Quantity leh Quality ~ Tungg Thang

Quantity leh Quality ~ Tungg Thang

Zomi sungah thu ngaihsun pawl khat a om teei hangin tawm lai mahmah hi. Tua hi in thu ngaihsun mi i tam na tungtawn in khantohna zong hong manlang ding ahihi. Tua lo in dualdap in i om leh mi cihpeuh a hi sa pahpah, thu khat peuh ahoih sapahpah cih bang pen khantoh nading hong khaktan mahmah thu hi. Tua hi in thu khat peuhpeuh a om ciangin i ngaihsut dingin a kihanthawn nuam ihihi. Saikak theihna, tehkak theihna neih theih ding pen a thupi ahihi. Khua neu a om te’n khuapi pan a hong pai khat om leh tua ii thugen maan sa pahpah cihte, Doctorate khat ii thugen ahih nak leh san huai sapahpah cihte pawl pen tu hun ading in hoih nawnlo hi. Gamdang pan hong ciah peuh thupi muhpah cih pen dinmun a maan zo nai taklo ahihi. Tua hi a, critical thinking tawh suakta tak a i sittel ding thupi mahmah ding hi. Gamdang tung in Kawlgam ate neu-et pah cihte pawl pen a ngaihsut phathuai thu ahihi.

Zomi sungah quality leh quantity tawh kisai in pawl khat in ngaihsut in a nei mello tawh kibang hi. Na khempeuh ah a quality in thu a gen mahmah ahihi. Quantity a hih leh a thupi na mun a om mah bangin quality zah in manpha lo hi. Kammal kinai mahmah nih hinapi in a khiatna pen kigamla mahmah hi. Zomite i pil ciangin quantity tungah dinglo in quality tungah a kiding ding hita hi. Zomi pil tawm khat bek nei ihih manin mikim in thu kitam ngaihsut nailo hi. Lai Siangtho sungah Zechariah 4:16 in a genna pen quantity hilo in quality a gen ahihi.

Khangtoto

Zonet sung i et ciangin tuma kum nih lai sangin khangto zaw ihih manin lungdam huai mahmah hi. A beisa hun zah in lai hoihlo, a zakdahhuai kammal kitamzat nawnlo hi. Laigelh dan zong kisiam zawta hi. Naupang vai tawh a kibang thu hong tawm zawdeuh hi. I muhna zong tampi hong zaito zaw ahihna kilangh hi. Zomi tawh kisai nette ah zong kiko, kitotna hong tawmzaw ta ahih lam imu thei hi. Mailam ah quantity leh quality zong khentel thei ding cih i kilamen mahmah hi.

Quantity

Zomite kisap quantity in bang ahiam cihleh mimal mahmah tampi iphak ding thupi hi. Minam dangte tawh i kiteh ciangin Zomite pen kitawm lua lai mahmah hi. Hih mun ah mimal quantity hong thupi mahmah ding hi. Pawl khat in thu tampi a gen theite peuh thuthei sa kha thei uhhi. Pawlpi sung, kipawlna tuamtuam ah tua bang dan mi om thei pha deuh hi. Lai tam gelhzo leh thupi asa tampi ki-om hi. Hih mun ah a quantity tungah ding lehang tua bang ahi thei ding mah ahihi.

Quality tungah ding hileng pen mi khat ii gen thu, gelh thu, bang thu ci-in hoihtak sittel in tua tungtawn in mat a kipia thei bek ding ahi hi. Mun khempeuh ah kihel zawh denna cih khawng pawl khat in thupi sa mahmah lai hi. Thu kigen peuh a kum theite peuh pil asa ki-om lai hi. Tua hi in mihing khat in pen i zawh ding line khat bek a neite ihihi. Tampi ikuppih hangin ei line bek mah ah a kilawhcing ding bek ahihi. Ei line lopi peuh ikikuppih pong hang man nei tak khollo hi. Na khat peuhpeuh ah a gen ngam, a pau ngamte kihtak a neithei mawk lai hihang.

A hihhang tuate pen ngaihsun phapha lehang i zawn man, i hai man peuh na hithei mawk hi. Khangluite in “ka zawn in hong hai sak” acih zong a maan naciang khat om hi. Pawlpi sunga kipan mun tuamtuam ah kiteelna khat peuh a om ciangin zong a quality tungah ding ngamlo in a quantity tungah kiding kha thei zel hi. Tua bang hi in a tawpna ah i deihlohpi te zong nial ngamlo in a ki-om cip thei ahihi.

