Zomite’ tuipigal kankhiat leh khuamuh kipatna – Kum 100 cin Pawipi

Zomite’ tuipigal kankhiat leh khuamuh kipatna – Kum 100 cin Pawipi

Zomi ulehnau, Tusawngteng Piancit pai thu, Tedim Landmark vai Pu King Mang in Tedim’ khuanu, khuapa tetawh avaihawmna ong taangko ban ah, Paul Thangpi (Germany) in Piancit paite thu ong khahkhiat, Piantit paite tulehta suan leh khaak te’n nong suahkhiatte uh ka simciang hunkhat lai GZA Makaite (Singapore) thukikup lai aa, Bishop Felix Lian Khen pulaak, Makaipite’ ii holimna khat kalungsim sung ah ong kilo peuhmah hi.

“Cope Topa Kum 100 cinna ihbawl khit ciang tua nungzui in Laibu neih zawh Kum 100 cin bawl ding hang aa, tuakhitteh Piantit Paizawh kum 100 bawl leuleu ding hihang. Tuakhit ciang Zomite’n Ordination ngahzawh (Rev. Vial Nang) Kum 100 cin, RCM Pawlpi ong tunzawh Kum 100 cin cihbangin minam sung Pawilianpite khaam toto ding hihang, tua hileh Zomite’n ihpiankhiatna suangkhuuk, mangngilhlo zawdeuh ding hihang” acih kaphawk peuhmah hi.

Kum 2017 ciang Zomite Piantit pai kum 100 acingding ahihi. Hih i pu,i pate kuankhiatna tangthu i etkikciang, ei, khangthak te’n thalaak nading, etteh ding, ciapteh ding tampi om kasahi.

Galmai, samai ah kuankhiat ding ut huai hiaulo hitaleh1891 June 23 ni aa Mangkang Kumpi tawh Thaangpi aa galven thugenna, kamciam, Sialngawng banna tawh kizui in “huhloh theihloh” cih imuh ciang:

1. Zomite kamciam a pelhnuam hetlo, sih leh si zaw ding man leh mang zaw ding aci minam himawklo ihihiam! Kamciamsa khat pen akpi phiatnelh tawh a maimangsakte ihihetkei hi, cih kilang mahmah kasa hi. Kisak theihpih huai, angtan huai, leh cidam huai, minam daupai huai zong kasa mai hi. Minamlianpite kalsuan zia, lungtang puak apuate ihihi.

Zomite alom atangh aa pusuah masakna bek zong hilo in, Zomite’n galpi masa hang aa kisia leitung puahkik ding aa ii kuankhiat zawh Kum 100 acingta cilehang zong akici thei ahihi. Tua ahihman in:

2. Zomite ii khuatheihcil aa kipan akisia leitung apuahte ihihi. Tua lungsim ipuaksuakden ding deihhuai kasahi. Zomite ii tual lungsim icihcih in hihlian ahihi.

Tuahunlaitak in isak, ikhang aa i nampihte pawlkhat in kumpi sawlna nial in a om uhhang ei Zomi aa kilote in Kumpi sawl ahihnaakleh nialding lam in lalo hang aa, amau cihmawh laitak lehtat ding gel hetlo, ngim aa neihetlo in, acimawh, adongtuakte ahuh namte ihihi. Hih hunlai mah in India gam makai Gandhi zong eibang mah in lehtat ding nasawm hetlohi. Pute, tote cimawh dongtuak nusiat ding lungsim anei tuanlo (saal ihihang)te ihihi.

Tua ahihman in:

3. Tuni dong minam kalsuanna te, kalsuanziate aa limci, gina, daupai cihbek hilo in (ei leh ei tha ngahlo i kiphunsansan ahiphial zongin), minamdangte muantheih, muantaak, ettehtaak dingin Topa in ong lamsang kasalel hi.

Piantit pai ihPu, ihPa te’n sawlngah manbek hilo, thuman napeuh cihbang hilo, cihtak, kuhkaal tak leh thumaan tak in asepna sunsun uh ah maa apan uhciang leitung gambup phial a uk Mangkang Kumpipa pahtawina, tawisangna ngah in Kumpi Inn sung nangawn ah sapna angah cih itheihi.

Tua ahihman in:

4. Mangkang Kumpipa leh mangkang gambup in, “Zomite acitak, akuhkal, athuman, nasep siam minamte ahi-uhhi” ongcih nungsang, kua in eite lang ah pang in ong minsia sak zoding ahihiam? Tuni dong ihsi, ihsa sung ah hih cihtakna, kuhkalna, thumaannate om lai mahmahhi kacinuamhi. Tuate nosuahsak in phungvuh kik ding hihang.

