuapi khat gamkhat ahi hi. A
miteengte pen, Sen, Indian, Malay, Philipino, Thai leh Indonesian mite
hi pen uh hi. Tunaailamin nitumnalam pan mikangte tampitak peem uh in,
Singapore-te tawh kitengin a tate uh mikang a suak honpi om ta kici
hi. A khuapi sung siangthosak sitset uh ahih manin napnitpak cih
thadah cilsiatpak nading mun nangawn om mello hi. Lam gei-ah ninbung
koih kawikawi uhi. Kawlgam bangin a ninpaihte uh namsia ngemngam
cihbang omkhollo hi.

Nuntakzia

Khuapi khat gam khat hi in, leitang neilo uh ahih manin anteh theipuam
ciin na’ng mun awng lo hi. Tua ahih manin pilna siamna vive tawh nasep
loh a phatmawhna gam ahi hi. Mikhat in pilna zaausin loin ama uuk
pilna mah a nuntakpihtheih dong sinpah a, tua tawh na semin nungta hi.
Baan sin kawikawi-in theih tumteng mel neilo cih bang om lo uhi. Kumpi
hoih in gamkhangto ahih manin neksim taaksim om lo a, nuntak nuamsa
uhi. Khuapi khat gamkhat ahih mahbangin kumpi a gamsung ukzo mahmah
ahih manin siatna bawlngam omlo ahih manin lungnophuai mahmah hi.

Vanman tam

Vanman tam mahmah hi. Ahi zongin kumpi in khasum tampipi pia ahih
manin vanman tam taleh a khasum uh kham mahmah lel uhi. Nekval
kholding neilai uh ahih manun a gammite in zuauthu tawh sumngahna deih
vetlo uhi. Singapore gam mite’ nuntak danin nuntakzawh nadingin takhat
nei nupa kopkhatin S$ 7000 ciang bang neih loh phamawh hi. A
noptatnuam zawdiakten bel S$ 8000-9000 bang peuhmah kisam ding kici
hi.

Nasep tam

Gam khangto khinsa ahih banah khantoh lam manawh toto lai ahih manin
nasep tam mahmah hi. Nisim mahin taih-inn sangpipi kilambehbeh mai hi.
Kawlgam leh India pan bang Inn lamna ah sum thalawhin a pai
kitamphadiak hi. Numei Innteeng nasep tawh sum thalawh aa pai Kawlgam,
Philipines leh Indonesia pan tampen kici hi.

Inn sangpente

Singapore gam a Inn sangpen te One Raffles Place (Overseas Union Bank
Centre/ OUB Centre zong kici), Republic Plaza leh United Overseas Bank
Plaza One te hi in, pi 919 sang uh a, leitung aa Inn sangpen 123 na
ahi uh hi. A kilam laitakin leitung a sangpente hi. A kilam lai-in
kumpi-in pii 919 val lam lodingin a ciangtan ahi hi.

Five Star Hotel lianpi, Swissotel the Stamford, a sanna pi 741, dawl
73 pha a, asungah Innkhaan 1261 tak om hi. Hih Hotel ah Zogam a khua
‘Myo’ (town) lobuang khuate’ lakah a lianpen khat Inn 800 val khua ahi
Laaitui khuazaangbup thawltakin a kiteng thei ding ahi hi.

Marina Bay Sands Hotel (Five Star Hotel), khuampi bang a kilam Innpi 3
in teembawpi bangdan khat a kidawhphei deeudaau (Sands SkyPark= sehnel
a kiphah vantung paakhuan I ci diam?) khat a luzaangdawn uh ah
puakhawm uhi. Tua a luzangdawna vantung teembaw’paakhuan tungpan’
Singapore khuapisung khempeuh kimu thei a, etlawm mahmah hi. Tua
vantung teembaw’paakhuan ah tuipeekna (swimming pool) om a, anawl,
asunglampangah thaankung kigualphei ditdetin nopci mahmah hi. A geiah
nawituam le sungteen bektawh a thaallup diatduat tawh, bawk diipdeepsa
in nitaang aa kipho zong kitawlngalo hi. Huihsiang kingah in I nak
bang vang hauhau in, I huih diik nuam mahmah hi. Khuampi bangdan aa
kilam innpite a thum aa kigawmin dawl 55 pha in hotel khaan 2561 pha
hi. A sungah Leitung nopsakna namcin kidim in om hi.

Neek le dawn

Neeksuk tawm ding tawh buai lo uh a, buhtang, mehteh mehgah a limcite
bek gampua pan lei uh hi. Nahtang bang ahih leh Philipines leh
Switzerland gamtebek pan a limcipentebek lei uh a, lenggah bang a
muneilote bek leinuam se uhi. Anteh theipuamte asiangsitsetsa-in zuak
uhi.

