Tonzang Gam ZCD Nasepna

Tonzang Gam ZCD Nasepna

Tedim gam sung ZCD nasepnate ki zaden zaw aa Tonzang lam kiza ngeilo ahih man in ka zakkhak sun pawl khat hong hawmsawn ing.

Tau Leng Khua In
ZCD bawng gol mahmah khat gawh uh aa khuazang in Zopuan tawh laam sai ngiat uh hi. “Zomi ah pumkhat hihang” ci uh hi.

Old Darkhai Ah
A NLD deuh ahi Pu Ral Thuama leh a lawm teng in “NLD leh ZCD pen akizawl mat hi in Zogam ah Zomi Party mah in a uk ding hoihsa ka hih man un kavek un ZCD ah kong pia ding uh hi” ci’n mipi’ mai ah taangko khia ngiat uh hi.

New Darkhai
Mawtaw hoih mahmah nih tawh Old Darkhai ah va dawn phei ngiat uh, khuanawl tun teh nupi te’n theitui leh pakkual tawh na dawn tuah uh aa vok leh adangdang gan tuamtuam gawh ngiat uh hi.

Hai Ciin
Vok khat gawh uh aa “Khuazang in Zomi ah pum khat hi ung” ci uh hi.

Tuimui leh Suangzang te’n zong kheli nei mah na gawh tek uh hi.

Zampi
A kipum khat ngei hetlo aa kigen Zampi te’n zong “Tutung Zomi ah pumkhat suakta ung” ci hi.

Mualpi
Khangno 3 ki piakhia ngiat in khakhat vilvel ZCD te Tonzang gam sung ah a saikel (bike) tek uh tawh vakpih uh hi. ZCD makai khat in “Sum thalawh hile uh tamngah ngel ding uh hi ven. A kipiak khiatna uh bel zahtak huai sa ing” hongci hi.

Tung Tuang
Khuazang in Zopuan silh in na dawn uh aa “Gen nawn zong kul kei” ci uh hi.

Ong Hanciam Lai Ning
Mung Laan Thang
Zangkong