Pilna khang sem sem, lungmuanna lah om tuanlo

Pilna khang sem sem, lungmuanna lah om tuanlo

“Pil sem sem lehang kilunghimawh sem sem a, tam thei sem sem lehang hong gimsak sem sem zawsop hi.(Thuhilhna 1:18).”

Laisiangtho in leitungah pilna leh siamna khang sem sem ding ci hi.Leitung miten pilna leh siamna mah ki thupi ngaihsun hi.Ahizongin tua pilna leh siamna ten lungnopna tak tak hong pia thei lo hi.Leitung hun tawp dong mah in pilna khang sem sem ding hi.Ahizongin tua in lungkhamna leh buaina khawng peuh piangsak zawsop thei hi.Tua ahihmanin leitung khantohna leh pilna siamna te Khris tawh kigamlat nanga zat khak hetloh ding thupi hi.

Hun paisa ei theih phak ciang bek ah zong pilna khang mah mah sam hi. August 26, 1983 pek in BBC leh VOA ten mihing ci leh sa (organs) a ki khek ding thu tangko khin hi.Tua hun lai in up hak kisa himahleh tuhun ciang khuak kikhek(Brain Transplanting) lo ngal siavuan ten haksa nawn lo uh hi.Mihing organ a kicin kei leh zong Vawk a’ khawng kizang thei ta hi. Kum 1970 kiim in misiam ten nau paai kuul lo in Test-Tube sung pan piang sak thei ta uh hi.Numei cidam lo leh a ki nungaksak den nuam ten test-tube pan nau piangsak zaw ta uh hi.Kum 1978 in US gam sung bekah Test-Tube Bay 1,00,000 pha ta hi. Numei bek tham lo in pasal te zong nau ki paisak thei ta zen ei.Prof.Edwin Symonds, Obstetrics & Gynaecology, Birmingham University in Pasalte’ gil sungah sulbawm koih siam ta hi.28th June, 2008 in pi Nancy Robert ii’ pasal Mr.Thomas Beatie(34) in nau pai in tanu deihhuai tak Susan Beatie hong suak hi.

Ganhing zong kibawl tawm thei khin ta hi.6th July 1996 in Belam kibawltawm (clone) in a min dingin “dolly” kiphuak hi.Tua pen ganhing cloning masa pen ahi hi.Mihing zong bawl theih ngap uh himahleh Lai siangtho leh US Constitution kalh ahihmanin kiphal lo hi.Siavuan leh scientist ten bel kum 2036 ciang US Constitution in mihing Clone a phal nangin pan la uh hi. Zawng natawm in mihing paai thei ta hi.Zawng sul ah pasal baw tui(sperm) koih uh a tua pan naungek numei pound 7 leh ounce 14 a gik khat hong piangthei hi.Hih thu pen 13rd November, 1984 in Weekly World News ah ki suaksak khin zo hi.

Nu gilsunga naungek om nangawn ki at thei khinzo hi.1st November, 1999 in Tyne Hospital, New Castle, London ah Baby Jaydon a nu gilsunga om siavuan ten at uh hi.Hih naungek pen a naakna ah dal(wind pipe blockaged) om ahihmanin ki at kei leh a si ding hizen hi.Ahizongin siavuan te siamna tawh tua a dal pen ki at in hoih takin huih diik thei hi.Siavuan te zong siam mah mah ta uh hi. Khaicin dan thak Israel ten mukhia uh hi.Khai kung omsa khatah amau deih peuh zawm(transplant) ziau lel ta uh hi.Suaklu kungah theidang khat peuh kigahsak ta cihna hi.Thei gah lim lim a tang(seed) a ci dinga kizang leh kizang lo ding tuam bawl thei uh hi.A ci dinga kizang lo dingte a tang(seed) om lo in bawl thei uh hi.

Tua i genban khantohna a lamdang tuam tuam tampi om lai hi.TV,Computer, internet etc. te zong ei adingin a lamdang pilna leh khantohna khat mah hi.Mai lam hun ah zong tuhun sangin pilna khangto sem sem lai ding hi.American Medical Association a Dr.Shannon Brownlee bangin kum 2050 ciang Cancer ki damsak thei ta ding ci hi. Dr. Matt Ridley, Sex Education Specialist, USA in bel kum 2050 ciang sex pen gualnopna ‘sex for fun’ dan in kizangta ding ci hi.

Leitung khantohna khat peuh pen a hoihlo nate tawh hong tawn khawm hi.Tua ahihmanin mi khantohna a siatpih mikmek khawng om thei hi.Tua ahihmanin mikim pilvan mah mah kuul hi.Khangto nuam sia lua peuh kisiat lawh zawsop thei hi.Pilna in mihingte lungnopna bucing pia thei lo hi.Lungkim cih om thei lo in a maban ki lunggulh beh zel hi.Tuaban ah pilna, siamna leh thu theihna te in mihingte lungnuam losak thei lai hi.Sen Siavuan khat bangin mihingte guh kizawpzia a lauhuai dan theician lua ahihmanin ciangkhut khun lo in khualak vak ngam lo hi.Bang hang hiam cih leh mihing guh kizopnate sukhial kha leeng aki pelh lek thei ahihlam aman thei tel lua hi.

Khristian te adingin leitung nate thupi ngaihsut luat ding hi lo hi.Leitung nate sawt ki mangzo sam lo ding hi.Bang hang hiam cih leh leitung pen i khualzinna gam ahi hi.Ni khat ni ciangin tawntung munah a ciah kik ding vive hi hang.I sih hun ding kuaman thei lo ihihmanin aki gingsa in om ciat ni.Leitung nate i buaipih luat leh kiging man lo thei ding hi hang.Laisiangtho in “ Guta bangin Topa ni in hong tung ding hi.Tua ni ciangin vantungte in aw lian mah mah tawh mangthang ding a, a nate zong sa lua in a kisia ding hi.Leitunga kipan leitungah kibawl nakhempeuh a kangtum ding uh hi(IIPeter 3:10)” ci hi.

Leitung khangto zel ah Pasian thuzui khristian te pen thu um lo mite tawh aki lamdang dingin topa in hong deih hi.Thu um lo mite adingin limpha i suah kuul hi.Leitung nate i buaipih luat leh thu um lo mite adingin limpha kisuak thei lo ding hi.Pasian in leitung nate lunggulh lo a, tunglam nate bek lunggulh dingin hong deih hi.Kolose 3:2 ah “ Leitungah a om nate lunggulh in om kei un,a tunglam nate bek lunggulh in om un” ci hi. Leitung nate a buaipih lua ten Pasian it tak tak zo lo uh hi.Bang hang hiam cih leh to nih na sepkhawm haksa hi.Leitung ahi zongin, leitungah a om nate ahizongin na it kei un.Leitung a it mi sungah pa itna a om kei hi.(IJohn 2:15).Hih leitung mite bangin na om kei un.A hoih,a deih huai a kicing ahi Pasian’ deihna in bang ahi hiam ci in na khen theih na ding un na lungsim uh bawl thak in, na lim uh na kilamdang sak un(Rom 12:2).

Pau Tun Thang