Mawlaik Mangpi pa’n ong kamciamte Piantit pan ciahkik ciang ong piakloh hang gen in i nei nawnkei aa siikding inzong ih ngaihsun keihi.
Tua ahihman in:

5. Zomite aituam metna, lametna, huaihamna, angsung vai tawh nasemte ihihlohlam kilang mahmah kasahi. Tuahun lai in mangpipa’ kamciam bangin pasal akuankhat zang lo acre 30 ta ong pia hileh, pasal 1033 ai acre tul 30 bang hiding aa thaulawng tul vai aneidingte ihihi. Ei Piantit kuan pen tua lam-en hilo ihihlam kician mahmahhi. Tuhun khangthakte tua lungsim mah ipua lai hiam?

6. Gamkuanpih a si sa khat halding phallo in vuisak cihlimlim pen, ihluang ihban kiphaam mahmah cihna hi aa, itna thupisak ihihlam kilang, lungkim huai mahmah kasahi. Hihbangthu teng (adang tampi zong omlai inteh) i gen khitciang i thanem mahmahna khat zong kamuhi.

Tua in banghiam cihleh, Zomite: I ngahding hamphatna nangawn ala theilote ihihi. Hamphatna pen huaihamna tawh gawmkhialkha hilehang kilawmhi.

Tuahunlai in mangkang galkap na lutsuak uh hizen leh, pasal 1000 in mangkang galkap nasem suak le-uh, i zia ihtong, i lungsim puak dong mangvai pahding aa khantoh vai mahmah dingin ka umhi. Kawlgalkap sung aa General Tuang Za Khai bang vive tulkhat i kigualh sang’ man nei zaw ngel dinghi.(mimal simmawhna hilo, a muibun deuhding thusun ciikgenna)

IhPu, ihPa tetung ah Mangkang Kumpipa King George V in “Mangkang Kumpi gam ka omlai siah uh…” cih kamciam apiaklam i mukhinzohi. Tu’n, hih kamciam ikhahsuahloh ding thupi dinghi. Mangkang kumpi gam zong omlai in Zomite zong i omlaihi.

“Kuhetta, kuhetta aw, nau in ton khuang kai ee, phual aw ong zo in” sapna i khahkhia dinghi. “Zomite in Mangkang Kumpi huhding aa kong kuankhiat uh Kum 100 cingta hi. Hih Pawpi nasia takin khaamding kahihman un Mangkang Kumpite (Royal Family) leh Kumpi gam inn nong sim nadingun kong sam uhhi” cih kawmkawm in, ihPu ihPate kamciam ii thupitsakna, (Sialngawng banna), amau’ Kumpipa’ Kamciamte suut to kawm ding hihang.

Tua kawmkawm mah in Leitung gamtuamtuam pan tuahun lai Mangkang Kumpite huhding aa eitawh akibang aa kuankhia Kumpi gamte zong sam in, Mangkang Kumpite kipawlpih gam kumpi teng zong sam in, Piantit pai Kum 100 cin cihsang in zong “Akisia leitung puahkik ding kuankhiat zawh kum 100 cinna” ici ahizong in hihenla, hih ni zong “Leitung puahkikni” in ong ciaptehsak un ci-in leitung bup ah ih taangko zongin hileh…

Kei mimal hoihsak bang ah hih pawipi ding pen tu’n Kum 5 bek neilai ihihman in kipat huai mahmahta kasahi.

Mangkang Kumpite zintun paikhai nading (guest house) vaksuk vaktoh, ciahsuk ciahtoh(lampi) nading, kizop nading (communication), leitung mun tuamtuam pan aa ong pai gam makaite zintun nading (hotel lianpite), neek leh dawnding, cihte kipat huaita dinghi.

Tuading, ko’ tha, ko’ ngal om peuhmahlo ahihman in, no nong gel uh kuldinghi ci-in embassy ah zasak lehang, (ong huhnop laitak tawh kituak ngel leh), Royal Family budget pan ong geel le uh ei aa in puakkhop mahmah, cihtaak mahmah lel in ka umhi. Ka tangthu uh, ih taangthu koih nading cilehang museum lianpi ong lamsak lel ding uh aa, hih kum 100 phawkna ding cilehang ideihdeih ong vaihawmsak zo mahmah in ka umhi. Hih i ngahtheihding aa kilawmte ihkhahsuahloh ding, izat theihding thupi dinghi.

Piantit paiteng tangthu kaihkhop huai mahmahta dinghi. Ih ngeina, ihlaamte kisin huai tadinghi. Leitung gam tuamtuam pan kumpi ulianteng ong zin ding ahihman in ihgam ihlei, singkung, lopa puah hun mahmah tadinghi.

Atawpna ah, tua khempeuh avaihawm ding Committe khat kipat huai mahmah ta loding hiam, cih ka sunmangteng ong luikhia kahihi. Ipu, ipa, Piantit paite mahbang in angsung, min leh puam lunggulhlo, huaihamna aneilo, citak, kuhkal, thuman, deihsakna anei makai ngamding ong kipan dih ve un. Atawpna ah, ei i kimuan mahmah kei lehzong, “Piantit kong kuanzawh uh Kum 100 cinna ong bawlsak un” ii cimai zong in ee? Hang Khan Lian