Zomite pen a kilang bawl ding in mimal tawm lua lai mahmah hi. Tua hi in kilang bawl zawlo in a kihuai dingte ihihi. Kilang bawlna in khantohna hong tunpih lo in phattuamna hong pia lo ding hi. Leitung pen a neu semsem ding hi a, mailam ah koi mah ah kibuzo loding hi. Kha tungah i kah phial zong in hong kidelhto ding ahihi. Pasian in Lai Siangtho sungah aksite tungah bu na bawl zongin kong phiat khia veve ding hi na ci khol khin hi. Tu in i kimuh nai loh hang mailam hun ah a kimu dingte ihihi. Tua ahih manin thu khual huai hi, sipah ning icih kei nak a leh.

Quality

Zomi tampi in na khat peuh ii a quality i ngaihsun lua naikei hi. Pawlpi sung, khua sung cihte ah mite’ maitang zahtak manin i deihloh thu khat a om phial zongin a quality enlo in i thukim pih pong hi. A diakdiak in mailam adingin quality pen nak thupi mahmah hi.

Hih quality tawh kisai in Zomi tampi in zong zolai ii quality a ngaihsun ngei meello hileh kilawm hi. Tua ahih kei leh zong lai a kici ii hoihna leh hoihlohna zong a thei ngeilo himai ding hi. Hih mun ah criteria of literature pen hong thupi mahmah ding hi. Lai khat ii criteria a kim/cing zo mah hiam? Leitung laite zong exceptional a nei vive mah hi in, Zolai ahih leh tu ciangciang leitungah exceptional a tampen hi kha ding hi. Mi pawl khat in lai simsim tei leh kilawm napi in a theihhuai pipi zong a theilo na om thei veve sam hi.

Gentehna in the History of Literature cih tepawl bangah en lehang tu a English a kikheltohtohna, Old English, tua khitteh Middle English leh tuhunteh Modern English cih khawng a om lam pen theih huai napi in a thei khalo pawl khat ommawk hi. Theinapi a theilo a kineih zong bel omthei sam inteh. Tu hun ciang in van kibawl te ah mi tampi in a quality hong enta uhhi. Made in US, Japan khawng a kicih pian leh ahoih in ngaihsun pah in, made in China a kicih leh quality hoihlo in kiseh pah hi.

Thu khat a kigen leh zong a quality ki-en hi. Lai khat a kigelh leh zong a quality ki-en in, a muibutna pen a quality hong hipah hi. Pawl khat in thu gengen in a taksuah theilo ding zong tampi tak om thei hi. Na khat thu khat pen a taksuah theilo ding ahih leh thupi lualo mai hi. Hong nungta in muh theih in hong om tak ciangin a mannei hong suak pan ding hi. Pawl khat ahih leh damdam in hong taksuah pan thei hi.

Na quality bang? (Ka talent bang?)

Lai Siangtho sungah Pasian (Kha Siangtho) in mi khat tungah a kibanglo siamna khat ciat pia hi (Icor. 12) kici hi. Tua pen thu dang khat in gen lehang talent zong kici thei hi. Na talent bang ahiam? Ka talent bang ahiam ci a kidot phat ding zong a thupi mahmah ahihi. Music kiva lopi khat in La makaih leh nasia lualo ding hi. Ama zong zawtzo lualo ding hi. Pasian in hong zat nopna a tawmpen nam khat tek om hi. Mi dang khat pen kineu et theilo hi. Khut dawh ngen khat nangawn in ei hih theihloh na khat hih thei gige mawk hi. Mi i thupit sak ding kisam hi. Mihing pen Pasian muh bang mah in a man nei mah in i muh theih mateng i thukhupna pen hong hoih khollo ding hi. A diakdiak in Zomite adingin Pasian mah na khempeuh ah a thupi pen ahih manin Pasian (itna) kinawl khin theilo ding hi. A nawlkhin a omleh amah leh amah a kinawl khin hipah hi.

Tua ban ah itna neihna lotawh i mipi sungah kilawhcing zolo ding hi. Zomi ka it ci in a Zomi pih khat a mudah a langpan den mi pen a cih takpi hi ngeilo ding hi. Itna i cih pen Pasian tawh a om khawm ahihi. Tua itna (Pasian) lotawh na i sep sawm hang in lawhcin ding baih lo ding hi. Itna i cih zong mailam thu khualna cihnopna zong ahihi. Lai Siangtho sungah mailamah bang hong piang ding theilo na hih man in na kisathei khol kei in kici hi. Tu laitak in hi i kisak hang khangluite in zong “Mihing leh papo” na ci hi.

