Singapore ah Zika Virus a ngah khat om in ki patau mahmah

Singapore ah Zika Virus a ngah khat om in ki patau mahmah

Singapore gamsung ah Zika Virus a ngah numei khat om cih Straits Times pan kiza a, hihpen Zika Virus a ngahmasapen zong hipah hi. Hih numeinu pen kum 47 aphakhin Malaysia gammi khat hi a, Singapore gamusng ah nasem in aomkhat ahihi.

Abeisa hunsung in Zika Virus akilawhna gamte ah zinkhia ngeilo ahih manin, hih natna pen Singapore gamsung panin a ngah hikhading hi ci’n ki lunghimawh mahmah a, Health Ministry pan inzong tuanu leh a innkuanpih, aveng apam teng limtak in Screening bawl uh cih kiza hi.

Zika Virus ihcih pen adiakdiak in naupang suakcil te mibanglo, alukhawng golgawp cihbangdan natna namkhat hi a, Singapore ahzong adiakdiak in nupi naupaai te cidamna kidop mahmahding ki vaikhak hi.

Zika Virus natna ii alauhuai ziapen abeisa hunsung inzong Zomi Daily panin ihsuaksak zelzel ngeikhin a, adiakdiak in nupi gai, naupaai te kidop huai phadiak hi. Hih natna a ngahkhakleh asung aom naungek pen mibanglo in piangthei cimawk hi.

Tua ahih manin Zomi sungah nupi naupaai laitak te ihki doptheih nading in ki gensawnhuai mahmah hi. Adiakdiak in Zika Virus pen thokang panin kilawhthei ci ahih manin, innsung innveng ah thokang aomleh sianthoding, ki puahphatding thupi mahmah hi. ZD Sawltak #zomidaily

Zika Virus bang hiam? Bangci kidop ding?

Zika Virus cia akigen den pen Tho pehna pan a hong piang natna nam khat hi. Hih natna pen Brazil gam pan April 2015 kum in a kimu khia hi in, hong kipatna mun min pen Zika khua pan hi. 1947 kum pek a om khin hih tuak hi.

Zika Virus bangci dan in hong kipan hiam?
Zika Virus pen uham leh naupang in zong ngah thei uh hi. Hih natna aneite pen mitsan, luna, guh-leh-taang kizopna teng zong na, ciithak, vunkaang in a ci uh zong sa hi. Pawlkhat leuleu luaksuak, cibawk, ngong na, khuh cih danin om uh hi. Guhlehtaang kizopna cih lo buang adang natna neuneute pen nithum sung khawng in dam pah lel hi. Ahizongin Zika Virus tawh asi om hi cih pen November 2015 kum in kikipsak pan hi.

Zika Virus pen bangci dan in kithehthaang a hiam?
Tho (Aedes) pehna pan hipipen hi. Nawizu pan, zun leh khaksawh/cil pan, bawtui pan kilawh thei hi aci zong om a, tua te a takpi mah hiam cia a kikan saan laitak hi.

Zika Virus ngah lohna dinga kidalna zatui a om nai hiam?
India in kidalna zatui/zaha mukhia khin ci. Research nasia takin a kibawl laitak hi.

Bang zatui/zaha tawh kikem leng hoih pen ding hiam?
Paracetamol mah kizangh phot ding hi. Zatang dang bangmah zat ding siavuan ten kipsak nai lo uh hi. Tu tadih in zatui/zaha a kimu zo nai lo hi phot hi.

Kikep dan ding pawl khat
Thopuan khung den ding, puan bansau silh ding in, tho ong peh lohna dingin thopeh dalna zatui ih vun tungah zuut den ding. (Source:Global New Light of Myanmar) ZAM iNFO