Sawlna Sepzia – Mission nasepzia

Sawlna Sepzia – Mission nasepzia

Sawlna Sepzia
“Note pai kawikawi unla, midang khempeuh keima’ nungzui mi suak sak un…” Matthew 28: 19.

Jesuh Khrih in note pai unla, Khamangthangte va honkhia un ci lo hi. Banghang hiam cih leh hotkhiatna pen Topa a’ hi bek hi. Missionary te a kisawl thu pen Lungdamna thu va gen ding le va hilh ding ahi hi (Teaching/Preaching/ Proclaiming the Gosple is our part). Tua pen sawlna sepzia ahi hi. Nangmah mah nungzui misiangtho na hih mateng mite nungzui citak na suah zo kei ding hi, cih thu kilang hi. Nungzui masate zong a kikhah khiatna mission nasep masakna panin gualzo lawhcing sa-in hong tung kik uh ahih manin kipak mahmah uh hi. Banghang hiam cihleh dawite nangawn in amaute’ thu mang uh ahih manin lungdam kipakin angtang mahmah uh hi. Tua tak ciangin Jesuh in, “Dawite in na thu uh hong manna hangin lungdam kei unla, vantungah na min uh a kigelh manin lungdamzaw un,” na ci ziau hi. Sawltak sawm le nihte mahmah zong Topa’ tatkhiatna bek mah tawh a kinamtak ahihna thu kilang ziau hi. (Luka 10: 20). Hotkhiatna in Topa a’ hi. Salvation belongs to God (Jonah 2:9; Mangmuhna 7:10; 19:1).

Lawhcinna le gualzawhna ah lungdamna sangin Jesuh tawh bang tanciang ih kizom hiam cih thu pen Lungdam nading thusim lian pen na hi zaw gige hi (The secret of joy is a right related to Him). Missionary sepna ah a thupi mahmah pen Pasian ong sawl Lungdamna thu tangko ding mahmah thupi pen hi. Tua Lungdamna thubu tungtawn a mite Jesuh’ nungzui mi suah sak ding hi bek hi. Pasian’ deihna tawh kituak lo khamangthang veina pawlkhat om thei hi. Tua pen eimau ngaihsut tawm banga mite va pum luah sawm gawpna le va lumlet gawpnopna thu ahi hi. A mite ngah ding, lungkim sak ding, zol zo ding, huh zo ding, mai et zo ding, tuiphumna tawh ciamteh mengmeng dingin Christian suak sak gawp ding ci-a hanciamnate pen a hoih thu a hih tei hangin khamangthang veina maan na hi nai lo gige hi. Tua pen lokuan ding tu pua lo, sa beng ding thau pua lo, kikhawm ding Labu pua lo, sak ding labu bawl zang lo, thuhilhna ah Lai Siangtho sim ding a mangngilh pa tawh a kibang ahi hi. There is a passion for souls that does not spring from God, but from the desire to make converts to our point of view. Kikhelna (Change) pen pianthakna (Conversion) hi nai lo hi. Tuiphum khat AG ah a kikhel pheina pen pianthakna hi lo hi. Zatep khat in tep nawn kei leh tua pen pianthakna hi nai lo hi. RC khat Tuiphum suahna zong pianthakna hi nai lo hi. Prostestant khat RC va suah kik zong pianthakna hi tuan lo hi.

Missionary paina, sepna ah mite a pianthak ding uh haksa lua, pawlkhat nung tolh pahpah gen leh loh kibang, Kawlte Pasian teel lohte hi in, ih gengen hang kilamdang kenteh, cih sangin eimau mahmah Jesuh tawh ih kizopna a bit hiam? Jesuh Khrih ih um ih muang taktak mah hiam? Lai Siangtho tawh Lungdamna thu a tangko ngam mah ih hi hiam? Jesuh bek mah ih bel hiam? Sawlna ih mang ngam taktak hiam? Ih Suangpi kua hiam? Cih kidot huai zaw hi. “Na mit uh khua hong musak thei dingin nong um uh hiam?” (Matthai 9: 28). Jesuh tawh ih kizopna maan photphot leh Jesuh in kul a sak bangin ong sem ding hi cih na um hiam? Tuni in ih mission nasepna ih Pasian’ nasepna ciat ah thuhamsa ih tuah ciangin hih dotna a tuak den ciat ih hi hi. A Thokik Jesuh ih thei kha hiam? Kha Siangtho ih sungah ong teen lam ih kithei hiam? Kha Siangtho in ong nei hiam? Leitung nate ah mittaw sakin, Kha thu ah khua mu ni. Topa’ ong sawlpina Thu (the Message) mangngilh liangin leitung mite tawh kipawlkhopna nadingin “Jesuh bek ah Upna” cih thupuak ih muang ngam nawn hiam? Sawlna tawh kisai ah eimau pilna zangin daan (methods) tuamtuam ih zat leh tua pen Topa’ phahsa lampi tawn lo, Topa’ sawl daan a mang lo ahi hi. Jesuh Khrih in, “Vangliatna khempeuh kei’ tungah ong kipia hi …, tua ahih manin va kuan khia un.” ci hi. Sawlna man ding le Sawl thu gen ding ih vaipuak ahi hi.

