Puchong veng lamah LRT Meileng taisak tading

Puchong veng lamah LRT Meileng taisak tading

Malaysia gamsung ah khuasung vengkhat leh vengkhat kikawmna alemzaw, abaihzawding ngimna tawh Prasarana Malaysia Bhd te’n meileng Station hong behlap uh a, hongtungding April 01 niciang in LRT Station athak 4 ki honbeh tading cih The Rakyat Post pan kiza hi.

Meileng LRT System ihcihcih pen a Long Form in “Light Rail Transit” hi a, Ampang Line LRT panin Puchong venglam zuanin Station 4 aki behlap ahihi. Tua akibehlap Station thak 4 tepen IOI Puchong Jaya, Pusat Bandar Puchong, Taman Perindustrian Puchong, Bandar Puteri cihbang in Station min kipia dinghi.

Chief Executive Officer Datuk Azmi Abdul Aziz in hih meileng lampi aki behlapna hangin mi tampi in khuasung kikawmna ah tampi noptuamding uh cih a lametna genkhia a, hih meileng ataina munte ah khatvei apaisim in mi 1100 tabang puadending ahih manin, mi tampi in noptuam pihding cih genkhia hi.

Tuaban ah Prasarana Malaysia Bhd akici Company te’n mipi atamtheithei in Public Transport azaknoptheih nading in Promotion tuamtuam bawlzel uh a, mipi alunglut theihtheihding in vaihawm tawntung uhhi.

Tulaitak nisim zumkah hunsung in mi 450,000 valbang in LRT meileng zangden uhhi cihzong genkhia hi. Tuaban ah mailamciang tuasangin azang tamzaw semsemding ahih manin kumkhatsung in LRT meileng azang mi 50,000 tabang ki behlap dending cihzong amau ii muhna leh upmawhna te genkhia uhhi.

LRT Station aki hongthakding munte pen mipi te nawkphatdiakna munte ahih manin, hih Station athak 4 bekbek hanginzong LRT azang tampitak ki behlapding cihzong genkhia uhhi. IOI Puchong Jaya, Pusat Bandar Puchong, Taman Perindustrian Puchong, Bandar Puteri cih vengsung ah aomkha tezong ahamphadiak hongsuakziau hi.

Nungkum October 31 ni inzong Station athak 4 aki honbehkhin hi a, aki behlap LRT Station te ahihleh Awan Besar, Muhibbah, Alam Sutera, Kinrara BK5 te ahihi. ZD Sawltak #zomidaily