Pope hong zinna heh huaihiam, lungdam huaihiam?

Pope hong zinna heh huaihiam, lungdam huaihiam?

Online ah Pope ui ko ngeu ko a ako Zomi pawlkhat om ta lawmlawm ih hih man in omkhong thei nawnlo in hih lai kong gelh hi.

Pope i hoihna leh hoihlohna thutuam hi in nungzui mi million 1000 val nei ahih man in thuthei te’n zahtak uh hi. Binladen nangawn in lau hi. Pope ih zahkoma in en nungzui bang zah nei ih hiam cih ki ngaihsut masak ding ahi hi.

Kawlgam ong mawk pai hisamlo a gam thudot pi Daw Su in ava sap ngiat ahi hi. Than Shwe te Khin Nyunt te’n zong naksap mahmah ngei uh a tua hunlaite in ong pai hetlo hi.

Metna

1. Pope hong paina hang in metna tam mahmah hi. Metna lianpi masapen Rakhine gam a mivomte’ vai ah kawl kumpi nakthei tuam sak hi. Leitungbup in kawl kumpi amawhpaih laitak in leitungbup i zahtak Pope hong paina hang in RC tamna gam te’n kawlgam pressure pia nawnlo pah lian hi. Gtn in Europe bang in a thukawng uh hek lian hi.

2. Tulaitak kawlgam ah Christian sung buaina apian theihna ding ahanciam mahmah kawl misok tampi om hi. Hih Pope hong paina hang in Christian te hong muhna uh tampi kilaih ding hi. Nung in NLD te’ bawl biakna kim thunget khopna ah Cardinal Chargles Maung Bo i thugenna hang in zong kawl te’n Christian te hong ittuam khin mahmah uh a tu a Pope hong paina in tua kipsak tektek ding hi.

3. RC pawlpi mi khat a ding in Pope mukha ding cih mawk pen a ngaihsut ngam huailo phial thukhat ahi hi. Tu’n Pope hong paina hang in kawlgam mun tuamtuam a om RC te alom atang in Pope en ding in hong pai uh hi. Lungdam thei mahmah uh hi. Amau’ sung ah thathak tampi lut hi.

Thukhupna

Pope hong paina hang in ih sup ih baina mal khat zong omlo a metna vive hizaw hi. Mi’n Pasian zah dektak phial a athupitsak khat uh va gensiat sak mawk pen kilawm hetlo hi. Khasiat huai mahmah hi.

Mihing gen loh singkung khat zong va zahtak bawl in va thupit bawlbawl le hang vang hong nei takpi mawk hi. Pasian’ hong piak mihingte’ sung a om vangliatna tawh midang nadang khat peuh ih zahtak bawlbawl ciang in vangliatna khat kah takpi hi. Kawlte’ thupitsak mahmah ahi Shwe Da Gone tattung bang pen akibawl zawh kum 2600 val ta hi. Kum hizah mi tampi in azahtakna hang un vangliatna khat nei takpi ding hi. Va mawk simmawh ding hilo hi. Pope ih cih zong vangliatna anei mihing million 1000 val in zahtak ahih man in ih zahtak bawl kei leh ih khial ngeingei ding hi.

Khat leh khat ih ki zahtak siam ding thupi hi. Mi ih hehsak sang in lungdam sak leng hoihzaw tham hi. Zomite’ sung ah khat leh khat kizahtak diamdiam theihna a om masiah ih Minam cidam theilo ding hi. Leitung ah ih theih nailoh thu tam mahmah hi. Ei’ theih bek a man na hikhin hetlo hi. Zomi sung ah ki-itna leh ki zahtakna khang semsem ta hen! Amen

Genkhialh a om leh ngaidam
Nong-it
(Mung Laan Thang)
Zangkong