Queensland Brisbane zinna – 2

Queensland Brisbane zinna – 2

Ni 29/12/14 ni maikum ading Brisbane Zomi Innkuan makai ki telna om ding cih thu za ka hih manin vaidang khempeuh nusia in paiding kasawm hi. Ka innkuanpih te’n paikul kei, tua vai-a, zin na hi hiam, I vakna dingah paini hong cih san uha, no napai un, ka man uhteh lawmte khat peuh hong kikha sak in ong nungpai ning ci-in ka paisan veve hi. RC te Hall khat a kikawm hi-a, Sia. Do Lian, Pu. Tawng Do Cin, Pa. Piangpi leh mi pawlkhat na tungkhin uh hi. Ni danga lawm leh gual pawlkhat leh hong ngaih man-a, nih vei bang hong hawhkhinta leh ka vakkal tawh kituak zel ahih manin ka ki muhpih theih loh U. Cicin tawh zong ki mukha ka hih manun kapai ka kisik het kei hi. Nai 10:30 a ki panding cih gelna omsa himah leh I gamlam ziamah ki khahzo nailo ahih manin nai 12:00pm kimin hun kipan zo pan hi. A pai a tamzaw khangno vive ahih manin Brisbane Khangnote zong minam itna lam-ah khangto mahmah cih hong musak a, mipil tampi tak in gam khantoh nading khangnote tungah kinga hi, cih thu hong phawksak hi.

Ki telna Pu. Tawng Do Cin, Sia. Mangpi leh Pa. Piangpi te’n hong makaih uh hi. Ei lam dan a Nominate teng Suang Laipi tungah gelhke cih dan omlo in Mangkangte dan mah-in lai dalno ah gelhsa in hong pia uha, ei deihteng kiuh ziauziau ding in hong bawl uh hi. Mi a Nominate te uh zong Kum 25 tungsiah bek himah leh Pawlpi pawlkhat, Khua pawlkhat sangin tamzawlai hi. Tuasung panin makaipi ding mi 5 telkhiat ding’in tua telkhiatte in a seppih ding uh amuan mi nih lak beh dingin apai mipi te’n thukim uh ahih manin Mee(vote) ki khia ziahziah hi. Kei ka hih leh lengla ka hih lam kitel ka hih manin hong ki sawlta leh Mee tangkhat zong khialo in ka en hi. Mi 5 a kitel khit ciangin President, Secretry, Treasure kitel suk leuleu a, President: Pa. Piangpi, Secretary: Tg. Cicin, Treasure: Pa. Hau Hang te’n hong ngah hi. Minam vei vive uh ahih manin Sia. Lang Pau in a ongdingteng mah in ong hi, acih bangin angah dingteng mah-in ngah hi dinga, ka lungdampih mahmah hi. Hun awng’ hong’ hong uha, Australia Zomi Khawmpi neih zawh nading’ aneu alian in I hanciam ding cih leh thu tuamtuam tawm genin makai thakte thapiak na tawmcik genin ka thugen ka hialbawl hi.

Ni 30/12/14 ni bang leh bang leh ci-in ka innkuan un South Bank ah Khuasung paina Meileng zui-in ka pai ngeingai uh hi. Meileng panin ka tuahkhiat khit uh tui bualna lam zuanin ka pailai tak un lampi ah Miphial bawlkhat na omin tutphah phahlo in Ciangkhut khat khunin tutphah tungah tudan mahin na tu-a, mi tampi tak in na en ngeingai uh hi. Ko zong muhnop kasa mahmah uha, ahih hangin sawtpi etding hun le sum ki cinglo ahih manin ka paisan pah uh hi. Tui kibualna mangkang numei pasal Video khawng, TV khawnga I muhte dan mah-in naki bual ngeingai uh hi. Kei zong ka nau Sangpu leh ka tupapa uh nau Sang tawh tui ki bual in a dangteng in nilim ah hong ngak uh hi. Numeite pen pheituam sungten leh nawituam tawh tui bualding phal hi-a, pasalte pen puanpa khat silh in pheituam tom tenkul se hi. Eilam tawh ki leh bulh pian cih ding hi. Mangkangte bawl tui bualnate sangin ei gam a, tuivai lui, kaphi lui, meitei gun te khawnga bual nop kasa zaw hi. I gam I lei nopna mah kip hawk zel ei.

