Shopping Mall sungpan Python gulsaupi khat kimankhia

Shopping Mall sungpan Python gulsaupi khat kimankhia

Africa gamsung aom Shopping Mall khatah numei khatin Yoghurt bawmkhat leiding in alakkhiatleh anuai ah Python gulpi khat nakual venvan ahih manin laulua in kugawp cih Metro UK News pan kiza hi.

Bawngnawi tawh kisai nektheih leh dawntheih tuamtuam akizuakna Dairy Section aom Fridge sungah aki mukhia hi a, Shopping Mall nasem te ii upmawhna ah hih Python thaampi pen inntungkhuh pan ahih keileh tuinin paikhiatna hawkguam Drain panin honglut hiding ci uhhi.

Vanleiding in apai numeinu akutgawp ciangin Grocery Staff te’n delhpheipah uh a, Python thaampi khat akual amuh uh ciangin gulmatsiam “Snake Catcher” te sampah uhhi.

Tuagul pen Dairy Section ah votdikdek ahih manin, nuamsa in Milk Cartoon leh Yoghurt bungnuai tengah akual hithiat hihtuak hi. African Rock Python namte hiding kici a, asauna akiteh ciangin Pi 12 tak sau cihi.

Gulmat siampa ii genkhiatna ah hih Python pen Dairy Section aom Fridge sungah votdikdek in nuamsa in akual hiding ci hi. Ahi zongin sauvei kuallua ahih manin, Fridge panin avottawh agilsungteng khalcipdek in a awkcip hihtuak hi.

Snake Catcher pa’n vanteng hemkhia in gulpi kaikhia a, apumpi alumkik nadingin abawlkhit ciangin nai 48 sung encikding “Observation” bawlding cihi.

Hih gulpi pen bangmah liamna omlo in Snake Catcher pa’n mankhia thei a, gamsung Kruger National Park ah ki khahkikding hi ci’n Store Manager te’n genkhia uhhi.

More: Malaysia: Dailenbuk sungah gulpi khat nakivial venvan

Shopping Mall ii anunglam ahzong gampha mahmah a, gul tammahmah cisawnsawn hi. Tua ahih manin, Customers te kiangah gul namuh uhleh laukei un ci’n kagenzel uh cisawnsawn hi.

Hih thaampi African Rock Python tepen gu nailo a, ahi zongin mihing leh ganhingdang te vialcip in apumin nomvakthei uhhi. ZD Sawltak #zomidaily