ZAM Thupuak :: 07 Apr 19 (Thu ngetkhopding zaksakna)

ZAM Thupuak :: 07 Apr 19 (Thu ngetkhopding zaksakna)

ZOMI TE THUNGET KHOP DING ZAKSAKNA :: 2019 kum sungin Malaysia leitang tungah om Zomi te kha 3 val deuh sungah luang 9 bang ih nuntakna bei a, ih dipngekna in zong hong khasiat huai mahmah hi. Tua ahih manin Zomi bup lungkihual in adiakdiak in Malaysia om Zomi te ading ih biakinn ciat pan in thunget khop hun khat lak dingin ih kizasak nuam hi. Ei te kipum khat in ih thunget khopna ah Pasian in lungkim in nalamdang hong sem ding hi. Anuai a hun bangin kipumkhat in thungen khawm dingin ih kizasak phapha hi. Ani: April 21, 2019 (Sunday) Amun: Zomite Biakinn Khempeuh ah Ahun: Eima kikhop hun sung ciatah (Easter Sunday ni ih pawlpi hunsung ciat ah hun limcii khat la ding.) (Note: Sabbath ni biakpiakna a neite a’dingin April 20 ni hiding)

Ngimna leh Thunget Dingte:

• 1. Zomite cidam khansau na ding (pilvang a i kikep siam nading)
• 2. Malaysia gamsungah Zomite i sihnotloh na ding,
• 3. Zomite Zumvai mabante ah mazan kim nading leh isepna ciatah lawh cin nading,
• 4. I maikaite panpihna leh amaute tawh pankhopna ah i kithutuah na ding! (A geelkhia-Zomi Genvai Tanute “ZSM-2019”)

NA CONTACT NUMBER TE UH HONG UPDATE UN

ZAM card tawi member te in ZAM zum ah na phone no. te uh update hong bawl hamtang un. Phone No. kilaih tam ahih manin ih phone No. te update ih bawl ham tang ding kisam hi. A zenzen in UNHCR lam pan vai khat om leh na contact No. aman lopi tawh bangmah hong kisam thei lo ding ahih manin update ih bawlna ding hong zasak ung.

KAMLET SEM NUAM TE IN SAZIAN HONG PIA UN

UNHCR zum leh zum dangte ah Zomi kamlet (Interpre -ter) ding mi kisam zelzel a, a hun zui in ih sap pah theih dingin Zomi sungah Kamlet (Interpreter) nasep a lunglut te in min sazian nong piak nang uh hong zasak ung.

2019 ZSM LAIBU TE HONG AP KIK TA UN

2019 ZSM laibu te I hawm khiat zawh kha 4 bang hong cingta ahih manin March kha bei ah ih laibu khempeuh Zum ah ih puak kikna dingin ih ki zasak hi. Hong ap kik khin zong tampi mah ki om a, hong ap man nailo zong zong ki om lai ahih manin in a manlang in nong ap kik nang uh zong hong zasak ung. Mapang khawm in ih sep khopna te hangin tuni ciang a kalsuan zo ih hihi.

ZAM ZUM AH HONG HAWH

Suangphei khuami Sia Enn Sian Khai – Palm Tree and Cedor Project Ministry in Malaysia hong zin sungin Zomi te a it aveina tawh kizui in ZAM zum ah hong hawh in thapiak na leh thupha piakna hong nei ahihmanin kilungdam mah mah hi. Topa’n siapa nuntakna hong zang semsem tahen.

WELCOME TO ZAM

Kawlgam, Vaigam, tuipigal leh gam tuamtuam pan Malaysia ah hong zin Zomi makai te’n Zomi zumpi ahi Zomi Association of Malaysia(ZAM) ah nong hawh/phak hamtang nading un itna lianpi tawh kong zawn uh hi.

ZAM ZUM AH KILEI THEI

ZAM zumpi ah ih Zomi ngeina van tuamtuam te ahiZopuan Design tuamtuam, Zoniik Design tuamtuam, Puanten, Puandum, Zodial(Silk), Puanlaisan, Zokhi, Tanghciin, Khephiau, Zolukhu, Zothungkuah, Zodial cihte akipan naupang puan tuamtuam te deih zahzah kilei thei hi. Tua bek loin khui tuamtuam leh anuai a laibu te zong kilei thei hi.

NA UN VAI NAKAN NUAM HIAM?

Na UN vai lunghimawhin kannop dotnop khat peuh peuh nanei hiam? UN Department tuamtuam ah laigelh sak nopna neih leh ZAM Member te ading mangenloin ZAM zum pan lai kigelh sak theiden hi.

ZAM member I cihpen ZAM Card bawl ngei cihbek hi loin UN card a neih khit hangin a renew/hingsak den te pen member hiden cihna hi. Refugee na kicih sam hang UN Card naneih naikei leh UN ten kami hongci tuanlo hi.

