Malaysia ah biakinn sumpi RM50 agu pasalkhat kha 9 sung thongkiading in thu kipia

Malaysia ah biakinn sumpi RM50 agu pasalkhat kha 9 sung thongkiading in thu kipia

Malaysia gamsung aom gammite biakinn khatpanin sumpi RM50 agukha pasalkhat pen mawhnadan lohna in thong kha 9 sung ki kiasakding in thu kipia cih NTS pan kiza hi. Hih thupiang pen Malaysia, Kuala Terengganu sung aom gammi te biakinn Mosque khatah thupiang ahihi.

Tua sumpi agukha pasalpa pen amin Mohd Hafiz Ibrahim kici a, kum 27 aphakhin khat ahihi. Tuapa pen Magistrate’s Court ah thusitna kinei a, kamawh kahial kagukha mahhi ci’n amawhna apulak khitciangin thukhenmang Magistrate Abdul Hayyi Salim in kha 9 sung thongkiading in thu apiak ahihi.

A sumgukna munpen Masjid Lama Kampung Sungai Rengas aom Mosque khatpan hi a, abeisa Januar 10 nitaklam 3:37 leh 3:52 hunsung kikal in aguk ahihi. Tuahang in “Section 380 of Penal Code for theft” ci’n guktak gamtatna hangin thu akibawl ahihi.

Athu akigenna ah tuapa pen tuani in Mosque sungah aomzia, agamtatzia pen muanmawhhuai kisa ahih manin, Mosque’s Committee Members te’n CCTV Footage panin limtakin Video Clip te etcianna nei uhhi. CCTV sungah tuapa pen Yamaha 125z Motorcycle khattawh Mosque sungah alutkhit ciangin aguk ahihlam ki mukhia hi.

More: Malaysia, Klang ah guta te’n nupikhat ii akhi asuhsawm laitak Video ki khahkhia

Mosque ii amai ah citpiakna “Donation Box” bungsungah akikoih RM50 aguklam kiciantak in ki mukhia hi. Tuabangin aguktak gamtatna hangin Chabang Tiga Police Station ah Report kibawlpah a, asawtlo in Durian Burung aom Petral Station maiah January 18 zingsanglam 1am hunpawl in ki mankhiapah hi. Sawltak #zomidaily