Laitui leh Kaptel mawtaw lampivai ~ Isaac Pau

Laitui leh Kaptel mawtaw lampivai ~ Isaac Pau

Zomi leh Zogam apuah azuun dingin Zomi mah hi icihcih hong tangtung dingin ZCD hong gualzo in, mipi’ sinthu, khau bang suut in, tong kikum dingin MP i neihman in lungdam in, i kha muang tuam mahmah aa, lametna lianpi i nei hi.

Zomi te’ MP Pu Kam Lian’ lai at (post) ka telloh pawlkhat dotna leh ngetna a nuai a bangin hong nei nuam ing.

1. India te Ong hih Ding Tdm-Kaptel Tio Lampi vai :

* Bangni bang kha in survey nunung kikipsak aa, banghang in akizong (survey) masa Rih-Tio-Haimual-Lentang-Laaitui-Mansuang-Tedim kikipsak lo hiam?

* Koikoi ton ta leh Tdm gam ton leh hoih lel lo hiam cih huai na cih bangmah in :

AD 2006 kum, India te makai in lampi hong zong uh aa, Rih-Tio-Haimual-Lentang-Laaitui-Mansuang-Lamzang-Gawng-Tedim (Palik leen ciangkaa, Soldier-board) teng ah survey abawl lai in Tio-Rih-Falam cihloh adang lampi survey om nai lo hi.

Tua ahihman in Tio-Haimual-Lentang-Kaptel-Tedim aki survey hun in “Koikoi ton ta leh Tdm gam ton leh hoih lel lo hiam cih huai” aci Zomi leh Zogam apuah ding i MP te leitung ah piang/suak nai lo ahi diam?

2. Ki kankuat :

* Kawlgambup lutang dingin mipi’ deihteel makai thukupna pan khentatna leh gam lianpi khat leh khat thukimna tawh akisem na khat peuhpeuh “Mi pawlkhat Rgn a om kici ten Kaptel lampi tot ding kikankuat ci in gen hi” cih thu tawh thukawng kiheeksak ding makai kumpi anei ihi hiam? Anung uh a zuihtaak takpi mah ding hiam? Uptaak, muantaak takpi mah ding hiam? Kumpi hoih ici thei diam?

3. Ki hazaza leng :

* Ih lampi (Rih-Tio-Tedim) tawh kisai in bang hangin survey kibawl kikkik hiam? Aki survey masa penpen Rih-Tio-Haimual-Lentang-Laaitui-Mansuang-Lamzang-Gawng-Tedim akipsak pah lo te ahaza ici diam? Golhguuk ne ahi diam?

4. Koikoi ton ta leh Tdm gam ton leh hoih lel lo hiam cih huai :

* Hih kammal pen Zomite adingin a zaknop penpen kammal hi aa, ki-itna, khantohna, kikhualna leh kihualkhopna a piangsak ding kammal ahi hi. Tua ahihman in kam bek tawh pau lo in, sepna tawh i lahkhiat hun hi ta hi.

* Akipatcil in Falam lam ah khat leh Tedim lam ah khat bek akizong ahi hi. Tua khit ah bang hang in Tedim gam ah mundang kizong thuah ahi hiam? Ih ZCD-MP te piang/suak nai lo maw? Tu a bang kammal/lungsim nei nai lo uh maw? Thumaan om nailo, golhguuk omlai hizaw maw?

5. Tangthu hoihlo Gam buppi khan toh ding susia te suak ding:

* Hih thukhupna kammal zong MP khat in a lai atna ah thukhupna kammal dingin etlawm, zaknop, simnop in khum mahmah hi.

* Tua ahihman in, tangthu hoihlo at khial hetlo in, gambuppi khantoh ding susia te i suahloh nadingin, i MP te’n hong makaih aa, guptuam paihtuam omlo, neksim taaksim omlo, a kammal bang un thummanna (Justice) tawh ko mipi (Zomi leh Zogam) nong makaih nading un zahtaakna lianpi tawh hong thuum/ngen ung.

### MP te hong post tungtawn in a comment te khempeuh khial hi kici theilo hi. Ahangin, mimal in bangmah kithei lo aa, MP te cih bangbang 100% azui dingin Zomi mipi ki thumang thei mahmah ahihman hi. Hong makaih te ahoih leh mipi & gam a hampha, a khangto ding hi aa, makai hoih i neih kei leh mipi teng hong sutuah in, hong kitawng saksak ding aa, thumaan omlo (golhguuk neekna leh deidan tuam, angvaan tuam neihna) tawh mipi leh gam in kiamsuk semsem ding cih pen i theihsa hi.

Makaite akicin lohna mun ah mipite pilvaang ciat ni. Thu ngetsak ni.

AD 2006 lai, India te’n Rih-Tio-Haimual-Lentang-Laaitui-Mansuang-Lamzang-Gawng-Tedim lampi survey hong bawl masak hun lai in kampheen (interpreter) khat ka hihna tawh MP Pu Kam Lian’ lai post telcian lohna teng dotna leh ngetna hong nei ka hi hi.

Zomi sungah kiu khat pan, Isaac Pau