Gentehna hoihkhat (sehnel tungah ngasa) ~ Job Cinpi

Gentehna hoihkhat (sehnel tungah ngasa) ~ Job Cinpi

Lui gei khatah ngasa khat tui kiam vat ahih manin leilakah tui kisamin pek laklak hi. A pekpek hangin tui omna lui sung a tung zo tuan kei hi. A kipekpekna gim lua mahmah ta ahih manin a lung hong kiata hi. A sawtna ah gim kisa lua ta ahih manin hi bangin ka pekpek hangin gim bek thalawh hi lel ing, kipek nawnlo in om hit-hiat leng ka tawldam zaw ding hi. A si ding veve gim pipi a ka sih sangin tawldam takin si le’ng nuam hoih zaw ding hi, ci-in om hit-hiat ding hong sawm hi.

Tua bangin a om hit-hiat laitakin miksi hon khat in tua ngasa mu uh hi. Miksite in tua ngasa hehpih lua mahmah uh ahih manin huh ding hong sawm uh hi. Miksi makaipa in a nautangte kiangah ngasa huh ding ci-in a gen ciangin a nautangte tua ngasa kiangah pai uh a, a vek un zawng huan ding, tui sungah khia ding ci-in gelna nei uh hi. Ahi zongin miksi makaipa in, a nautangte kiangah hih ngasa pen lian lua mahmah hi, i zawng zo kei ding hi. Tua ahih manin ngaihsutna dang khat i zong ding hi, ci hi.

Miksi khempeuh khat khit khat in tua ngasa pet ding uh a, ngasa in na a sak ciangin kipek ding hi. Tua bangin i deihna lamlam ah a kipek dingin i pet ding hi, ci-in ngaihsutna khat hong nei uh hi. A ngaihsut bangin semkhawm pah uh a, khat khit khatin ngasa hong pet ciauciau uh hi.

Ngasa in zong miksite pehna nuammawhsa ahih manin ut lo pipi-in hong kipek laklak ta hi. Tua bangin hong kipekpek-a a sawtna ciangin tui omna lui sung hong tung zo hi.

Khat veivei ciangin hong kinasak khempeuh muhdah man, hazat man, simmawh man zong hi lo thei hi. Tua bangte hangin siatna, sihna, natna le a hoih lo nate panin kisuakta thei gige hi. A hun lai-in nasa-in kithuaklah mahmah napi a nung ciangin lungdamna a om zaw kik natna pawlkhat om thei hi. Tua bang natna na tuak ngei nai hiam? Job Cinpi (Zomi Laisim Nuamte)