USA, California pan Pu Thang Khen Pau (Seitual, Gualnam) in hongnusia
Mangpha Pu Thang Khen Pau (Kum 72) Gualnam Beh – Zogam Seitual Khuami California State, Pasadena aa ateng Pu Thang Khen Pau in abeisa September 23,2020 in Lungtang damlohna tawh hongnusia chih thu izak man in ZIUSA kipawlna mintawh dahpihna i pulak hi.
Pu Pau pen adiakdiak in Malaysia a om Zomi te deihsakna tawh USA pan pai in Zomi Association of Malaysia (ZAM) apiankhiat nading in mapang khat ahihi,Pu Pau ZIUSA Genvai member onglut ni 7/31/2020 akipan tunidong active member khat ahih manin thumeilet zuiin (25%) Death Benefit $3750 kipiakhia dinga paakkual $150 man khattawh zong mangpha khakna kinei ding hi.
Pu Pau luanghawm tawh anunungpen hunzatkhop ding hong tungding October 5th ,2020 in (Myanmar Full Life Mission Church) makaihna tawh, Funeral Service bawl khit ciang, Rev.Dr.Chin Khua Khai in vuina nei ding hi.
Pu Pau hong nusiatna hanga adahakap alungleng khuangai Innkuan pih tanau meltheih khem peuh hehnemsiampa Kha Siangtho in alamdangin hong hehnem ciatta hen! Dahpihna Lianpitawh, Mun Mang Genvai tanupi (Zomi Innkuan USA, Inc.)
ZAM pan dahpihna pulakna
Pu Thang Khen Pau Gualnam pen June 2006 kum in Zomi te zong kipawlna kician khat neih loh phamawh hi ci-in veina lianpi tawh sum leh paai leh hun te pia khia in Malaysia gam ah hong zin a, Zomi Association of Malaysia -ZAM kipatna dingin hong hanciam khia khat na hi hi. Phulum phulna dingin leikha in petlet a cih bangin Zomi Association of Malaysia-ZAM a pian na dingin a petlet te sungah khat a hi hi.
Pu Thang Khen Pau Gualnam pen Zomi itna leh veina tawh a sup lawh a bei lawh ngam khat a hi hi. Mitampi takin Zomi hangin met lawh sawm hi mah leh Pu Thang Khen Pau Gualnam in a veina taktak pen piakkhiatna tawh hong lak khia hi.
Pu Thang Khen Pau Gualnam, Malaysia leitang tungah om veina tawh a kipiakhia Pu Zo Khai leh a lawmte makaih na tawh June, 2006 pan Zomi Association of Malaysia -ZAM kiding a,tuni dong mah maban kizom toto hi. Hih kipawlna hangin Zomi tampi tak mah gam thumna ki tun lawh a, gentheih haksa tampi tak mah zong noptuam lawh in thong kia ding tampi mah zong suahtakna ngah lawh hi. Zomi te tangthu ah a mang ngei nawnlo ding leh Zomite om lai teng a kigen den ding tangthu hoih khat a at khia Pu Thang Khen Pau Gualnam hi mun pan in zahtakna i pia hi.
Pu Thang Khen Pau Gualnam in 23 September 2020 ni in a teenna California, USA pan in leitung nuntakna nusia in i Pa kiang ah hong ciah san hi. Pu Thang Khen Pau Gualnam hangin a dah a kap khempeuh Topa’n a lamdangin hong hehnem ta hen.
Comment piaknop aomleh...