Siampi leh Tuucing (Priest and Pastor) ~ Tual Khan Suan

Siampi leh Tuucing (Priest and Pastor) ~ Tual Khan Suan

A nungta, van le lei a piangsak Pasian biakpiakna tawh kisai, biakna nasepna a kizang kammal ahihi. Pasian thu i Zogam ah hong tun ma hun in i kammal sungah a om hangin kizang lualo hi. Hih kammalte gel pen i Christian upna tawh ki zom kammal hi a, Pasian thu genna leh Pasian tawh kisai thute bek ah kizang zaw hi. Christian upna i gam hong tun ma in i pu le pa ten, dawi leh kau na thoih uh a, dawi lungkim sak na sawm uhhi. Dawi a thoih uh ciang in, dawite leh mihing kikal ah kizopna a nei ding in mi khat na nei uh a, tua pen “Siampu” na ci uhhi.

Siampu i nasep pen dawi thoihna ah makai ding, mihingte deih le sap teng dawite tungah gen sak ding, dawite deih bangin mihingte a gamtat theihna dingin dawite tawh kiho ding cih a hihi. A masa lai in Siampu pen mi khempeuh in sem theilo a, siampute i suan leh khakte in a kiluah suk nasep khat a hihi. (Hun khat khit lamteh a kisapna zui in Siampu sinna tawh siampu a suak zong om toto hi.) Siampu te in dawi thoihna ah makai a hih bangin gawh le lup a om teh zong a mau nek ding a tuam in kikhen sak a, sa sin sa lung teng cih bangin Siampu te kipia hi. Zu le sa zong Siampute nek masak loh in kine lo hi.

Dawi leh kau thoihna panin Christian upna ah Zomi in biakna i khek uh ciangin i biak piakzia leh paizia kilam dang a hih manin kammal zat zong kibang nawnlo hi. Christian upna ah thu um mikhat i nuntak zia ding lahna pen laisiangtho sungah a kimtak in kigelh a hih manin upmawh thu tawh phuah tawm theih om nawnlo hi. Laisiangtho lui sung a Pasian biakna mun ah a makai dingin Siampi (Levi) suante bek in na sem theihi. Pasian mahmah in zong a MAH leh a mite kikal ah kizopna a nei dingin Levi suan leh khakte tungtawn bek in na nei hi.

Mi mawkmawk khat in mawh sutna, Pasian kiangah deih ngetna pen a Siampi te tungtawnlo in nei theilo hi. Siampite lungkimsak kisam a, Siampite lamlahna dan bek in Pasian tawh kizopna om thei hi. Tua bang mah in Siampi namte pen mi mawkmawk (layman) te tawh ki nahvawhlo uh a, a mau teng pen mite sangin a siangtho zaw in om uhhi. Laisiangtho lui sungah Pasian tawh kizopna pen deii nih in om hi. Mite kitangsapna teng Siampi ten Pasian tungah ngetsak leh Pasian lamlahna pen mihingte tungah gen kikna ahihi. (I pu le pate dawi a thoih hun lai ua, Siampute in dawi le mihing te kikal ah kizopna a neih sak bang a hihi.)

Siampite in Pasian tawh kizopna hoih takin a neih theihna dingun leitung nate semlo uh a, mi mawkmawkte in a mau neihsa sungah sawm-ah khat, leh piakkhiatna tuamtuam tawh vak uhhi. Anpal tawh a hizongin, citpiakna tuamtuam tawh a hizongin Siampi te nuntakna dingin kipia hi. Siampi pen khanggui a kizom a hih manin sin theih hilo, ngah mawk theih hilo hi. Tua a hih manin tua hunlai in Siampi pen mi mawkmawkte sangin nuntakzia sangzaw (higher class) suak hi. Laisiangtho lui hun lai in biakpiakna bawlna dingin Siampite kisam hi.

Topa Jesu hong sih khit (AD 30) kimpawl a kipat in a nungta Pasian biakna sungah kideidanna khempeuh hong bei a, biakpiak zia zong kilam danghi. Gentile mi leh Jews mi cih kikhenna hong bei a, Pasian in leitung mikhempeuh a kikim itna tawh hong itna Topa Jesu in mihing khempeuh theih dingin hong lak khia hi. Jesu pen Jews minamte hon khia ding a hong pai a hih na panin leitung mi khempeuh hong gum khia ding hong suakkik hi.

Biakna sungah zong mi khempeuh a kikim, a kibang hong suak pah a, Pasian tawh kizopna ah zong “palai” kulnawnlo hi. Thu um tawh, thu umlo tawh Jesu kiangah kinaih thei, kipai thei kim ta hi. Mawhna nei tawh, mawhna neilo tawh Pasian in a kibangin itna hong lak hi. Biak piakna ding a kibawl biak inn sungah Siampite leh mipi kikal a kideidanna puanpi kibal kek in om nawnlo hi. Mimal kim in Pasian tawh kiho, kikhawl leh kilawmta thei hi. Thu ciamlui hun a Siampi zaa i cihcih pen mikhempeuh in ngah ta hi.

A hih leh biakna sungah Siampi om nawnlo maw? Pawlpi pawlkhat sungah om lai hi. Tua bang a biakna sungah Siampi a zang lai pawlpi sungah Siampi dingte pen laisiangtho lui sunga om bangin a kiluah suk Siampi bang hinawnlo in, kisinna tawh kingah theita hi. A kibang thu ah bel, Siampi suak ding mite in midangte tawh kibanglo in ci le sa lunggulhna teng nusia uhhi. Khamtheih guih theih zanglo, mi gilo tawh kipawllo, leitung ah khiatlah ding inn le lo sum le paii zong lo, numei pasal tawh mawhlo leh zi le ta neilo in siangtho nuntakin nungta uhhi.

