Sangnaupang numei kum 16 aphakhin khat amahleh amah ki khailum
Indonesia gamsungah sangnaupang kum 16 aphakhin numei khat amahleh amah kikhailum “Suicide” cih Jakarta Post te’n genkhia hi. Tua sangnaupang pen sanginn panin daan kipia “Punishment” ahih manin amahleh amah akikhailum hi ci’n Police te’n genkhia uhhi.
Tua akikhaillum numeinu pen Indonesia gamsung Jabi, Batanghari Regency, Pemayung District sung aom Agriculture Development Vocational High School (SMK-PP) ah sang akah laitak ahihi.
Amahpen sanginn “dormitory” ah aom himahleh nung Sunday ni in anu apa te omna Batanghari, Muara Bulian District sung aom Sungai Buluh Village ah ciahin, amau innsung mahah aki khailum cihi.
Hihvai tawh kisai in thukan Muara Bulian Police, Sec. Insp. Amran in agenkhiatna ah akikhailum numeinu pen anu apa te’n mumasa uh cihi. Banghang in sangnaupang khat hizah in lungkhamna neithei in kikhailum lianghiam cihpen aki kancian laitak cihi.
Nung Saturday ni in sanginn Dormitory ah aciah sangsik in anu apa te omna ah ciahmawk hi. Anu apa te kiangah sanginn panin Punishment daan hongkipia ci’n khasia in innah aciah ahihi.
Sanginn ah sanghuansung khoding in hongkisawl in, pakkung zong nam 5 suanding in hongkisawl ci’n anu te kiangah genkhia hi.
Tuaban ah aki khailupma in Phone tawh aki hopihzong om ci a, sanginn pan hiding in anu apa te’n ummawh uhhi. Banghang in sanginn Dormitory hong ciahkiklo nahiam kici uh cihi. Banghang in daan kipia cih kitheicianlo a, athuteng palik thukan te’n kansan uh cih kiza hi.
Hih thuthang tungtawn in naupang neite’n ngaihsut huai hi. Ih tate sanginn ah nuam asa uhhiam? Alawm agual te’n abawlsia, asim mawhkha uhhiam cihpen amau ngiat tungah dot akul banah khatveivei alawm agual te tungpan inzong dot kiaukiauding kisam hi.
Tate mailamding, sangkah nading, pilna zonnading cih paulap in gamdang atung Zomi pawlkhat suntawh zantawh nasem in buaicipden uh a, tate zong donzo nawnlo uhhi. Tate tawh nikhat khatvei akimulo nulepa pawlkhat ommawk hi. Tuate’n tate bangci makaih in thuhilh zo mawkding?
Related: Sangnaupang kum 8 khat sanginn ah simmawh bawlsiat athuakzawh ninih khitciang in ki gui awk
Nasep kuanhun leh sangkah hun cihte tawh innkuan kimuhding alemkeiphial lehzong mikim in Phone neisam ahih manin, innkuan pihteng kiho zelzelding zong thupi mahmah hi. Azi apasal tawh innah lupkhop hunding aneilo pawlkhat nasepna ah naseppih tetawh nupa bangin aki limthuahzaw cihkhawngzong om cih kiza kiaukiau tamawk hi. ZD Sawltak #zomidaily
Comment piaknop aomleh...