DAHPIH NA PULAKNA

Mawngken Khuami, Kawlpi leipi veng ah teng Sukte beh Pa Lian Suan Kham (Kum-52) in 04 April 2019 ni-in upmawh lohpi in PJ University Zato pan in hong nusia hi. Pa Lian Suan Kham luanghawm tawh kisai in ZAM/ZSM pan in vaipuak kila hi. Hih sang gam pa hong nusiatna tawh kisai in ZAM/ZSM pan in zong dahpih na ih pulak khia hi. Topa’n a dah a kap khem peuh a lamdangin hong heh nem tahen.

ZOMI’ TANGMI THUNGEN PAWL

Zomi Tangmi thungen pawl te makaihna tawh Zomibup a ding thungetna om ding ahih manin, a gamla a nai cih omlo thungetna ah nong kihel kimciat na dingun zahtakna lianpi tawh kong zawn uh hi. A diakdiakin tulaitak Malaysia gambel te dinmun adingin nakpi takin thungetna kinei ding hi. Lungsim kipumkhat in ih thunget khopna in nalianpi hong piangsak ding cih ih lam en hi. Contact person: Siamah Ciin Ph. No.: +60182688752

INTERVIEW NA PAI CIANG

Tulaitak a diakdiakin RSC leh DHS interview te kinawh sap mahmah ta hi. Tua ahihmanin interview napai ciang in pelloin na theih ding thu pawl khat hong om zel hamtang hi. Tulai tak pen ei ading hun nunung hong hi ta ahih manin interview ah kiginglopi a na paina pen nang leh nang a kibawlsia tawh akibang nahih lam phawk gige in. Ih mailam kalsuan nadingte ei mau mahmah in a hoihpen ding in hanciam tek ni.

1. Thu hong kidongte hoihtak tel lopi in dawng kik kei hamtangin. (upmawh dawn or mangsia khiat in khiain dawng kei in) Telmel lopi in upmawhin na dawnna in na zum vai hong kikhel sak thei cih phawk gige in.

2. Kamphen te in pau telcian lo ahih kei leh nang lam panin kamphen te pau telcian loh na khat a om khak leh zong kisuangtaklo tak mah in kitel kei ci-in gen lel in. Tua bangin na sianggen na hangin nang a ding buaina bang mah om tuanlo ding hi.

3. Pawl khat in ei khua awsuah/awkaih tawh ih pau ciangin kamlet pawl khat in zong tello thei hi. Tua bang hun ciangin kamlet pawl khat in Tedim pau in pau in ci in tai cih zong kiza thei a, ahi zongin kamphen te mahmah in zong nang pau hong tel ding zong a thupi a hih lam phawk hamtangin. Kammal khat kitelkhial leh zong I vai pi khat ki pelh thei hi.

4. Zomi ahi lo namdangte in kamlet hong sep a, a pau na tel kei leh zong tello cih siangtakin gen pah zaw in.

5. RSC officer a tam zaw in Malay pau zong tel ahih manin a thugen te na tel kei leh Malay pau tawh zong na tel lohna gen kik zaw lel in.

6. DHS na interview ciang hong dotna na tel kei leh na teldong dong kikkik lel in. Tua bangin dot kik hangin bang mah buaina om tuan lo hi.

7. A diakdiak in tulai tak min kitaih te DHS a sap laitak ahih na tawh kizui in ih min tawh kisai hoih tak ih ki ging kholh ding hong thupi mahmah ding hi. Khat vei mawh matna om khin ahih manin tutung ah ih dawndan leh ih lakkhiat dan ih siam ding hong thupi mahmah ding hi.

8. Zum ah interview ding na pai limlim ciang zuu nam heha sa leh kamsan biabua sa khawng in pai kei zaw hamtang in.

UNHCR ZUM PAN PHONE HONG KISAP CIANG

UNHCR zum pan in phone hong kisap ciangin hong sapna mun (RSD,DSU/RST/RSC/OPE, DHS..etc) dong hamtang inla, bangvai tawh hong sam cih zong dot ding

mangngilh kei in. Phone hong kiho ciangin zong hoih takin kiging kawmsa in dawng kik inla, thudot hong neih leh zong na zum vai tawh akipelh loh ding hoih tak ngaihsun kawmsa-in dawngkik hamtangin. Kam khat I dawn khialh na tawh supna tampi piang thei hi. A diakdiak in hong sapna Department I theih kei leh zum I pai ciangin nawn kai na tampi om zelzel hi.

