Singapore aom “City Harvest Church” pawlpi sum buaina

Singapore aom “City Harvest Church” pawlpi sum buaina

Singapore gamsung aom “City Harvest Church” kici Pentecostal Megachurch ii neihsa, pawlpi sum pen makai pawlkhat in na phengzatkha uh ahih manin 2010 kum pet akipan tunidong Singapore gamsung ah aki buaipih mahmah thuthang khat ahihi.

City Harvest Church pen 1989 kumin Pastor Kong Hee in apatkhiat ahihi. Pawlpi sum “Church Fund” S$50 Million aki phengzatna vaitawh pawlpi aphutkhia Founder Pastor Kong Hee zong akimanlak ah akihel a, thong ki kiasak hi.

2015 kumin pawlpi sum phengzatna “Criminal Breach of Trust” tawh pawlpi makai mi 6 thong ki kiasak hi. Thongkia pen Pastor Kong Hee leh alawmte Tan Ye Peng, Chew Eng Han, John Lam, Serina Wee, Sharon Tan cihteng ahihi.

Hih City Harvest Church vaipen Prosecutors te’nzong Singapore tangthu sungah “the largest case of misuse of charitable funds in Singapore history” ci’n genkhia hi.

Kum 52 aphakhin Church Founder Kong Hee pen November 2015 kumin thong kum 8 akiading in thu aki khensa hi a, Friday (April 07) ni in athongkiatding kum 3 leh alangin kikhiapsak hi. A thongkiatpih alawm pawlpi makai mi 5 tezong thongkiat kum ki khiapsak tek hi.

Thongkiat kumding aki khiapsak pen lamdang kisa mahmah in, Social Media tungah minthang mahmah hi. Thongkiatkum kikhiamding cih thukhente’n agenkhiat khitzawh nai 4 sungin Singapore gamsung aom Twitter azang te’n hihvai Comment pah ziahziah uhhi.

“City Harvest” cihleh “Kong Hee” cihpen Twitter tungah Hashtag ahih keileh Trends atampenpen hiliang hi.

Straits Times te’nzong thongkiatkum kikhiamta cih Facebook tungah agelhkhiat khitzawh uh nai 4 sungin Comment bekbek 500 valbang ki gelhsukpah zihziah cihi. Comment atamzaw pen aki lungdampih hilozaw a, Singapore thukhenmang te’n akhentatsa akhiapsuk pen lamdang asa kitamzaw hi.

Singapore Judicial System pen abangci himawk hiam? Mi thupi “White Color” khat ahih manin athongkiatding akum Discount a ngahthei ahiam? Ih naupang te hihbang gamtatna diklo alaknuam ihhihiam? cihbangdan in lamdang kisa in Comment kipia ngeingai hi.

More: Singapore ah Kawlzatui “Ananda Thukha” neklohding in thuneite’n pulak

Thongkiat kum akhiapsak uhpen zanhal Friday ni in thupiang hi a, tunidong mah Singapore gamsung ah thuthang minthangpen khatmah hilai hi. ZD Sawltak #zomidaily