Myanmar Rakhine State sung buaina hangin misi 71 bang phakhinta

Myanmar Rakhine State sung buaina hangin misi 71 bang phakhinta

Myanmar, Rakhine State sungteng ah Rohingya galkap te’n gamgi acingin aom Border Outposts te nakap, nasim uh ahih manin, mi tampi si cih AP News pan kiza hi. Hih Rohingya Militants te buaisakna hangin asi bekbek pen mi 71 phakhinta cihi.

Asi te lakah Myanmar Security Personnel mi 12 kihel uh a, Rohingya tezong mi 59 bangin sihlawh uhhi ci’n Myanmar Government in Friday ni in genkhia hi.

Rohingya galkap te’n Kawlgam kumpi galkap te hihbangin akap uhciangin Border Police te’nzong nathuk kikpah uh a, Rakhine State sungteng ah “Clearance Operations” ci’n siansuahna kineipah hi.

Rohingya galkap tepen akigawm in mi 100 bang phading in ki ummawh a, thau atawitawh, temta namsau “Machetes” atawitawh, apuakkhamthei Homemade Grenades atawitawh honkhat kiman cihi. Akiman tepen Myanmar Government inzong Photo tawh suahkhia uh cihi.

Rakhine State, Maungdaw Township aom hih buaina amukha Witness khatin Phone tawh agenkhiatna ah Friday ni zingsanglam 10am hunpawl in Kawlgalkap “Myanmar Soldiers” te akhuasung uhah lut cihi. Inn pawlkhat leh van honkhat haltum in, mizong 10 bang kaplum uhhi ci’n genkhia hi.

Video: Commission calls on Myanmar to end Rohingya restrictions

Khuasung mite zong lau in patau uh a, atuahna bangbang ah taikekmang uhhi ci’n Emmar cih bektawh akigen numei khatin phone panin Reporter te tungah genkhia hi. Khuasungmi atamzaw pen ageinai aom gamsung ah akibuding in kitaikekgawp cihi. Friday nitaklamdong in khuasung ah thaukikap aging leh apuakkham, meikhu cihte ki mutheilai cihi.

ARSA akici “Arakan Rohingya Salvation Army” kici galkap te’n amau mipi Rohingya te ahung, adonin kinei in, mun 25 bangah zankhatthu in Border Police te nakap, nasim uh ahih manin hih buaina apiang kici hi.

Related: Myanmar, Rakhine State sungah Dengue Fever angah mi 1400 pha, mi 16 sikhin

United Nations (UN) te genna ah abeisakum October khasung Rakhine State sungah buaina hangin Rohingya bekbek akigawm in mi 80,000 bang Bangladesh gamsung zuanin galtai uh cihi.

Arakan Rohingya Salvation Army akici ARSA te’nzong amau ii thuneihna Rohingya Rights cihkhawng Myanmar kumpi tungah ngetsawm uh ahih manin, Rakhine State sungpen buaina vengpak keileh kilawmmawk hi. Sawltak #zomidaily