Brisbane ah om nuam mahmahta leh ka zinding un ciahna ding Meileng tuanna ding lai ka laksa uh ahih manin ut in utta kei leng ni 5/02/15 ni zingsang hong tungta a, ka nu in nai 3:30 pawl in hong phongh hi. Ka Meileng uh pen zingsang nai 4:55am a dingkhia ding hi-a, local train zuileng ki lapman dingin ka ngaihsun hi. Kanau Piang in hong kha a, local train matna ding ka tun uhteh nai 4:30am a pai pan ding cih kigelh mawk ahih manin hih ngak peuhmahleng ki laplo ding cih kadip na ngawnin hong hilh in kisai litlit hi. Ka ngaihsut kik leh a baihlua khat ka phawk kik a, tua pen haksatna buaina khatpeuh tuah ciang zat theihding Taxi a baihsa a omden cih ahih manin ka Phone leh a sawtlo in hong tungpah hi. Taxi hawlpa kiangah ka meileng din’ding hun ka gen leh ama’n zong nawhsa tak-in hong taipih pah hi. Lampi ah ka khuadak kawikawi leh Brisbane khuasung pen Tokyo, Sanghai, Hongkong, khawng bangin tang zihziah a, etlawm kasa a, ka lungsim hong la mahmah hi. Ko omna khua khawng tawh kateh kakteh ko a bel Khuano thilthel, kaci a, logiak bangin ka ki ngaihsun hi. Khatvei ciangin hih mun ah Sangkah pelmawh dingin ka ngaihsun hi.

Ka Meileng tuanna ding mun ka tunteh kanau Suan Lun tuan theih nading phalna lai(ticket) kila nailo ahih manin Zum ah kadawp leh a tungah kahto un ci-in hong sawl a, ka pai uh leh Meileng pai dingin na kithawi hi. Meileng lamsai khat kiangah ka dot leh a sungah hong paipih in hih mun ah la-in ci-in hong hilhziau hi. Meilengsung mah ah, tuan theihna ding Letmat(ticket) aki lak theihlam ka tuah khakcil na ahih manin ka um kei dektak liang a, na ki lathei takpi sam hi. New Delhi bangah ngah hak mahmah in tatkal a, painuam lawmte pawlkhat bang’ zan vagiak ahih kei leh zingsang khuavak ma-a, tho, sun nituam a vabuaipih, vangak cih bang dan hi-a, tua tawh kateh kakteh lawm te’n IT hun nuamzat deuh uh kasa hi. Meileng a niacin lian in dingkhia a ka omna uh aki gelhsa om mah bangin nai 11:05am ki ka tunglian uh hi.

Ka omna uh pen Brisbane sangin naikhat manlang zaw deuh ahih manin ken Brisbane nai mah zang khalai ka hih manin tuahkhiat ding phawk paklo in Meileng in kei tuah khiat ding bek Minute 4 tang ding hong ngak zen hi. Ka tuahkhiat phet leh Pastor. Bev in hong nadawn lian a, lamdang kasa peuhmah hi. Happy New Year khawng ci-in ka kilen seisai uh hi. Ka lungsim sungah bang mah lah hong zasaklo lamdang si-e, ci-in ka phone ka et leh SMS hong khak ka mu pan phing hi. I’m sorry ci-in ama zak loh in kei leh kei sorry ka kipia hi. A mawtaw tawh ka omna uh inn dong’ hong kha vingvengh a, inn sungah hong tum phot in tuivot khawng dawnphot dihni, ka cih leh vaidang nei ing ci-in, nek theih ka puak uh Chumaimai ka piak leh lah hong sang nuamlo hi. Sum……… ka piak leh lah hong sang nuam tuanlo in na Sang kahna dingin na zangh in ci-in hong paisan ziau hi. A Pasian nasep dan thupi kasa a, ka zahtakna akhang semsem hi. Ka lungsim sungah Pastor.Bev. you are the man of God himawk niciai kaci hi. Eimi pawlkhat bang hi leh bang zah hong ngentam? cih ka thei kei a, tulai biakna makaita dingin hih Pastor nu nasep dan etteh huai kasa mahmah hi.

Hici bang a, mi dangte huhzia, panpih zia pen ei Zomi te’n zong I gam ah Christianity or Gospel hong tun’ mapek in I neihluat ahih lam I minam ciaptehna Vaphual in hong phawksak hi. Hong ukcip kawlte leh vaite in hong zawhluat man’ hang hiam, tu hunteh mi tampi in taisan in, khahsuah in Sum ngahna ding ahih kei nak leh kua mah huh nuamlo, meigong tagahte nangawn ki don nuamlo in Khuapih te’n tangtha nangawn hong cial hang un akuan nuamlo mi tampi tak I omta hi. Pasian nasep zong a hamsatna mun leh min ngahna ding, mipi theihdingte pawl ahih kei leh no Community makailam te’n hong semun cih dan peuh in midangte I khiat thei hi. Hih Pastor nu-in Pawlpi mi a tul asim nei ahih manin khat peuh sawl leh zong, ki ngahlua ding hina pi’n amah mahmah kei bangmah a hilo tangtel bang lel huh dinga, hong ki piakkhiat det pen thupi kasa hi. Queensland Brisbane kazin tungtang, asun, azan cilo in ciah leh kuan hongkha, hongdawn den ban-ah sum piakhat zong hong lalo, tuivot haikhat zong hong ngenlo Pastor. Bev tung leh, Brisbane aom Zomi pihte khempeuh ban-ah thu hong ngetsak a kuamah peuh tungah ka lungdam mahmah hi.

Khaibawi