Leitung midangte muhna ah a siangtho pen leh pau banna neilo dingin nungta uhhi. Leitung ci le sa lam tawh et in midangte bangin nuntang lo in, leitung ci leh sa nopsakna paisan uhhi. A mau pumpi mahmah supthuakna (sacrifice) nei ngiat uhhi. Biakpiakna lam ah zong makai uh a, a mautung mah ah mihingte in mawhsutna nei in, Pasian leh mite kikal ah “palai” sem uhhi. Pawlpi sungah Siampi tawh ki makaihna pen a diak in Roman Catholic sungah tu ni dong ki mu thei lai hi.

Jesu tatkhiatna tawh hot khiatna ngah ding cih upna nei Pasian thu-um mite in Jesu hang mah in mi khempeuh in Pasian mai ah kibang hi ci’n sang uh a hih manin Pasian tawh kizopna ah Siampi zang nawnlo uhhi. Thu-um mikhat in Pasian tawh mun khempeuh ah kihopih thei leh Pasian tawh kilawmta thei hi cih upna len uhhi. Pasian leh mimal kizopna pen a thupi pen in koih uh a hih manin “palai” tawh kizop ding deih nawnlo uhhi. Tua a hih leh, biakpiakna ah kua in makai ding cih huai hi.

Pasian in mimal tek i lungsim thupi sa pen hi. Thu-um mite a makaih ding leh a lamlak dingin (guidance and instruction) dingin Pasian in mi kisam sa hi. Tua a hih manin Peter kiangah, “Ka tuute na cing in” ci’n vaikhak hi. Thu um mite a lam piallohna ding, an le tui a kisam bangin in a nek theihna ding, leh a lauhuai sih theih siat theihna pan a hu dingin tuu cing a kisam a hihi. Christian upna sungah Protestant pawlpi te in siampi tawh ki makaih sangin “tuu cing” bangin Pasian nasep ding in tel zaw uhhi.

Siampi tawh ki makaihna hun lai (laisiangtho lui hun lai in) biak inn sung na ngawn zong a khenkhen in kikhen hi. Siangtho mun, Siangtho pen mun cih bangin a deidei in om dimdem hi. Siangtho pen mun a cih na ah Siampi a hilo mi mawkmawk lut theih hilo hi. Pasian tapa Jesu hong pai ma hun in tua bang biakpiakna pen a man pen hi a, mihing leh Pasian a kizom sak siampi te nasep pen a siangtho nasep khat na hihi. A hizongin Jesu hong sih khit a kipan biakinn sung a siangtho pen mun leh siangtho mun kikal a kideina om puanpi pen phel nih kisuah lian in kisia cip zo hi. Mi khempeuh biak inn sungteng a lut thei in Pasian tawh kizom thei ta hi.

Tu hun dongin biakna na sem pawlkhat in Siangtho pen mun pen mipi tawh kisai lo hi, pawlpi upate tawh zong kisai lo hi, Siampi te a ding bek hi ci’n a kigen na i za zel hi. Khialhna om kei. Siampi tawh ki makaih pawlpite a dingin man mahmah hi. Mipite pen Pasian kiangah Siampi te’n a thuum sak ciang bek a, a mawhna uh kimai sak leh a deih uh a ngah pan a hih uh teh, siangtho pen mun pen Siampite a ding bekin kilawm pen mahhi. A hizongin Siampi tawh kima kaih a deihlo Protestant pawlpi te in “ Siampi” cih zang nawnlo, deih nawnlo in “ tuu cing” tawh kimakaih a hih manin siangtho mun, siangtho pen mun cih om nawnlo hi.

A zenzen in Protestant pawlpi sunga siangtho pen mun, siangtho mun cih kikhenna om lai hi leh zong Siangtho pen mun a luah ding biakna na sem, Pasian na sem omlo hi. A hangin Protestant pawlpi sungah Siampi cih om nawnlo a, tuu cing bek om ta hi. Siampi nuntak a, a nungta Pasian nasem zo Protestant sungah omlo hi. Pasian na semte in zong inn leh lo zong, sum leh pai zong in zi le ta tawh nungta vive a hihi.

I Zo ngeina sungah biakpiakna leh kithawihna a om ciangin Siampute in mihing leh dawite kikal ah kizopna hong neih sak uhhi. Christian upna sungah biakna pawlpi pawlkhat in mihing leh Pasian kikal ah kizopna hong neihsak ding in palai kisam sak a, tua pen “ Siampi” kici hi. Hih kammal nih “ Siampu leh Siampi” pen kizawitawn leh a kinai mahmah bangin, a deihna leh zatna kibang hi. Khat pen “Siampu”, dawi thawihna tawh kisai a kizang kammal hi a, “Siampi” pen Pasian biakna tawh kisai a kammal a hihi.

Pasian biakna ah Jesu sihna tawh tatkhiatna kingah hi cih upna nei Protestant pawlpi mite in Pasian leh mimal kizopna na bulphuh uh a, Pasian tawh kizopna ding palai kisam nawnlo ci’n a sangte ahihi. Thu-ummite a cing a kem dingin a kizang mi pen “tuu cing” cih kammal na zangzaw uhhi. Tual Khan Suan Dated: August 06, 2015