Sia GS Pau laibu simtak hi
Sia GS Pau dan laigelh mi Zomite in i neih pen hampha mahmah hi hang. Ama hangin Zolai ka sim theih hampha kisa ing. A thugelhte “Laitai” leh “Lungdamna Aw” ah hong suak zel a, tua panin ken ka na meltheih hi. A laigelhte pen pil nading ciim nading vive ahihmanin simnop ka sa a, adang sim ding kal ka ngaklah mahmah zel hi. Sangkah lai a ‘cih simsim khat’ i neih, amau tawh kimuh ding kal i ngaklah dan pian hi.
Laihawm (newsletter) i sim ciang editorial sim masak zel ding hi cih pen a thu in ka thei hi. Tua pen mi pilte ciin dan hi cih zong ka thei hi. Hi le zong kei pen mi kidek zolo mi cihtakmah a sunga thu omte (contents) ensuk in GS Pau cih ka muh nak leh a thulu pen bangbang ahizong thu dangte paikan in ka sim masa hamtang hi. Hih zongsatna a hoihpen mah hiam cih bel thei keng, hi le zong kisik ngeilo hing.
Siapa in Laibu a bawl khin tam? Bangzah a bawl khin tam? Tuate koi ah a kingah tam? A thugelh sate bek zong kaikhawmin laibu in hong bawl leh gocing mahmah ding hiven cih khawng keima ommuanin ka na ngaihsunsun a, tua laitakin “GS PAU GELH ARTICLE TUAMTUAMTE Vol 1” cih laibu hong suak hi.
Kiallap mahmah ka sa a, laibu ka ngah theihna ding lampi kinawh takin ka zong pah hi. Lamzang a om ka u Singpi in hong vaihawmsak a, a khawnkhong in ka kiang hong tun hi. Lungdam mahmah ing. Sim leng beipah ding aih teh ci-in simkhit pah ding bang ka phal kei a, sawtpi sung a tuamna leh a thulu teng bek ka velvel hi.
Thu khat ah, Sia GS Pau pen a min bek kithei in amel kimu kha ngeilo hi. Amah bangci mi hi ding hiam cih zong ngaihsutna limin suai ban lo hi. Tutung in a laibu kawm ah a lim hong tuang ciuceu a, a laigelhte mah tawh kisuun hi. Hoih. Kician. Banah hi sitset.
Hih laibu sungah Sia GS Pau in a gelh thului a ciik mahmah 50 om a, laimai 160 kiim pha hi. Thu mapi Prof. C Thang Za Tuan leh Rev. Dr. Do Suan Mung te in gelh uh a, lungdampihna Rev. Dr. JM Paupu leh Rev. Dr. Go Cin Zam te in gelh uh hi. Maimai lo hi.
Khangnote ading deuha a gelhte kei ading manpha diak hi. Pasian zia leh tong (pg. 44) Ei leh ei kitheihtelna (pg. 66), Nang’ kisaktheihpih bang? (pg. 84) Lai thupi ngaihsut ni (pg. 150) cihte zong hoih diak sa ing.
Ka sangkah lai un ka siapi khat un lai gelhzia hong hilhna ah KISS Principle (Keeping It Short And Simple) cih khat gen hi. Tua pen Siapa in zangsiam ka sa hi. Tua manin zong a thugelhte simnop diak in ka thei hi. A thugente theihnopin telnop hi. Laimal gelh khelh (typing mistake) cih bang zong omlo phial hi. Proof reading hoih takin kibawl cihna hin teh.
Tua banah Siapa in mi lawhcing, mi thupi, mi minthang leh Pasian mizatte thu zong thei zo ka sa hi. Thu kan mi ahihna leh thu ciamteh mi ahihna a thugelhte ah kilang mahmah hi. A gennop tawh kituak dingin thu ciinhuai tampi khat khit khat hong lepsak dimdiam a, khuak tai mahmah zel hi. Thulu bulh zong siam diak sa ing. A thulu i muh phet a zong sim a thalawphuai mahmah dingin hong bawl zel hi.
Hih laibu ka simlai in ong suak thu khat om hi. Ka gual enna khat hi. Kiim leh kianga te in Sunday School kumtawp kaikim lawmman(letsong) khawng a hawm uh ciang, Mizo laibu hoih nono hawm thei zel uh hi. Ei a te pen kuang leh bel cih khawng hi lai phot hi. Tua pen sia a ci ka hi kei a, a manpha zaw om thei in ka ngaihsun hi.
Mailam ah en zong laibu khawng mah thupi bawlin laibu khawng mah hawm ziahziah leng i naupangte lungsim ah lai thupitna i tuh zaw deuh tam? Laisim manphatna khawng zong tam genin ah hi leng mai i nawt zaw deuh tam cih khawng ka na ngaihsun hi. Hih banga kong genna in hih Sia GS Pau laibu pen hawmtak a sa lua, hawm dingin a deih lua ka hi hi.
A bang a bang hi leh, nuntakna manpha zaw lunggulh a thungaihsunsun mi ta dingin hih laibu pen simtak mahmah hi. Khatvei sim lecin na sim kikkik nuam ding hi. A bul pan phot lecin na zongsang ding hi. A hangin nuntakzia ding lam hong lak thu manpha tampi hih laibu sungah om hi.
Hih thu ka gelh laitak in a bu nihna GS Pau Article Tuamtuamte Vol. 2 zong ka ngahkik ta a, sim khit pah dingin pammaih sa ka hih manin damdam in ka sim ding hi. Ka nau Lunnu in a khawnkhong in hong vaihawmsak mah hi a, ka lungdamna lian hi.
Ka zawhna dingin, hih bang laibu hoih hong bawlkhia Sia GS Pau Topa in damna hong piaksak hen la, a suan a khak tampi hong kibehlap lai hen. Amah bang a Pasian a zahtak, pilna a kin, mi citak, Zomi leh Zolai a it, a itna sepna tawh a lakkhia ngiat ei sungah tampi kisam lai hi hang. Hi mah lo hia lawm? Tg. Samuel Nas, Aizawl Mizoram
Comment piaknop aomleh...