Shwedagon Pagoda ah gamdangmi te alutman Ks10,000 ah kikhantoding

Shwedagon Pagoda ah gamdangmi te alutman Ks10,000 ah kikhantoding

Myanmar, Yangon khuapisung aom Shwedagon Pagoda akici tattung pen gamsung aom Buddhist biakna te’n thupi asakmahmah khat ahihi. Tuamun ah Myanmar Citizen gammi te lutman akilakloh hangin, gamdangmi Tourist tepen lutman piasak tangtang uhhi.

Abeisa in Shwedagon Pagoda ah gamdangmi Foreigner te alutding ciangin mikhat Ks.8000 alakzelzel uh hi a, hongtungding December 01 ni akipan Ks.10,000 ah khangto tading uh cih kiza hi.

Hih Shwedagon Pagoda ah lutman khansakding pen Pagoda’s Board of Trustees te’n abeisa May khasung inzong atangkokhiat ngeisa uh hi a, 01 June 2017 ni akipan khansakding in ageel masak uh ahihi. Board of Trustees te’n hihbangin khansakding ageelna pen gamvengte ahi Thailand, Bangkok aom Emerald Buddha leh Cambodia gamsung aom Angkor Wart cihtetawh lutman akikimding in ageel uh cihi.

Ahi zongin hih Shwedagon Pagoda ah lutman khansakding pen gamsung aom Tour Operators tetawh kikupna omlo in, Tour Operators te’n lungkimlo in Complain uh ahih manin, kha 6 sung khansak nailohding in Ministry of Religious Affairs and Culture te’n thu piakik uhhi.

Tu’n kha 6 acingto hita ahih manin, December 01 ni akipan Shwedagon Pagoda ah gamdangmi Foreigners te alutman Ks.10,000 ah khansakding atangkokhia leuleu uh ahihi.

Lutman khansakding tawh kisai in Shwedagon Pagoda lutna Entrance tuamtuam te ah akisuang Signboard tezong kilaihsak dinga, lutman athak “New Fee” vai Tourists leh Guides te’n atheihcian nadingin hilhcianna kineiding cihi.

1995 kum panin 2013 kumdong Shwedagon Pagoda ah gamdangmi lutman pen mikhat ciangin US$5 akila ahihi. 2013 October kha ciangin US$8 ah ki khanto hi. Tuahunlai in alutman aki khansakna ahangpen gamdangmi te Service hoihtak piakzawhtheih nading, Information Pamphlets tuamtuam English, Mandarin cihte tawh bawlkhiatzawh nading cih paulap uhhi.

April 2014 kum ciangin Shwedagon Pagoda ah alutman pen US$8 panin Kawlgamsum Ks.8,000 tawh laihsakkik leuleu uhhi. Banghang in Kawlgamsum tawh kilaihhiam cihleh gamdangmi te’n US Dollar alui, atongawp khawngpeuh pia uh ahih manin, tua sum asialua te Local Bank te’n deihloh uh ahih manin, anunung ah lutman pen Kawlgam sumtawh alaihsak uh ahihi.

More: Myanmar, Bagan khuasung aom Pagoda tungpan American numeikhat kia in si

Ihgensa mahbangin Shwedagon Pagoda pen gamdangmi te lunglut mahmah mun “Tourist Attraction” ahih manin, 2016 kumsung bekbek inzong gamdangmi akigawm in 610,000 Foreigner bang vahawh uh cihi. 2016 kumsung bekbek inzong tua gamdangmi te lutman akigawm in US$4 Million bang kingah hi ci’n Pagoda’s Board of Trustees te’n pulakkhia uhhi.

Tukum September khaciangciang hih Shwedagon Pagoda ah gamdangmi ahawh akigawm in mi 445,000 bang phakhinta cihi. Hih Shwedagon Pagoda ah ahawh gamdangmi atamzaw pen Thailand leh China gamte pan ahihi. Sawltak #zomidaily