Kikem khol uh

Na khat peuhpeuh a hih khialhlohna dingun a hihtheih tawp mah-un
kisin, kikeem khol uh hi. Eg. A phone / sumbawm tawi-uh a pumpi-uh
tawh kikhensak ngeilo uhi. Van lei ciangin sum I lakkhiat ding teh I
phone pen I mai a om taudawh lem khat peuhpeuh tungah koih ziauziau
thei hihang. Tua pen ginatlohna ci uh hi. Na van pen na pumpi tawh
kikhensak kei-in kimangngilh khathei hi ci’n kihilh ngiat uhi. A van a
nate uh a mangngilh loh nangun kikemkhol uhi.

Guihtheih Khamtheih

Zu pen kumpi phalna (permission) tawh kizuak a, zukhama kitom
cihkhawng om vet lo hi. Khuasungah zukhamsa a, a vak bang ka mungei
kei mai hi. Mun khempeuhah zatumbaang kipaisak loin lamgei-ah ninbung
kikoih a tua ninbung bekah kipaisak hi. A hoih hetlo khat pen
gamkhangto mahmah muhna zai, theihna zai buangdingin khangno, tangval
bek zong hilo, nungaknote nangawn zatep tamlua ka sa hi. Kumpi
vankhaam zatui (drug) tawh sumbawlte sihdan hipah lian hi.

Cihtakna

Citak mahmah uh a, thumaanlo pi aa ngahna deihvet lo uhi. Lampi-ah na
sum S$ 100 na kiasak zong Singapore gam pan a khangkhia ngiat mikhat
ahih leh tawm hetlo kha ding hi. Malaysia, Indonesia leh gamdang
tuamtuam pan a peemte in a top uh leh hi khabek ding hi. A khawsung
mun khempeuhah CCTV (mite gamtatna etkiktheihna dingin Video a na
lasim setvanneu) koih uh ahih manin thumaanlo gutanuam a om zongin
guta ngamlo uhi.

Cidamna thupisak uh

Mikhempeuh, nungak tangval, nupi papi hun awng bawlin pumpi cidamna
dingin nisimin lamsiau leh a tai kitawlngalo hi. Nupi kum 50 a phakhin
pawlkhat bang khua-ulkaai peekpaak mahin, nak phanphan kawmmahin taai
uh hi. Tua ahih manin mithaulualiang cihbang tam lo uhi. Mi khempeuh
tangzangin gamtang zetzet uhi. A kum tam ciangua a cidamna dingun a
thahat lai un nek leh dawn, cidamna tawh kituak mah ne in, a pumpi uh
kikemsiam mah mah uh hi. Nupi kum 40 phakhinte nangawn zong,
nungaknote mah bangin zeen zitzetin tangzang zialzialin gamtang uh hi.
Kum 60 in zong hatlai mahmah uhi. Khatvei ka taxi zuih uh a hawlpa pen
kum 75 pha ta ing ci hi. Navak mahmah lai mawk hi! Singapore gamsungah
damlo, natna neite (AIDS, TB, etc) lutsakvetlo uh hi. Naupangte a
lungsim le a pumpi uh a kibangaa cidamin a khanphat theih na’ngun mun
tampitakah naupangte kimawlna ding bawlsak uhi.

Khuasung vaksuk vaktohna

Khuasung vaksuk vaktohna pen City Bus kicing mahmah a, meileng zong
leitung leinuaiah minute 5 halin taitai lel hi. I paina’ng a gamlaat
leh meileng tawh paileeng kimanlang zaw hi. Nakhempeuh setlam pilna
(Electronic System) vive tawh kisem hi. Khuasung bus le meileng I
tuanteh a sumtangin kipia loin credit card a kici a neuliklek khat
kizang hi. Tua Credit Card neuliklek sungah sum thunsa tawh bus le
meileng kituang a, a kongkhak sunglamah sumpiak na’ng setneu khat na
om a, a maiah I card phah leeng asunga om I sum nadawhkhiatsak hi.

Puansilh niikteen

A sauvei nai hetloin nitumna lamten lawh ahih manin nungakte puansilh
niiktenziate pen ei Pasian thu-umte adingin kidop ding thupi mahmah
khading hi. Banghang hiam cih leh, nungakte’ bombi tom leh niikbawk
teente pen sing theilua mahmah ahih manin tu le uh a niikbawkun a
sungteen-uh selzo mahmah lo thong hi. I Kawlgam khawngah zanin
khuasungah tuabangin vak le uh buan a tuakkha tam mahmah dingin uphuai
liang hi.

Upna thu

Thumaanna leh cihtakna bulphuh uh hi. Law (kumpi thukhun) in ukzo
mahmah ahih manin na khempeuh thukhun tawh thu kigen hi. Kician sitset
ding. Mihing lampan I hih theih tawpin hanciam ding, tua tungtawnin
Pasian in thupha hong pia ding cih pen a Pasian thu pomzia uh ahi hi.
Nasep na hanciam kei a, na thadah leh Pasianin hong hehpih loding hi
cih a lungsim puakzia uh ahi hi.

Bang hangin Singapore khangto hiam?

