Satan leh Sex ~ Cin Ngaih

Satan leh Sex ~ Cin Ngaih

Ahunhun in Satan in Pasian thu um mite sex zatna tawh mawhna sungah na lutpih hi. Sex in Pasian ii hongpiak letsong khat hinapi in amann lo a zatna hangin Pasian hehna dan mitampi in thuak lawh uh hi.

1). Sodom leh Gomorrah khua leh akim a om khuapi mite in hih sex amann lo a zatna hangin Pasian in midangte etteh dingin kat le meikuang tawh akhua susia cip hi (Jude 7).

2). Lot tanu te in sex amannlo in zang uh a apianna apa uh tawh ta nei in Moab mite leh Ammon mite pianna hong suak uh hi. Ahihang amaute in Pasian mite Israel te ading in gal na hi kinken uh hi (Pian 19:30-38; Gam.22; Isaiah 49; 1samuel 11).

3). Reuben in sex amann lo in zang a apa’ zineu Bilhah luppih in apa’ Jacob in hih thu azak ciang in heh mahmah a, Reuben samsiat in, tacil hi napi inn luah za pialo in Joshep pia hi ( Pian.35:22,39:3-4; 1khang.5:1).

4). Israel mite in Moab mite tawh amannlo in sex zatna tawh paktat uh ahih man in Pasian hehna thuak in gimna ngah uh a mi tul sawmnih leh tul nih in sih lawh hi (Gam.25).

5). Benjamin minam Gibeah khua mite in sex amannlo a zatna hangin Levi mipa zi neu a sih dong in luppih uh hi. Hih thu hangin Israel mite sungah nakpi tak in gal kidona, sihna lipkhap huai pianga, Benjamin minam te cimai zah dongin mangthang lawh uh hi (Thukhente 19-21).

6). Galkap mang Abner in amannlo in sex zangin Saul kumpipa zineu luppih hi. Hih thuhangin Saul tapa Ishbosheth in Abner paupih in Abner heh mahmah a Ishbosheth tawh kilemlolawh uh hi. (2Samuel 3:1-10).

7). David in sex amannlo in zang in Uriah zi Bathsheba luppihna hangin Uriah in sih lawh a, Bathesheba tawh ata inzong sih lawh hi. Tua ban ah hih sex zatna guu hangin David innkuan suangah buaina tampi piangsak hi (2Samuel 11-12).

8) David tapa Ammon in amannlo in sex zang a asanggam nu Tamar luppih hi. Hih banga luppihna hangin Ammon in Tamar nakpi tak in mudah mahmah a acil a a itna sang in amudahna lian zaw ahih man in Tamar a utloh hang khasia mahmah sa in kap in paikhia sak hi. Hih thu hangin Tamar sanggam pa Absalom heh mhamah in Ammon that in phuba la hi. Tua ban ah David innkuan sung ah buaina lianpi piang hi. Absalom in apa Kumpi David nangawng lehdo hi. (2Samuel 15-18).

9). Absalom in sex amann lo in zanga apa zineu te luppihna tawh apa amudah thu lak in amah tawh aom khawm Israel mite thumannlo lam tawh thakhauhsak hi(2Samuel 16:21-22).

10). Farise Simon in amannlo a sex zatna tawh akhuapih nu Mary (Magdala khuami zong akici) mawhpih na hangin amasa a aitna sangin amudahna lain zawh ahih man in khen a, Simon in phak natna ngah in Mary in numei ginalo te bangin apumpi zuak lawh hi ( Matt.26:6-8; Mark 14:3-9; John 8:10-12; John 12:1-8).

Hilhcianna

Satan in hun nunung ah Pasian tate sex hangin puuk sak hi. Sex hangin Pastorte hong puuk uh hi. Sex hangin Laisiangtho sang naupangte hong puuk uh hi. Sex hangin Pasian mizat mahmah te hong puuk uh hi. Sex hangin gospel lasiam mi minthangte hong puuk uh hi. Sex hangin Pasian tanu tapate hong puuk uh hi. Sex hangin pawlpi sunga ih muang ih suangte hong puuk uh hi.

Hih atung a thupiangte leh tulai leitung khuahun pai zia te enleng sex amannlo a zatna hangin :

1. Lawm kingaite tungah kimuan mawhna kikhen lawhna piangsak hi.

2. Nupa kal ah kimuan mawhna piangsak in nupa kawmkal buaisak in innkuan nuam saklo in kikhen ding phamawh salo in kikhen lawhna piangsak hi.

3. Nulepa te leh lawm le gualte zong hong zahtak sak lo in ih lungsim deihna bek hong zuisak hi.

4. Lawm ngaihte tawh kikhen ding hamsa sa hong sasaklo in lawm ngaih dang neih ding zong baih sak mahmah hi.

5. Khualzin gamvakna leh sepna bawlna ah ma hong bingsak in innkuan sung ah damlohna buaina hong omsak hi.

6. Pawlpi sung khua le tui melthei unau sungah buaina hong omsak hi.

7. Khat le khat kigal neihna phuba laknop na lungsim hong neisak hi.

8. Kha lam ah tha hong zawngkhawl sak in Pasian tawh hon gkigamla sak hi.

9. Lungkim cih hong neisak lo in maizumna thagui hong tat sak hi.

10. Nulepa tung ah maizum hong tun’ hi.

Tua ahih man in amannlo in sex na zat khak a leh (nupa hi nailo) David kumpipa bangin kisikna mann tawh kisik in, amawhna kimaisak ahih man in David in amannlo in sex amannlo in zang nawnlo hi. (Ih mawhna hong kimaisak leh tua mawhna kisem kikkik lo hi). Lungsim takpi tawh na kisikkik a na mawhwna hong kimaisak a leh Mary bang in mawh na lam ah zui nawnlo in Jesu nungzui in amah bek na mitsuan gige ding hi. Cin Ngaih