Ka muhpak US Gamthu pawlkhat – 53

Ka muhpak US Gamthu pawlkhat – 53

America Ah Nasep Kipiak Dan
America ah nasep hong pia dingte pen Kawlgam bang a, ulian penpente zong hi tuan lo hi. Committee tu ngeiingaii a kikum phot a hong pia zong hilo hi. Tavuan a piakpa/nu bekmah in ama thu a hong piak tanghial mah hi pah lel hi. Tua hi a, nasep a piak dingte pen a piakkhelh khak ding kidawm mahmah uhhi. Mi hoih lo khat nasep pia khial kha thah leh apiapa/nu in amah guak lubuuk mah aa, a thuak pah ding ahih manin bulkan pha mahmah uhhi.

Tua kawmkal ah ka nasep siauh masak penna mah ah August 03, 2009 ni in khat vei ka ngen leuleu hi. A taktak ka siauh masak lai in driving license zong nei nai lo ka hih manin hong piak theih ding zong hi peuhmah lo hi. Tutung ka nasep siauh pen a awn laitak tawh kituak ahih manin ni nih khit takteh numei kum 40 khawng a pha ding a gawng giugeu khat in nailang sung phial ding khawng kam dotna (interview) hong bawl hi.

Zuau Theih Zuau Mawh In
Kei zong zuau theih zuau mawh mahin, Yangon Mary Chapman sangah kha 6 sung leh Insein Blind School ah kha 3 sung ka pension lakkhitteh khasum la lo in ka sem ngei ci in khempi mahin ka khem hi. Tua ban ah, na nuntakna sungah lungsim cidam lo mihai khat peuh a hi a, zu kham sa kham kitawng kilaii khat peuh ahi zongin, na tuah khak na buaipih khat peuh na gen ding a om hiam?.. hong ci ta dihdih aa, ka veeng naii pian tangval unau nihte zu a kham uh ciangin kitawng thei zel aa, tua tangvalpate gel kiangah va pai in ka leemtuah thei zelzel hi, ka cih leh hong um mahmah leh kilawm ka sa hi.

Nipi thum sung tangcim mah back ground check ci in abeisa a ei tawh kisai ih thu ih la hong nung kan phot dikdek aa tua zawh teh nasep hong pia pan hi.

(azom omlai hi…)

Agelh: Awn Za Pau