Cikciang biakinn kihong ding? America gam adingin biakpiak kikhopna neihloh phamawh hi
President Donald Trump in May 22, 2020 ni-in America gam sung a om State governor te in amau huam sung a biakinnte ah mipi biakpiakna phalsak dingin thupia hi. President Trump in media te kiang a genna ah, “Biakpiak kikhopna pen America gam a dincil a kipanin tuni dong neih loh a phamawh vai lianpi khat hi. Biakinnte ah thungetna tam zaw sem kisam hi hang,” ci-in gen hi.
State governor pawlkhat in zuzuakna munte leh naubawl khiatna munte pen neih loh phamawh vai lianpi hi, ci bilbel uh a, biakpiak kikhopna pen vai thupi in ngaihsun lo leuleu uh hi. Hih thu hangin President Trump in Biakpiakna innte nawl khin ding kilawm lo hi, ci-in thumanlote a manin a puah hi ing, ci hi.
Biakinn ah biakpiakna nei thei ta ding, cih ciangin ut bangin biakinn dimin mipi kikhawm pah ziaizuai ding, cihna hi lo a, dawl 4 in khenin kidawm takin neih dingin Pawlpi makai tampite in gen uh hi.
Kal Khatna: Mi 25 ciang kikhawm phot ding. Social distancing kici pi 6 hal ta in kigamla hamtang ding, hand sanitizer leh muktuamte zang pelmawh ding.
Kal Nihna: Mi 25 tawh biakpiak kikhopna nipi 3 na leh 4 na a cin ciangin mi 50 ah khan to ding, pi 6 kihal mahin muktuam leh khutsilnate zangin tut theih sawm ding.
Kal Thumna: Nipi 5 na leh 6 nate ah kim leh pam virus kilawhzia ven lam a manawh tei nak leh Pawlpibup seh 4 suah seh 3 (75%) kikhawm ding.
Kal Lina: Pawlpi omna khua leh State sungah natna kilawhzia lungmuan huai hi, ci-in cidamna lam vaipuate in a muh nak uh leh Pawlpibup za ah za kikhawm thei ta ding.
Hunsia leh hunhaksa kawmkal ah thu-um mite in biakpiakna nei-in thu a ngetkhop uh ciangin mimal bek hi loin mipi adingin thathak ngahna leh lungmuanna thak tampi piangsak a, tua in gambup adingin zong damna piangsak hi. Biakpiakna pen America thukhunpi sungah zong suakta tak a zat theih dingin kigelh hi. Khristian upna in gammi hoih hong suaksak hi bek loin gam adingin thupha hong suaksak hi, ci-in USA gamsung biakna Sia Rev. Rodriguez in Fox news ah gen hi.
Myanmar gamsungah May 31 ciang kuamah mipi kikhawm thei nai lo ding, cih thupiak om khin ahih manin thuthak a om masiah biakinn kikhop theih hun ding thukician bangmah kiza nai lo hi. Source: Fox News/ The Tedim Post
Comment piaknop aomleh...