Pu Thang Khen Pau Gualnam’ Mualliamna-ah Minsialna

Pu Thang Khen Pau Gualnam’ Mualliamna-ah Minsialna

Seitual Khuami Gualnam’ Tapa Thang Khen Pau, maáineuna leh kisuanna omlo, khamuang angtang tak-in na’ zuatna Thangvaán Zawl-ah maáipaak tak-in tuang va-tung inmaw!

Kam-tawh minam it leh kineihna-tawh minam it na-hi kei-a, kalsuan khiatna-tawh minam itpa na’ hihi. Pulpit leh Online pan-a minam it na-hi kei-a, lungsim takpi-tawh minam it na-hihi.

Zomi Association of Malaysia (ZAM) apiankhiat nading-in 2006 June 7 ni-in Pu Neng Hau Kim, Pu Khawm Khen Mang, Pu Hang Khan Kap cihte leh ka’ nau Langh Suan Cin te-tawh lei hong petlet Ngalliam Thang Khen Pau:

Mite-in bangbang-in hongmu-in hongseh mahleh Na’ hihna taktak “Minam Itpa” na’ hihna khangsawn zata-in tuubang ciing dinghi. Malaysia pan-a Gam Thumna atung Zomite deuhdeuh-in phawkden uhhen!

Ziilehta’ maáipha-zong muhloh lawhphial khading himahlecin USA pan-in Malaysia-ah hongpai-in “Gamnuam tungsa Zomite’ kiang-ah hihteng-a dongtuak Zomite huh nading sumdong ding-in palaai kiguang le-uhcin” ci-a veina-tawh hong tutpih mi thupi Ngalliam Thang Khen Pau:

ZAM kalsuanna hong taángzai-in hong phungphat ciang-inzong “Ka’ patsa, … ” cih kammal-tawh ZAM Tanute’ thaneem nading kammal khatvei beék aging saklo Ngalliam Thang Khen Pau:

Laulo, lunghianglo, lungneulo, kisuanglo tak-in Zomi minam na’ itna masuan inla, angtang tak-in awmpho leuleu-in Thangvaan Khuamual va-suak inmaw, Ngalliam Thang Khen Pau Gualnam!

Zomi Salphate’ Salpha Thang Khen Pau, Daihna Sung-ah Tawlnga In. Minsial, T. Zokhai (Founder & Former Gen. Secretary, Zomi Association of Malaysia) Established on 7 June 2006 Zosai (Cinpi and Khampu Pty Ltd.)

ZAM pan dahpihna pulakna

Pu Thang Khen Pau Gualnam pen June 2006 kum in Zomi te zong kipawlna kician khat neih loh phamawh hi ci-in veina lianpi tawh sum leh paai leh hun te pia khia in Malaysia gam ah hong zin a, Zomi Association of Malaysia -ZAM kipatna dingin hong hanciam khia khat na hi hi. Phulum phulna dingin leikha in petlet a cih bangin Zomi Association of Malaysia-ZAM a pian na dingin a petlet te sungah khat a hi hi.

Pu Thang Khen Pau Gualnam pen Zomi itna leh veina tawh a sup lawh a bei lawh ngam khat a hi hi. Mitampi takin Zomi hangin met lawh sawm hi mah leh Pu Thang Khen Pau Gualnam in a veina taktak pen piakkhiatna tawh hong lak khia hi.

Pu Thang Khen Pau Gualnam, Malaysia leitang tungah om veina tawh a kipiakhia Pu Zo Khai leh a lawmte makaih na tawh June, 2006 pan Zomi Association of Malaysia -ZAM kiding a,tuni dong mah maban kizom toto hi. Hih kipawlna hangin Zomi tampi tak mah gam thumna ki tun lawh a, gentheih haksa tampi tak mah zong noptuam lawh in thong kia ding tampi mah zong suahtakna ngah lawh hi. Zomi te tangthu ah a mang ngei nawnlo ding leh Zomite om lai teng a kigen den ding tangthu hoih khat a at khia Pu Thang Khen Pau Gualnam hi mun pan in zahtakna i pia hi.

Pu Thang Khen Pau Gualnam in 23 September 2020 ni in a teenna California, USA pan in leitung nuntakna nusia in i Pa kiang ah hong ciah san hi. Pu Thang Khen Pau Gualnam hangin a dah a kap khempeuh Topa’n a lamdangin hong hehnem ta hen.