Zomite kimakaihzia ding ~ Dr. Pau Khan En

Zomite kimakaihzia ding ~ Dr. Pau Khan En

Ei Zomite pen tangtawng peka kipanin makai kiciantak a neite ihi hi. Khuasung tangvalte giahkhawmna Sawm ah Sawm Upa i nei-a, Sialcinna mun ah Sialcing Upa nei-in, khua sungah Lawm Upa, cih bangin makai nei diudeu-in tua makaite’ thu zong a mang siam mahmahte ihi hi. Ahi zongin i pupa biakna panin Khristian biakna i suah ciangin a pawlpawl (denomination) in i kikhen hi. Ka muhkhialh ahih keileh, Pasian’ thu hong tunma-a i kimakaihziate sangin Pasian’ thu hong tunzawh i kimakaih haksazaw leh kipumkhat thei lozaw-in ka kimu hi. Tua ahih manin Zomi makai khempeuh in i ngaihsut dingin thupi thum kong gen nuam hi.

I. I MINAMTE’ KAHNA AW ZA MASA NI (Hearing the cries of our people)

Zomi makai gina khat ihih zawh nadingin i minamte’ thuak gentheih haksatna le amaute’ thuumna taunate i zak phot ding kisam hi. Tuate i zak khit ciangin amaute’ mun ah ei kikoih-in amaute tawh tua haksat thuaknate i thuakkhawm ding (identification) kisam masa ding hi. Tuhun laitakin Zomite in nek le dawn, silh le teen, inn le lo-a kipan leitung nate ah zawnna le giautaunate hangin thuumin, tau-in i om hi. Tua bangmah-in i nuntakna khempeuh (all sectors of life) ah kithutuah diamdiamna om thei loin thuumin tau-in i om hi.

Zomi makai khempeuh le mailam ah makai lai ding khempeuh in hih Zomite’ thuumna tauna le kahnate za-in i thuakpih ding kisam hi. Hih munah i etteh ding (model) in a mipih Hebrew mite a makaih Moses ahi hi. Moses pen biakna makai hi loin minam makai (national leader) ahi hi. Tua banga minam makai picing a suah nadingin amah in a minamte’ gentheihna, thuumna tauna le kahnate thei-in amah mah zong kinawlkhin loin a minamte tawh thuakkhawm hi (Paikhi–––atna 3).

II. I MINAMTE KIANGAH I GEN DING THU NGAHNA (Message)

I minamte’ thuumna, tauna le kahna awte i zakkhit ciangin i lungsim hong khoih-in veina i neih leh minam makai kisuak zo pan hi. Tua banga minam makai i suah nadingin ka minamte kiangah bang thu (message) gen ding ka hi hiam? ci-in ngaihsut ding kisam hi. Hih banga gen ding thu (message) i ngah nadingin tua minamte bawl-in acing akem Pasian’ deihna i theih masak ding kisam ding hi. Biakna khempeuh in a kan le a zon pen uh thu in Pasian’ deihna ahi ki-itna (love), thuman (truth) le thutang (justice) cihte hi-a, hih thute i minamte tungah i lah ding ahi hi.

Tua banga i lah ciangin eikia bek hi loin i makaihpih dangte tawh lawngkhata ginkhop ding (common voice) kisam ding hi. A tuamtuamin ging lehang i mipihte in hong zui thei lo ding uh hi. Hih mun ah i etteh ding (model) in Pasian’ mizat a minam makai Gideon ahi hi. Gideon pen biakna makai hi loin Midian minamte netniam Hebrew minamte’ makai (national leader) mah ahi hi. Amaute a nenniam a gal uh Midian minamte a zawhzawh nadingun a makaihpih mi 300te tawh “Topa ading le Gideon ading namsau khat” (A sword for the Lord and for Gideon) ci-in lawngkhatin gingin awnghuan uh hi.

Tua lawngkhata a ginna uh aw in vaang nei-a, Midian mite lau-in taimang uh hi (Thukhente 7:19-25). Zomite lakah makaite in i minamte i makaih lahna pen makai khempeuh lawngkhatin ging loin lawng tuamtuam tawh i gin hang hipen hi. Zomi makai khempeuh in a tunga i gen i minamte veina nei takpi-in thu le la kikum khawmin lawngkhatin ging leng, i makaih lah ding om lo hi.

III. MINAMTE AI-AWHIN NASEP KHIATNA (Advocacy and Action)

Zomite vei-in, huai-in i makaih nop takpi leh ei angsung khual masa loin i minamte ai-awhin gimna tawlna, supna baina thuakin amau adingin luangkham ngam a, i sep i bawl i makaih kul ding hi. Hih mun ah zong i etteh ding (model) pen minam makai Moses mah hi ding hi. Hebrew minamte in Moses omloh kalin Jehovah Pasian nusia-in bawnglim bawlin a biak uh ciangin Pasian hehin tua banga bawnglim a bia Hebrew minam khempeuh thahlup khit dingin sawm hi.

Tua hun laitakin Moses in, “Topa aw, amaute’ mawhna maisak inla, na laibupi sung pan a min uh suphiat kei in. Tua banga amaute’ min sukphiat ngeingei a kulleh keima’ min suphiat zaw in” ci-in a mite ai-awhin, amau taangin ama’ luang kham ngam hi (Paikhiatna 32:31-32). Hih pen ai-awha nasepna (advocacy) ahi hi. Zomite i it leh, i ngah ding mimal hamphatna, le min le zate sum ngamin i minamte tangin i thuak ngam ding kisam ding hi. Zomite i kimakaih lahna pen makaite in hih supthuaka makaihna kisam hikha ngelngel ding hi hang. I mipihte hai lo uh hi. Kua in supthuakin minam ai-awhin hong makaih hiam, cih hong en gige uh hi.

A munmuna om tuhun laitaka Zomi makai khempeuh le mailam Zomite makaih dinga a palh lai ding Zomi makai ding khempeuh aw, hih a tunga thupi thumte phawkin i minam makaih dih ni. Hong kilamdang takpi ding hi. Thu gengenna bek le khiatna nei lo lai mawk gelhgelhna bek tawh Zomi makai kisuak zo lo ding hi. Zomi khat Zomi makai cingtaak ding le cingtaak lo ding ahihna pen a laigelh le a thugente bek tawh kikhentat thei lo-a, a tunga thu thumte a nuntakpih ding kisam ding hi. Atomin ci lehang, Zomite makaih zawh nading pen manpiak (paying the price) a kul ding ahi hi. Man tampi pia-in i Zomite kipumkhat a, a khantoh theih nadingin Pasian in Zomi makai tampi hong pholhsuah tahen. Rev. Dr. Simon Pau Khan En (GZA Makaipi)