Malaysia gamsung ah lutkhuan akipialo gamdangmi 63,000 phakhinta

Malaysia gamsung ah lutkhuan akipialo gamdangmi 63,000 phakhinta

Malaysia gamsung ah tukum January kha akipan gamdangmi alutsawm lutkhuan akipialo mi 63,000 phakhinta hi ci’n Immigration Department te’n pulakkhia uhhi. Tuabangin lutkhuan akipialo tepen Immigration Act thukhun tawh kizui in Blacklist sungah akikoihsa te, Criminal Record aneite uhhi ci’n Bernama te’n pulakkhia uhhi.

Hihvai tawh kisai in Director-general Datuk Seri Mustafar Ali in agenna ah Malaysia gamsung ah luttheih nadingin eVisa leh eEntri Online panin angahkhinsa tezong gamsung ah lutsuakthei taktakding cihpen genciantheih omlo hi. Malaysia gamsung lutciangin akitawn ahi leilam, tuilam, vanlam tawh lutna Gate (Land, Sea, Air Entry Points) 137 bang kinei a, tuate ah limtak in sitcianna kinei masaphot dinghi ci’n genkhia hi.

Gamdangmi Foreigners tepen Malaysia Immigration Department panin akipia ahi eVisa leh eEntris cihte aneihkhit hangin Malaysia gamsung ah lutkhuan anei cihbang hituan nailo cihpen kaphawksak phanuam hi ci’n genbeh hi.

Tuabangin Malaysia gamsung ah alutding tepen abeisa in gitloh gamtatna Criminal Record khatpeuh aneihiam, Blacklist sungah akihelkha hiam cihte limtak in ki sitcian dikdek photding hi. Tuapanin ahoihlo muhkhiat khatpeuh akineihleh “Not To Land” akici NTL Notice kipiading a, Malaysia gamsung ah lutkhuan kipiavetlo dinghi ci’n Bernama Radio tetawh Interivew akibawlna tungtawn in Immigration ulianpenpan in agenkhiat ahihi.

Tuabangin NTL Notice akipia tepen Mlaaysia leitang “Malaysan Entry Point” atunkhit hangin hong paikhiatna agam “Country of Origin” ah kipuak kikding cihi.

Malaysia palik (Royal Malaysia Police) “PDRM” te’nzong amau kepsa Intelligence Information te tungtawn in gamdangmi Criminal Record aneisa leh Terrorist Activities gitloh ngongtatna khatpeuh ah akihelsa tepen Immigration Department tetawh ki pawlkhawm in Malaysia gamsung ah alutkik hetloh nadingin hanciam khawmding uh cihi.

Tuabangin alutkik pawlkhat om cihzong kitheikhia a, tuate hangin Malaysia gamsung ah lauhuaisak, nawngkai sak mahmah hi ci’n Deputy Inspector-General of Police, Tan Sri Noor Rashid Ibrahim inzong genkhia hi.

Mustafar in agenkhiatna ah Immigration Act thukhun tawh akituaklo gamdangmi pen January kha panin tuciangciang mi 45,000 kiman khinta hi ci’nzong pulakna neikhia hi.

More: Malaysia Immigration te makaihna tawh khasim in Operasi 1300 vei bawldending

Tuabang in Malaysia gamsung lutkhuan akipialo tepen Malaysia gamsung ah aomngei, Embassy tungtawn in aciahkhiasa, alut kiksawm tepawlzong hileh kilawm hi. Pawlkhat te vanlengtual Kuala Lumpur International Airport dongah tungkhin himahleh akhutpi kimetsak in, limtak sitcianna akibawl khitciangin lutkhuan kipialoziau, ki lehkiksak atuakngei Myanmar gammi pawlkhat om cihzong kiza zelzel hi. Sawltak #zomidaily