Singapore Botanic Gardens ah singkungkhat pukin mi 1 denglum, 4 liam

Singapore Botanic Gardens ah singkungkhat pukin mi 1 denglum, 4 liam

“Singapore Botanic Gardens” kici Singapore gamsung aom singkung tuamtuam kisuanna huansung ah Saturday (Feb 11) ni in Tembusu Tree kici singkungpi khat puksuk in, mi 1 denglum in adangzong mi 4 liam cih CNA pan kiza hi. Singapore Civil Defence Force (SCDF) te genkhiatna ah nitaklam 4:25pm hunpawl in thupiang hi a, asi leh aliam mi 5 teng National University Hospital ah kipuakpah cihi.

National Parks Board (NParks) inzong nitak 8:32pm hunin Statement khat khahkhia uh a, hih tuahsiatna hangin mikhat in hongnusia cih gencianna nei uhhi. Bangci bangin hih singkung puktheihiam cihzong kancianna kineiding cihzong Agency in genkhia hi.

Ahi zongin tulaitak kasep masading uh Priority ahihleh asipen leh aliam te ii innkuanpih te kisapna te ah panpihding kamasading uhhi ci’n Statement ah genkhia uhhi.

Singapore Police te genna ah asipen kum 38 aphakhin numei khat hi a, India National khat cihi. Asi nupinu ii pasal pen kum 39 aphakhinkhat hi a, French National khat kici hi. Atate zong apeeng kumkhat aphapan 2 tawh a innkuan 4 un hih Botanic Garden ah hunnuam zangding in apai uh ahihi. Ahi zongin azi asih banah apasal leh atate zong liamna ngah uh cih kiza hi.

Hih singkung apuklaitak amitawh amukha Jonathan Ang kicipa ii genna ah amahpen ageina munkhat ah atut hithiat laitak hi a, thakhatthu in vanging bangdan in agin ngaihmahmah khat kaza cihi. Ka etciangin singkungpi khat puksuk in, agei aom singkung khatzongtawh tuksukkhawm cihi.

Singkung puksuk in mi dengkha cih akitheih ciangin ageinai aom mi 100 val bangin kidelh ngeingai in, tua singhiang te kikaikhia ngeingai ci’n genkhia hi.

Singapore Botanic Gardens’ website ii genna ah hih Tembusu Tree kici singkungpen kum 270 bang upa khinding ci uh a, hih Botanic Garden sung aom tua singkungte lakah a upapen hiding in ki ummawh cihi. Singkung asanna pen Meter 40 (Pi 131) bang sangding cih kiza hi. ZD Sawltak #zomidaily