Khatvei ZBCM Pawlpi tuucing pi pa khat in “ka khua vuah Laipiante Lungdamna thu ka gen ciangin thu hamsa mahmah khat tawh hong dawng kik den uh hi,” ci-in ong gen ngei hi. Tua thu pen Jesuh bek bulphuhna tawh kisai Thu ahi hi. Zomi te adingin Pau Cin Hau hi. Na Tuiphum Syapite un zong “Biakna dangte sungah a kibang Pasian’ kipholakna om ciat hi, khat le khat kizahtak sak ding. Biakna kim ah hotkhiatna om tek hi” ci-in gen hi lo hiam? No a nautangte in bangteng hong hilh sawm lai na hi uh hiam? Cih thu ta tawh panla mahmah in pianthakna thu kigen thei lo uh hi, ci-in ong kup pih hi. Jesuh Khrih thupiakna le sawlna mang loin leitung pilna le daan tuamtuamte tungah kinga in kipawlna a thupi sak thuhilhsya Rev.Dr. Ph.D makai pipite hangin Jesuh’ min kiseel seel mawk leh bang phattuamna om ding ahi hiam? Cih dotna pen tua kum zalom 21 sunga Christian societies te adingin a kidophuai mahmah thu (issue) pi khat ong suak pel mawh ding hi. Tua mah bangin thupha deihna hang bekin Jesuh’ min pheng zatna tawh Topa’ min a kidaisak khak ding zong kum zalom 21 Christiante adingin a kipuahphat huai mahmah (issue) pi khat ahi hi.

Jesuh Khrih le ahong tatkhiatna thupha pen mizawngte ading bek, mihaite ading bek, mipilte ading bek, mihaute ading bek, Christian te ading bek hi loin mikhempeuh tawh kisai thu ahi hi. Zumpih kei ni. Mizawngte le mihaite veina, mimawlte le lai thei lote veina, mihaute le mipilte khualna cihte khempeuh pen a hoih lo ahih loh hangin khamangthang veina maan taktak na hi nai lo hi. Mizawngte’ kiangahsuangdal anntang tui buk tawh kuan ding, mihaute kiangah maibiakna tawh kuan ding, mipil miliante’ kiangah dikzulna zia tawh kuan ding cih bang om lo hi. Laipiante ading Pau Cin Hau, Kawlte ading Budha Gautama, Muslim te ading Mohamad cih bang hi lo hi. Nang le kei zong thu-um mi ih suah ma-in Lawkite ih hi hi. Christian upna a kipianpih hi lo a, a kingah ciat hi. Nang le kei lel tak Moslimte, Buddhist te, Laipiante tawh ih kisaina om zo kei mah inteh. Ahi zongin Jesuh Khrih ahih leh amaute tawh kisai zo hi. Nang na hih leh na kua toi mahmah, na vang neu mahmah lel ahih manin biakna dangte nang lo tawh hi thei lel uh hi. Nang le kei’ thagum tawh va kisai zawh nading om lo hi. Ahi zongin Jesuh Khrih ahih leh a kuazai bek loin van le lei vangliatna khempeuh kipia a, amah a um lote nangawn thu khen ding Pa ahih manin, Jesuh tawh amaute kipeng thei lo uh hi. Tua thu in Christian Message ahi hi. Mikhempeuh adingin Jesuh pen Thukhen Pa le Topa ahi hi. Jesuh in Topa hi, a ci nuam lote tungah Jesuh in Thukhen Pa hi pelmawh veve ding hi.

Jesuh in, “Keimah in Lampi, Thumaan le Nuntakna ka hihi, kei lo in kuamah Pa’ kiang tung lo ding hi,” ci hi. Buddhist, Laipian Muslim, Hindu, Christian ih vekpi in Jesuh le a Lungdamna thu direct in a kisam vive ih hi uh hi. Muang lah kei ni. Zawnna tawh zong Pasian kizong khial thei hi. Hauhna tawh zong kipuk thei hi. Kipawlkhop nading khualna ah Jesuh’ min kiseel hi. Mite maibiaknopna ah Lungdamna Thu in mun ngah zo lo hi. Tua bang ahi lo dingin Jesuh Khrih pen ih vekpi’ kisap Khrih ahihna tua Lungdamna thu gen bel, hilh bel le tangko bel-a neih tawntung ding le tua Thu mah ih tual sungah suah sak belin ih neih theih ding pen ih mission nasep zia ding ahi hi. Hih in Sawlna sepzia ahi hi.

Evan. Suang Dal