KIDAWM CIAT NI

Malaysia om Zomipih a kua ma ciat I omna gam huih nun zia tawh kizui in kidawm ciatni cih hong zasak phapha ung. Kimat kihen hong tam mahmah in, a munmun ah oparasi hong lut pahpah ahih manin vaksuk vaktoh, hawhsuk hawhtohna ah kidawm ni. I om na veng kim veng pam ah zong kidawmsa in om ciat ni. Kiim leh pam a om mite in hong muh khialh loh dingin I om dan I khawl dan te kikem siam kawmsa in om ciat ni. Vai thupi mahmah lobuang zong vakvak kei zaw leng hoih zaw ding hi. Grab tawh na vak leh zong na tuan ding motor hawl te hoih tak telsiam lecin nang a ding hoih pen ding hi. A diadiak in mitam na munte ah tam vak kei leng ei ading hoih pen zaw ding hi. A zenzen in kimat kihen na khat natuak leh ZAM zum ah hong zasak pah in. Contact – Sia Tuangpu 016 254 4093 – ZAM hotline 016 293 9027

ZATO LAM TAWH KISAI :Zato lam tawh kisaiin vai khat peuh na neih leh Contact :Sia Mungpi 018 3122 957

ZSM PANPIH NA HONG PIA TENG

ZSM adingin mimal, Pawlpi leh Khua tek pan in zong panpihna ih nget zel mah bangin kum simin zong hong kipia den a, tukum adingin zong ZSM panpihna hong ki piapia tahi. Hih bangin ih pankhopna hang mah tawh tuni ciang ZSM a kiding zo hi a, nang leh kei mapan hang bek ahihi.

• 1. MLPP pawlpi RM300
• 2. MBF Pawlpi RM300
• 3. Zomi Innkuan Rawang RM300
• 4. Saizang khua kipawlna RM200
• 5. Zomi Ebenezer Malaysia RM1000
• 6. Mualpi Innkuan Malaysia RM200
• 7. Malaysia Tedim Suangpi innkuan RM200
• 8. Phaiza Innkuan RM200
• 9. HCCF pawlpi RM200
• 10. MZCC pawlpi RM1000
• 11. ZCF-Bethany Pawlpi RM300
• 12. Buanli Khua Kipawlna RM200
• 13. Mualbeem Khua Kipawlna RM200
• 14. Tuithang Khua Kipawlna RM200
• 15. Tuilangh Khua Kipawlna RM200
• 16. Zonuamzang Khua Kipawlna RM200
• 17. Do Sian Pau (KL Cherry Store) RM100
• 18. Zion Christian Church (Songailong) RM150
• 19. ZBCM pawlpi RM100
• 20. ZCF-Kota Damansara RM300
• 21. Laaitui Khua Kipawlna RM200
• 22. ZAC pawlpi RM300
• 23. Harvest pawlpi RM200
• 24. Dal Sian Hung Ministries RM300
• 25. Lailo Khua Kipawlna RM300
• 26. Cingpikot/Keizang Khua Kipawlna RM200
• 27. Malaysia Muizawl Khua Kipawlna RM200
• 28. Adonai ZCF pawlpi RM300
• 29. Joshua Mung (Tungzang) RM50
• 30. Shalom ZCWC Pandan Indah pawlpi RM300
• 31. Tungtuang Khua Kipawlna RM200
• 32. Pu Gin Kam Lian US$100
• 33. Pu Kham Khan Thang US$100
• 34. ZCCM RM300
• 35. Olive Christian Church RM50
• 36. MMC Pawlpi RM100
• 37. Teeltui Vontawi Innkuan-Malaysia RM200
• 38. Tauleng Khua Kipawlna RM100
• 39. Ngalbual Khua Kipawlna RM200
• 40. ZCF-Hatamas RM200

TUKAL SUNG ZATO LAM BUAIPIH TE

1. Cing Cing (Tahan) Today’s Smile Dental Center

KIMAT KIHEN NA TUAK LEH : Zomi te sungah kimat kihenna na tuak zenzen leh hih phone no. te ah na hopih pah in. Nang a dingin a kiging sa in om den ding uh hi. Sia Tuang Pu : 016 254 4093

NASEP LAM TAWH KISAI : Zomi nasep neilote in nasep tuamtuam om hi. A lunglut leh dot nop aneite in Sia Khuppi— 016 3838 014, 011 3563 2059

LUNGDAM KOHNA

• 1. MCCM Genvai Kipawlna RM200
• 2. VLA pawlpi RM100

Panpihna hongpia khempeuh tungah genzawhloh lungdamna lianpi ZAM pan kong tangko uhhi. Hi danin I pan khopnate hang in tuni dong a kalsuan zo I hihi. Topa’n Zomite adingin mapang zo semsem dingin thupha hongpia tahen.

ZAM ZUM HON HUN

ZAM zum pen nisim in zingsang nai 9:00AM-6:00PM sung kihong den hi. Zum phone te ahi 03 2142 6659 leh 03 9226 1926 te zong zum hun sungin kiho thei ding hi. ZAM hotline pen a hun sim in kiho thei den ding hi.