Siatna khempeuh kipatna bulpi Hillary guallehna hang

Siatna khempeuh kipatna bulpi Hillary guallehna hang

Nov. 12, 2016: US Presidential kiteelna bei ta a, bang hangin Democratic presidential candidate Hillary Clinton poll khempeuh phial in cing ding hi ci-in ci-in gen khol napi-in Donald Trump lel mawk ahi hiam? Hillary Clinton in US presidential election a lelhna hang pen kum tampi tak kinialna om ding hi ci-in Politico Magazine-a sem Todd S. Purdum in ci hi. Hillary pen kum tampi om muang hithiat (complacency) a, journalist ten 2008 leh 2016 presidential campaigns kibang ding bangin a gen manin kimuang lua a, state tuamtuam thudon loin president kituhna ding bek leh a cing ding bekin kituat hi ci hi. “Hillary in 2008 kiteelna panin a cing denna “blue states” kici Michigan, Pennsylvania leh Wisconsin state Presidential primaries ah a cin’ khit nungin thudon lo ahih manin Clinton in White House taan lawh hi ci-in gen hi. (Hih state-te ah Trump cing hi).

Quartz-a sem Tim Fernholz in Trump in a gualzawhna pen US politics kikhenna hangin a ngah hi ci a, Trump in kum zalom 21 hunin Americate gentheihna a tuahte tangkopih in, a beisa in Americate’ sum leh paai leh ngeina lamsang nopsakna thute gen bel in nei a, mai lam hunah bangci leh kum za lom 21 haksatna tawh kipelh theih ding hiam cih tangkopih hi ci hi. Ferholz in kiteel ma ni 12 ma-in FBI in Clinton in private e-mails server a zatna thu pholak a, kiteel dek mahmah in FBI Director James Comey in Clinton in thukham palsat lo hi a cih hangin Clinton deih tampi taisia khin man hi ci hi.

Daily Beast-a sem Betsy Woodruff in bel Clinton in a vote zonna (campaign) amahmah in siasak tawm hi. President tuh ding hi’ng a cih ma-in zong New York Times in March 2, 2015 in Clinton in US Secretary of State a let lai-in private email server a zatna thu na suaksak ngei a, tua-ah Clinton Foundation in sum man lo a ngahna thu mipi’n theih ahih manin a gamtatna in awksak hi ci hi.

Clinton Foundation in huhna a ngahnate thuk kikna dingin na hoih tampi thukham palsat in sepsak ahih manin President cing leh zong company lian leh gam tuamtuam huhna piate adingin na sepsak ding a, tua ten thuzawh lua ding hi cih kitel hi ci hi. Hih thu tawh kisai FBI in October 28 in Clinton’ emails kanna nei a, tua hangin minsiatna lianpi ngah hi. November 6 in James Comey in second round of investigation cih nihvei kanna ah Clinton in thukham bangmah palsat lo hi a cih hangin gam lianpi kang khin ta hi ci-in Woodruff in gen hi.

Democrats ten bel Clinton’ guallelhna hang pen FBI Director James Comey a ngawh hangin amau’ buaina zung kipatna pen Democratic Partyte’ policies ah kipan hi ci-in San Francisco Chronical-a sem John Wildermuth in ci hi. Vote zon kipat cil a kipanin US kilaihna dingin Clinton in gum khia zo lo ding hi cih kilang hi. Democratic party-te’ sep leh bawl ding geelna (policies) ah Clinton awkcip in, President Obama term masa in secretary of state a let a kipanin Obama leh Obama’ policyte ah kol bulh bangin na awkcip hi ci-in UC San Diego ah Political Science professor Thad Kousser in ci hi.

Nipi kal khat in nihvei ta a kisuaksak US conservative magazine – National Review (NR) in bel Clinton’ guallelhna hang thu tampi om hi – golhgukna hang, leftism ah kolh bulh a batna hang, zatui lauhuai leh hoih lo tampi a nekna (disastrous health-care prescriptions) hang (a dam lohna thu sim hang), nau suksiat a deih luatna hang, citna bangmah a neih lohna cih teng a tam lo i gen pak theih hi ci hi. US journalist Heather Wilhelmin a laipaih (article) media outlet ah a suaksakna ah, “Thuman pen a pua lamah om lai a, kiselcip zo nai lo hi,” ci hi.

Serbian President Tomislav Nicolic in bel America ten Trump a teelcingna hang uh pen leitung pen kilaih ta a, US gam-a mipilte (elites) khuaphawk loin a ihmutna panin khanglo ta uh a, a kiim a kiang ua thupiangte mu thei ta uh a, US gammi ten tuipi gal leh gam tuamtuamte tawh buai niloh cimtak ta uh a, tua bangin tuipi gal leh gam dangte tawh gal kidona thukim nawn lo uh hi ci hi.

Political analyst ten bel Clinton in nasem mite thudon lo a, nasem mi ten Democrats party nusiatsan uh a, Obama’ hun bangin mivomte ten Clinton ama’ up bangin gum lo uh hi ci uh hi. New York Times in bel Democrats party-te 2008 panin a cin’ toh ngelhngelhna “blue state” a kici Philadelphia, Michigan leh Wisconsin state-te ah cing leh Electoral College vote 270 bang ngah ding a, Trump nuam takin zo ding hi ci hi. Franklin Graham in bel kiteel ma pekin thu-ummi ten thungetna kinei ngelhngelh a, kiteel ni-in thu-um ten vote kikhia in, Pasian in thu-umte hong taisan loin, Pasian in US a siat ding deih nai lo hi. Hih gualzawhna pen Pasian’ aa ahi hi ci hi. -Sputnik (“Root of All Evil: Reasons Behind Hillary Clinton’s Defeat ”/Franlin Graham/ Thang Khan Lian