I Zolai pen Pasian thu tawh hong ton hi in Pasian thu (Itna) tawh i kikhen leh Zolai maan hinawn lo ding hi. Gaalte nangawn itna pen Pasian zia, ama hong pattah na ahihi. Thu leh la i gen ciangin mailam thu ding ngaihsun khol in i gen kei leh “aktui sunga, a vom ding leh a kaang ding kigen khol theilo” acih mah ahihi. Tua hi in philosopher Albert Einstein in “Life is too short to be selfish” a cih pen kicing lua mahmah hi. Hun khat ciangin i thu gen, i lai gelh tungtawn in thu hong kibawl kik thei ding ahihlalm kidophuai hi.

Khantohna

Lai Siangtho sungah i muh mah bangin mihai khat in hong phatna sangin mipil khat in hong taina pen a manpha zaw in na gen hi. Hong kilangpan ciangin lungkiat pah ding hi tuanlo a, quality a kah nading hong suak kik bilbel hi. Thu ngaihsun meello khat in hong phatphat na pen thupi tuanlo hi. Thu ngaihsun mi khat in hong langpan na pen thupi mahmah zaw ding hi.

Picinna

Mi pawl khat pen heh mahmah taleh a thugen, a laigelhte khum mahmah thei lai hi. A hizongin a sungah pen khauh mahmah hi. A sunglam tangtel sihtan bang napi in a maitang ah kidawksaklo in seel siam mahmah pawl khat om hi. A hizongin mi pawl khat leuleu pen a thugen, a laigelhna tungtawn in a lungsim tampi kimukhia thei pah hi. Tangtel sihtan bangin a kitompah cih bang phial in om hi. Hih pen ahih leh a naupang vai khat hong suak hi. Picin zawhlohna khat zong ahihi. Khangluite in paunak ah cillumsa tawh valh cih bangin na gen uh hi. Hih thupen picin mahmahna khat ahihi. I Zomi paunak, thu ciin te pawlpen a mannei mahmah na himawk hi.

Sum bawlna ah zong

Sum bawlna ah zong quantity leh quality hoih tak i khen kei leh ahilo pi a kituak thei ahihi. A quantity bek en in sum tam ngahna hipeuh leh ci in thumaanlo tawh na akisem thei ahihi. A hizongin tua bangin kisem leh tua in a tawpna ah gilbeem zong tun thei ding hi. Sum lah tam ngah in sum lah tampi mah bei kik pah thei mawk hi. A hih hangin quality a ente in a sum tam ngah ding quantity en masalo in kei tawh kilawm maw? Pasian in deih maw cih a quality en in zong haupah lo phial in a quality keem cing hi. Tua bang tepawl pen kipin kho in damdam in khangto thei zaw mawk hi.

Thu Khupna

Bangbang i ci zong in quantity icih pen a kimu pah thu hi in, quality i cih pen zong a kimupahlo zong hong suak thei hi. Tua hi a, a tawpna thu, thu hong khupna pen a thupi hong suak ding hi. Zomite quantity tungah tam din nawnlo in a quality sit thei ni cih a kigen nuam ihihi. A tawpna ah ei leh ei kimuhna hong thupi loding a mipi in hong muhna thupi ding hi. Mihingte pen ei leh ei a maan a i kimuh ding hamsa mahmah hi. Mi dangte tungah muhna i neih bangin ei’ tungah muhna kinei theilo mawk hi.

Hih pen leitung mite’ pianzia ahihi. Tua hi in thu leh la khat peuhpeuh a om ciangin mi gen tungtawn in dinglo in ei mahmah in sittel thei lehang cih i kitha piak nopna pi pen ahihi. Maitangzahtakna te pen mun khempeuh ah hong dik khin loding hi. Thu maan ah zong i din ngam ding hong kisam ding hi. Mi dang khat i maitang zahtak manin i man kiamsak loding hihang. Quantity pan quality ah kihei hunta hi.

I muhna, i ngaihsutna te zong leitung hun tawh kizui in conservative den thei nawnlo hi. Conservative icih pen 19th century, 20th century hun lai thu a hipen hi. Tu hun 21st century ah leitung thutawh kisai leh Pasian thu pen Liberal tak in ngaihsun in (quantity) ahih hangin conservative tak in Pasian mahmah up ngiat ding (quality) a thupi ahihi. Minam itna leh deihsakna tawh, Tungg Thang (UB Fellow, Silliman University, Dumaguete City, Philippines)