USA, Maryland pan Sgt. Kham Sian Mun (Gualnam, kum 32) in hongnusia

USA, Maryland pan Sgt. Kham Sian Mun (Gualnam, kum 32) in hongnusia

Mangpha Sgt. Kham Sian Muan (Kum 32) Gualnam Beh – Washington DC Area Maryland State, Gaithersburg khua ah ateng, Zotaang Pa Thang Lian Pau leh Nu Cing Za Lun te Tapa Nu Cing San Nuam ii Pasal Sgt. Kham Sian Muan in abeisa May 9, 2021 in sunglam damlohna tawh hongnusia chih thu izak man in ZIUSA kipawlna mintawh dahpihna i pulak hi.

Sgt. Muan pen Zomi te kipawlkhopna Zomi Innkuan Washington DC Area ah member khat leh ZIUSA Genvai member pom ni 5/2/2014 pan active member khat ahih manin thumeilet bylaw zuiin (100%) Death Benefit $15000 kipiakhia dinga paakkual $150 man khattawh zong mangpha khakna kinei ding hi.

Sgt. Muan luanghawm tawh anunungpen hunzatkhop ding hong tungding Saturday May 12, 2021 in EBC-DC Pawlpi makaihna tawh, King Memorial Park ah 12 to 2PM in Funeral Service Hehnepna Rev. Lian Za Tuang (EBCA Pastor) in hong neihkhit ciang, Rev. Pau Khan Cin in han ah vuina nei ding hi.

Sgt. Muan hong nusiatna hang adahakap alungleng khuangai tanau meltheih khem peuh hehnemsiampa Kha Siangtho in alamdangin hong hehnem ciatta hen! Dahpihna Lianpitawh, Mun Mang – Genvai tanupi Zomi Innkuan USA, Inc.

Dahpihna leh Sihkohna

Washington DC Area huam sung Maryland State, Gaithersburg khua, Zotaang Innpi aa ateng Zomi Innkuan DC Area (ZIDCA) Advisor Pa Thang Lian Pau leh Nu Cing Za Lun te Tapa, Nu Cing San Nuam ii Angkawi Sgt. Kham Sian Muan (U.S Army Retd.) (Kum 32) in Tuni May 9, 2021 Zingsang 5:45AM kiim in Fairland Rehab Center, Silver Spring, MD pan hong nusia ahih manin ZIDCA pan nakpi takin kidahpih mahmah hi.

Sgt. Muan Aa pen ZIDCA kiphuh tung pek aa kipan Kipawlna leh minam aading ma apang den khat hi aa, ZIDCA Soccer Team ii Captain leh ZIDCA ii Sport Secretary cih te ah lawp tak in ma hong pang den khat zong ahi hi. Sgt. Muan Aa pen US Army sungah Kum 10 sung bang US Galkap hong sem aa, US galkap hong sep sung in nasep siam leh citak mahmah ahih manin The White House Communication Agency, Department of Defense pan “Joint Service Commendation medal Award” Pahtawina lianpi zong hong ngah khia in i minambup in i angtanpih mahmah khat zong ahi hi. Sgt. Muan pen Evangelical Baptist Church – D.C ii Full member khat hi aa, Zomi Innkuan USA Genvai kipawlna ah zong full member khat ahi hi. Sgt. Muan ii hong nutsiatna hangin i minam aading supna lianpi khat zong ahi.

Sgt. Muan ii luanghawm tawh kisai Funeral vai te Innkuan thu nei lam te leh Pawlpi lam pan ahun ahun in hong kiza sak to to ding uh hi. Topan adah akap khempeuh hehnepna hong pia ta hen. Dahpihna Lianpi tawh, Zomi Innkuan Washington D.C Area (ZIDCA)