Siangtho nuntakna bangzah takin thupi

Siangtho nuntakna bangzah takin thupi

Josef in, simmawh bawlsiatna leh haksatna tampitak a thuak banah Pasian mai-ah thuman citakin a siangthona kembit a, a pi-in mawhpih dingin a zolna panin a puan nusia in siatna na taisan a, “….bangci-in hih gitlohna lianpi bawlin Pasian’ tungah khial ding ka hi hiam?” (Pian 39:9b) na ci ngeungeu zen ahih manin Pasian in kumpi tokhom dongah na laamto hi(Pian 39:1-23, Pian 41:37-57).

Daniel zong, kumpi inn sunga an leh leenggahzute tawh a pumpi a nitsak loh nadingin khentat hi. Tua bangin kiniamkhiat dingin a lungsim a khentat masak ni a kipanin, Pasian in thuthuk tampi theisak a, “na thungetna hong zazo in, na thungetna bang a hong pia dingin ka hong pai hi,” ci-in gen hi. (Daniel 1:8 ; 10:12) Siangtho nuntakna tawh nungta dinga a khentat mite thungetna pen Pasian in za hamtanga, a sem khia, a gamta khia nailo nangawn Pasian lungkim lua ahih manin na thungetna kong za khin ci khol liang hi.

Leitung mite hong hon/tan khia ding Jesu’ suahna dingin zong leitungah numei tampitak om mah ta leh Pasian in nungak siangtho Mary mah na teel sese hi(Luka 1:26-38, Mt 1:18-25). Mary in ama’ tungah Pasian sep na lamdangte’ hangin Pasian’ minphatna la ana sak hiauhiau mah bangin(Luka 1:46-55), Pasian’ deihna sungah thuman citakin siangtho nuntakna tawh a nungta nupi, papi, nungak tangval(khangno) a kuamapeuh in zong thuman citakin i siangthonate Pasian in hong mu gige ahih manin ama’ hoihna hong musak in, hong laptoh hun hong tung pelmawh dinga, lungdam kohna la i sak hiauhiau hun hong tung ding hi.

Tua ahih manin i nisim nuntakna-ah Pasian’ deihna bangin siangtho nuntakna tawh nungta dingin hanciam in kisin den ni. Pasian’ mai-ah ahoih/siangtho zo dente i hikei maha, ahi zongin ahoih ding leh asiangtho dingin hanciam a kisin tohtohna pen Pasian’ deihna ahi hi. Pasian deihna banga nuntak zawhna dingin kisinna leh hanciamna aom kei leh tua nuntakna pen a dik/maan tapidaw(Christian)nuntakna hi thei ngeilo ding hi.

Pasian in na lianpi/lamdang khatpeuh a sep ding ciangin mite’ muhna/theihna ciang bek hilo in ama’ muhna mahmahah siangtho nuntakna tawh a nungta mite mah na zangh/teel masa zaw hamtang hi. A siangtho lo khempeuh Pasian in a zangh vetlo, a zangh nuamlo cihna hipah lo a, a siangthote mah Pasian in na deih/teel masa in, laamto a, thupha pia-in tua bang mite’ tungah na lianpi/lamdang sem zaw hamtang hi, aci nuam ihi hi. Pasian pen itna Pasian ahih mah bangin abeisa hunin bangzah takin siangtho loin kisia mah ta le’ng i kisikkik taktak nak leh hong zangh nuam veve, hong zangh thei veve Pasian hi leuleu hi.

Siangtho nuntakna pen i kha ading bek hilo a, i taksa pumpi’ ading mahmah in zong a kisam ahi hi. Pasian in mawh nei mite’ kisikkik hun ding leh khamtheih guihtheih zangh in siatna tuamtuam sungah abual mite’ kikhel hun ding hun hoih hong pia den hi. Hun lap takin i kikhel theih leh eimah kimet dinga, hun lap lo a, i kikhel man kei leh eimah kisumh ding(eimah in kithuakkik ding) hi cih pen i phawk gige ding ahi hi.

Pasian in, siangtho nuntakna tawh nungta dingin a khentat mite’ tungah lungkim mahmaha, ama’ deihna bangin siangtho nuntakna tawh a nungta mite’ thungetna za-in, ama hoihna leh ama vangliatna tua bang mite tungah musak/kilangsak hamtang hi. Siangtho nuntakna hanciamin kisin ni. Pasian’ vangliatna i mu ding hi. Amen

(Pasian’ mai-ah kisaktheih pih ding, hoihna themkhat zong kanei kei-a, ahi zongin diklopi dik hong tangsak Pasian’ mai-ah hoihna dingin a hanciam toto ka hizaw hi ).

Khazih sungah, ✍️ David Tuang