Aw… Sweet December ~ Dong Mung
Huih damte hong nung hiauhiau in thangvan Aksite tang singseng, tung solkha leh tung sunnite a tan dan pian dang ngiat hun, mi zatam lam bang paakna leh haibang a ngaklah nunnuam December kha tuang hong tung ta.. Happy Sweet December!
Kum khat in kha 12 a omna sungah December kha pen a nunung pen hi cih mi khempeuh in i theihsa ahi hi. January kha pan in November dong pen mi khempeuh in ngeina bangin kingaihsun in kikal suan toto lel-a, ahi zongin December kha taktak hong tun ciangin mihing bek hilo in ganhing, singkung lopa, khuahunte nangawn lungdam hileh kilawm mawk hi.
Tapidawte bek hilo leitung mi khempeuh a kilungdam a, Sai- Bazar/Shopping khawngah Happy Sweet December ci-in lai kisuang zihziah in, khat le khat Sweet December kici lai khak or (Card) tuamtuam kikhaktuah hi. Mun khempeuh ah November 30 zanin December limtak kidawn ngiat sese hi.
December kha ii lamdannate:
- Mi khempeuh lungdam kipaak in lawp ngiat!
- Kum khat a kha tawpna pen!
- Khua hun mahmah nuam ngiat in zu le va, singkung lopate mahmah in nuamsa ngiat!
- Leitung mimawhte gum khia dingpa Zeisu hong suah kha!
- Khualzin gamvakte zong innlam zuanin a ciah ngeingai se!
- Mi khempeuh innkuan kimin ki om khawm nuam se!
- Ni tang kha tang, aksi tangte leh huih nun dan vasa ham dante mahmah kidang!
December kha sungin I sep tuakte:
- Kha 11 sung piikpeek Topa thuphate simin lungdam ko ding!
- Kha 11 sung piikpeek Topa tung i mawhnate pulak in thuum ding!
- Kha 11 sung piikpeek midangte tunga i mawhnate pulak in thuum ding!
- Kha 11 sung piikppeek midangte hong mawh khaknate maisak ding!
- Zesu I I mimal sung i innkuan sung i minam sungah innteek tang sak ding, amah suak sak ding!
- I innkuan sung vaite lung ngai pha in ki-itna khah khia kik ding!
- Innkuan sung mawhnate ki maisak in a thak a kalsuan kik ding!
- I mimal nuntakna mahmah kisit pah in kipuahpha ding!
- Tukum sunga thanemnate ki en phakik a, kum thak ading kigin kholhna hun hisak ding!
Aw Sweet December!
- Kei ading a khum pen hong hi in,
- Kei le ka innkuan ading a khum pen hong hi in,
- Kei le ka khua ading a khum pen hong hi in,
- Kei le ka minam ading a khum pen hong hi in,
- Kei le ka gam ading a khum pen hong hi in,
- Kei le leitung ading a khum pen hong hi in!
Sweet December nopna mikim tungah hong tung ta hen! (Happy Sweet December To You All) Sia Dong Mung, Yangon (Mauvom)
Comment piaknop aomleh...