Mi hong cih nate um pah kha kei in ~ Dong Mung

Mi hong cih nate um pah kha kei in ~ Dong Mung

Victor Seribriakoff pen a kum 15 a phakin a sangkahna ah Syama khat in “Na khuak hoihlo lua ahih manin khutsiamna(khut nasep tawh kivaak zawh nading) pil sinna khat (သင်တန်း) pepeuh ah kah zaw in,” a ci hi.

Syamanu genna um ahih manin sang a tawp pah hi. Khutsiamna lam sin nawnlo in na a sem hi. Pilna gina neilo khat ahih manin nasep gina zong ngahlo hi. A muh bangbang khua-ul luangin sem a neek a zong ta mai hi.

Ama kum 32 a cin in nasep kinget theihna mun khat mu a, tua takah nasep a va ngen hi. Tua nasep ding omna phualpite’n ama khuak hoihna IQ a tehsak vua leh ama IQ mark 161 ahihna a mukhia uh hi. Tua dan IQ a sang mahmahte pen mi pil khuak hoih khia mahmahte bek ii neih ahi hi.

Leitunga mipil minthang Albert Einstein, Stehen Hawkins te IQ zong 160 tungsiah lam a omte ahi hi.

Victor in ama khuak hoihna (IQ hoihna) hong theih tel ciang hong ci hiam cih leh laibu khawng hong gelh pah hi. Ama laibu gelhte pen hoih thei mahmah ahih manin damdam in hong lawhcing to a, a laibu mante tawh mihau khat hong suak hi.

Tua bek thamlo in a sawt loin nasepna phualpi nei khat hong suaka, mihau mahmah khat hong suak hi. A nungsang lam ciangin International Mensa Society kipawlna ii makaipipa hong suak hi. Tua kipawlna sunga pawlmi mawkmawkte khuak hoihna IQ zong a niampen 140 ahi hi.

Tua hi-a i gennop bulpi ahihleh na tanau sanggam sung, na lawm le gual sung, na kiim na paam in khuak hoihlo, pilna neilo hong cih zenzen leh um kha pah kei in. Nang ii thu pen nang kaan kuamah in telkhin lo hi.

Thalakna

1. Midangte’n gina kei teh… siam kei teh… hih thei kei teh… semzo kei niteh… hong cih ciang um pah kha kei in.
2. Kuamah in nangma khuak hoihna, nangma hih theihna, nangma sepzawhna hong telpih lo hi.
3. Na kiim le paam ah simmawhna, neumuh zahkona a om khak ciang lungkia in tawpsan pah kei in.
4. Na maban ding nangmah na hanciam ding kisam a, na gualzawh lawhcin nadingin nang hong ngak hi.
5. Mite’n bangbang hong gen zongin Pasian muang kawm sa in mainawt teitei in.
6. Vantung leitung ukna a neipa tawh kop peuh lecin… lawhcinnate nang ading ahi hi. Lungdam, Dong Mung