Sihloh phamawh sih ngamna ~ Suangh Dal

Sihloh phamawh sih ngamna ~ Suangh Dal

Mihingte’ sih ngamna pen sihloh phamawh sih ngamna hi lel hi. Sih loh a phatmawhna pen Mawhna hang hi (Rom 6:23). Ko a si ngam hi ung cise ta kei lecin a si lel ding hiteh. A si ngamlote zong si lel ding hi. Sih ngam kul se lo-a kisi tek lel ding ahihi.

Adam le Eve in Pasian thupiak mang-a nuntak ding sangin Pasian’ kham singgah ne-in si ngam zaw uh hi. Tua hi-a si ngam ing cih pahpah det keei pen kiphatsakna hi-a thumanlohna khat ii gah ahihi.

Mihingte’ sihloh phamawh sih ngamna le i Topa Jesuh ii sih kul kilkel lo sih ngamna thu kibang thei lo hi. Amah pen sih kul kilkel lo hi napin Singlamteh tung nangawn ah sih ding a ut hi (Filippi 2:8).

A si veve lel ding khawng ISIS te banga sih ngamna Tibet Phungzyi te banga amah le amah meitui (‌ေရနံ) kibuak-a sih ngamna daan khawng pahtak kul se lo hi.

Tua bang-a a si ngam mite biakna mi i sak mahmah khak leh i Topa Jesuh in hih bangin na gen hi: “Ka neih khempeuh midangte tungah pia-in Pasian’ nasepna hangin kihaltumna ka thuak zongin itna ka neih keileh a phattuamna bangmah om lo hi” na ci hi (I Korin 13:3). Sih ngam ziau sangin nuntakpih ngam cih pen Christian zia ding hizaw hi.

Jesuh tungah a piak bangin Pasian in vangliatna khempeuh ong pia ding hileh a si ngam tamtam mahmah ding hi ci kha ken. Jesuh bangin sih kul kilkel lo dinmun (condition) ah om lecin sih ding ut het lo kha ding hiteh. “A taktak in cile’ng ka si ngam a kicih tek hangin sih ding vai taktak om leh kuamah si ngam lo zel hi” (Mangkangte’ Paunak).

Sih loh phamawh sih ngamna thute nusia-in sih kul kilkel lo kimlai Singlamteh tung nangawn ah sih ding a ut Jesuh Khrih thu nuntakpih zaw ni.

Thumaan gen ngamna
Lungdamna thu a maan banga nuntak pih ngamna cihte nuntakpih ding hizaw hi.

Evan. Suangh Dal