China, Guizhou sung aom “Yongmao Middle School” kici sanginn khatah sangnaupang te’n Mobile Phone apuakleh matsak uha, satzansak pahpah uh cih SCMP pan kiza hi.
Sanginn sungah Phone zatding pen phalvetlo uh a, “Zero Tolerance Policy” ci’n sanghuangsung alutnakleh phalna kician omlo in Phone apua khempeuh matsakpah lianlian uhhi.
Tua sanginn panin Videoh akizaihkhat nungdiak in People’s Daily te’n khahkhia uh a, galkappuan asilh khatin sanginn ah Mobile Phone amatteng uh abanban in sekpi khattawh sekzan dikdek hi.
Sanginn ah Phone pua in sangsia te, thunei te theisaklo, puaktheih nadingin ngetna neilo cihte pen matsakpah lianlian uhhi. Tua Phone amatsak tepen tuisung ah diahsak in, tuakhit ciangin satzansak uhhi.
Sanginn tualpi sungah sangnaupang khempeuh ii muhtheihding in satzansak uh a, sangnaupang te’nzong endimdem uhhi.
Loudspeaker panin khatin thu genkawmkawm in, hih sanginn ah sangnaupang tepen Mobile Phone apuakding kiphallo hi. Puakkhak zenzen lehzong sangsia te kepsakding, phalna lakmasakding ahihi.
Azenzen in sanginn huangsung ah phalna omlo in Mobile Phone apua akimuhleh kimatsak pahpahding a, amau maitang mahah ki satzanding hi. Hihpen sangnaupang te hoihzawk nadingin akisem ahihi ci’n khatin genkhia hi.
Hihbang in Phone te satzanding pen sangnaupang te ii nulepa te inzong athukim uh hi a, akigensa ahihi. Sangnaupang te’n muhdan atuam hikhading a, ahi zongin nulepa te leh sangsia te ii kikupsa, ki thukimsa ahihi ci’n genbeh hi.
Social Media tungah pawlkhat in hihbangin sanginn ah phone akipuate aki satzansak pen diksalo in gensia uhhi. Mobile Phones tepen sanginn ii neihsa hilo a, hihbangin satzansakding thu neilo uhhi ci’n agengenzong pawlkhatmah omveve hi.
Hihbangdan Policy azangpen Yongmao Middle School bek hilo hi. Hebei khuasung aom Middle School khat inzong sanginn huangsung ah Mobile Phone zatding phalvetlo uhhi. Ahi zongin sanginn huangsung ah sangnaupang te’n thukin vaiphamawh aomciang in zattheihding in Payphones thuahsak uhhi.
Related: Mobile Phone tawh akizom Bilngaihna thuahsa in a ihmu khat sisuak
Tulai khuahun Technology khantohna tawh kizui in Kawlgam ahzong Mobile Phone kineitekpian cileng, Zogam aom sanginn te ah Mobile Phone zatdan bangci bangin Policy akimah tammaw? Sawltak #zomidaily
Comment piaknop aomleh...