Singapore pen hunkhat lai a Malaysia kumpi in a hawlkhiat hi a,
gamkhatin a dincil-in buannawnglakpi ahi hi. Kum 20 sungin leitunga,
gam khangtopen leh gamsiangthopen hong suakziau hi. Hizaha manlangtaka
a khantohna pen nungdiaka hong nusia a Prime Minister pa uh Mr Lee
Kwan Yeo makaih siamna hang ahi hi. Singapore mi khempeuhin Lee Kwan
Yeo it in, atungah lungdamin zahtak mahmah uhi.

Banghangin hizahtakin huntomno sungin manlangtakin khangto hiam cih
leh Mr Lee Kwan Yeo in a makaihna-ah gamkhantoh nading a thugui let 3
te hang ahi hi kici hi. Tuate pen:

(1) Mangpau zatna hang: Mr Leo Kwan Yeo in Mangpau-in leitung zeel
ahih manin, sum lei sum zuakna-ah Mangte tawh kipawl lohin
kikhangtothei peuhmah loding cih tel mahmah ahih manin Mangpau pen
Singapore gamah pautaang suaksak ek hi. Mangpau tawh a neng a tawngin
a deihna uh pulaak thei uh ahih manin leitungbup tawh level aa
sumbawlna hong lempha mahmah pah hi. A kigenna ah Sente (Chinese) ten
Mangpau kin in siam uh hileh leitungbup ii’ sumlei sumzuakna khempeuh
Sente khutsungah tumaa kum 20 laaipekin a tungkhin ding hi kici hi.
Indonesia te’n zong Mangpau a kin lohna leh a siamloh manun a khantoh
zahdingin a khantoh lohna uh kiphawk thak uh a, tun nakpi-in sindingin
kihanthawn ta uh hi.

(2) Pragmatism (A taka Sepsuahna): Mihingte nuntakna ah a taka kizang
theiding, hamphatna leh khantohna hong piathei dingthute bek buaipih
ding ci hi. A thu hoih mahmah taleh I nisim nuntakna adingin
phattuamna le khantohna hong piatheiloding nate tawh hunbeisaklo ding
ci hi. Gentehna in Pasian thuthuk siam (Theologian) khatin a tutmunah
tukawmin Pasian a om takpi tam maw? Ahih kei leh a om taktak lopi ahi
tam maw? Hong huhnuam Pasian ahitam maw? ci a sam puangliang, sam
apliang zahdong a ngaihsutna in a nuntakna ah hamphatna a piakloh
banah kiamsuksak zaw hi. Tuabanga hunbeisak sangin Pasianin hong huh
leh huh loh a takin I theih nadingin Amah Pasian muanna tawh
kalsuankhiatna leh atak a sepkhiatna thupisakzaw hi. A taka kizang
theilo thu ngaihsutnate hemkhia hi. Tua manin Singapore-te pen tu
ngeungau a thu mawkngaihsutsutna tawh hun beisak cih bang omlo uhi. A
lungsim ua om a ngaihsutna khat peuhpeuh uh pen a takin semkhia
nuampah uhi. Lam a pai uh ciangbang pai setset uh in a thadahpai
nuangnuang cih om lo hi.

(3) Survival of the stronger (A thahat zawzaw gualzawhna): A gammite a
hoihpen a siampen ahih ding kidemsak hi. A siamte huhin laamto hi.
Tuabanga a pil le a siamte deidan nei loin a laptohna hangin a gam
mite pilna lamah nakpi takin hong kidem uh a, tua in a gam khangtosak
hi. A pil-lo le a siamlote pen kinawl khin ahih manin pilsinna-ah ka
lawmpa sangin mat tam ka ngahzawk mateng, ka pilzawk mateng cih
kidemna lungsim tawh a gam mite hong khangkhia uhi. A pilte kumpi’n a
pilsinna ah a kisamte huh hi. Tua kidemna-in manlang taka khantohna le
lawhcinna a pia na hi gige hi. Pasian thu ah a nuakaaite kihehpih a,
ahizongin leitung thu ah a nawkaaite kinusia lel hi. Tua pen leitung
beidong a beilo ding ahi hi.

Ei Zomite’n zong I mimal nuntakna ah I hihtheihtawpin, I sepna
peuhpeuhah midangte sang’ I pilzawk, I khantoh zawkna dingin hanciam
mahmah leng i mazang ding hi. I pianna khuaciat pan’ a pil, a
pattahhuai leh a pattahtaak mite, khua kipawlnaciat pan’ pahtawiin, i
laamto ding a, I Zomibup hong laamtozo ding khangno pilna neite ZYA
kipawlna mintawh pattawiin tawsawnto leeng I khangto zaw lai ding hi.
ZBCM pan tan 10 all “D” ngahte sumtang teinsawm (Ks. 1000000) tawh
hong pahtawi tak uh ciangin i Zomi khangno mipilte adingin naakpi-in
lampi hong kihongtuam hi. Zomi sungah a lapsangtaak, pilna sangpi
sinzo in Zomi ading phattuamna le khantohna hong semthei ding, sum
neilo i khangnote I minam kipawlna tawh tawsawnin domto ding hihang.
Tua hi leh Zomite manlangtakin i khangto ding hi.

Thang Suan Kam
Inter-cultural Studies

Bethany International University
Singapore